गुरु महिमा

आंधळ्या वाटेने । चालतोचि आहे ।
पुढे काय पाहे। दिसो नाही ॥

कितीक जन्मांची । कर्मे ही चालली ।
आणिक उरली । किती एक ॥

कर्मफलाशेचा। मोह तो सुटेना।
वाट ती सरेना । पायातील ॥

देही जन्म झाला । देही अडकला ।
देहचि मानिला । सत्यरूप ॥

देहभोग कांक्षा । तेवढी उरली ।
अतिप्रिय झाली । देहसुखे ॥

कामांधतेपायी । लोपलासे धर्म ।
सततचे कर्म । असत्याचे ॥

पुरता रुतलो । कामाच्या कर्दमी ।
जीव अर्थकामी । अज्ञानी गा ॥

कामकाननी ह्या । प्रकाश दिसेना ।
वाट सापडेना । गुरूविण ॥

भांबावुनी उभा । थिजलो मी आहे ।
अंतरीच साहे । तापत्रय ॥

मार्गक्रमणेस । आधार तो द्यावा ।
हृदयी धरावा । गुरुराया ॥