प्रियदर्शिनी पार्क - मुंबईच्या समुद्रकिनारी लपलेली एक सुंदर जागा - (फोटोंसह)

.
व्हॉटसपवर स्टेटस टाकले
आणि सोबत खालील फोटो टाकला

१) Guess The Place??
Somewhere in Mumbai

मझ्या फ्रेंडलिस्टमधील निम्मी जनता परेशान.
किधर है भाई, किधर है ...

मग तासाभराने दुसरा फोटो टाकला.

२) Same Place... Any guesses ??

अर्ध्याअधिक जनतेचा एकच अंदाज

RHTDM ???

(अधिक माहितीसाठी माधवन आणि दिया मिर्झाचा रेहना है तेरे दिल मे बघा. ज्यात माधवनने अश्याच एका जागेचा "मुंबई की मेरी सब से फेव्हरेट जगह" असा उल्लेख केलेला)

मग मी कोणाची फार परीक्षा न घेता त्यांना खरे काय ते उत्तर दिले.

खरे तर मी स्वतः जन्मापासून मुंबईकर असूनही आणि या जागेच्या प्रवेशद्वारापुढून कित्येक वेळा गेलो असूनही आत ईतकी सुंदर जागा आहे याची मला कल्पना नव्हती. तर मग ईतरांनी न ओळखल्यास नवल नव्हते. लाज तर मलाच वाटावी अशी ही गोष्ट होती.

तर झाले असे,

मुंबईचे घर पुन्हा ताब्यात आले, आईवडिलांनी तिथे राहायला सुरुवात केली. तसे आम्हा नवी मुंबईकरांच्या मुंबई वार्‍या सुरू झाल्या.

आला विकेंड, ऊचलली बॅग, पळालो मुंबईला.

आता दर विकेंड मुलांसोबत मुंबईला जातोय तर त्यांना शनिवार-रविवार सकाळ-संध्याकाळ फिरवणे आलेच. राणीबागेपासून जी सुरुवात झाली ते गेटवे ऑफ ईंडिया, मरीन ड्राईव्ह, गिरगाव चौपाटी, हँगिग गार्डन सोबत कमला नेहरू पार्क, एके दिवशी वरळी सीफेस, तर कधी दादर परीसर, झाल्यास जवळचाच भाऊचा धक्का आणि नाक्यावरचाच माझगावचा डोंगर हे सारे एकापेक्षा जास्त वेळा फिरून झाले. सुदैवाने आमचे घर या सर्व जागांच्या केंद्रबिंदूवर असल्याने जाण्यायेण्याच्या दृष्टीने सारे सोयीचे पडायचे. पण मुलांच्या सुट्ट्या सुरू झाल्या आणि मुंबईतली वाढती गर्मी पाहता त्यांना मुंबईत आणखी कुठे कुठे फिरवायचे ही समस्या आणखी बिकट होऊ लागली.

अश्याच एका शुक्रवारी, मध्यरात्र उलटून गेली असताना, उद्या कुठे जायचे या विवंचनेत झोप येत नसताना, आपली मायबोलीकर म्हाळसा, देवीसारखी मदतीला धाऊन आली. (तिच्याकडे तेव्हा दुपार असते.)

तर व्हॉटसपवर तिचा मेसेज आला. आणि तिने ही जागा सुचवली. म्हणाली, छान दिसतेय. मी ही कधी गेले नाही. तू ने तुझ्या पोरांना आणि मला त्यांचा फिडबॅक दे. त्यांना आवडली तर मी सुद्धा भारतभेटीत माझ्या पोरांसोबत जाईन असे म्हणून अंतर्धान पावली.

प्रत्यक्षात ती जागा मला आणि माझ्या पोरांना ईतकी आवडली की महिन्याभरात आम्ही तिथे तीनदा जाऊन आलो. पोरांनाच नाही तर बायकोलाही सोबत घेऊन गेलो. कारण जागा केवळ पोरांनाच आवडेल अशी नव्हती तर तिला एक रोमांटीक टच सुद्धा होता

चला तर मग त्या जागेची, म्हणजेच प्रियदर्शिनी पार्कची, एका दिवसाची सैर करूया

३) दुपारी कडक ऊन असते, काही हरकत नाही. पार्क सकाळी ६ वाजता ऊघडते. मॉर्निंग वॉकलाच बाहेर पडूया. जरा ऊशीर झाला तरी ऊन कोवळंच मिळेल

.

४) हे गेटमधून आत शिरल्यावरचे पहिले द्रुश्य. पण फोटो मात्र आम्ही निघताना टिपला आहे. ईथेच गेटच्या आत स्नॅक्स कोल्ड्रींकचा स्टॉल आहे. तिथेच आईसक्रीम खाता खाता क्लिक केला.

.

५) तिथून लहान मुलांच्या गार्डनला जाणारा रस्ता. सकाळी सकाळी मॉर्निंग वॉक करणारी मंडळी ईथून भेटायला सुरुवात होईल.

.

६) पोहोचलो. हेच ते गार्डन. समुद्राच्या बाजूने नारळाच्या झाडांनी आच्छादलेले.

.

७) आजकाल कुठल्याही गार्डनमध्ये हे ऑल ईन वन स्लाईडस असते आणि मुलांना खेळायला पुरते. ईथेही अपवाद नाही.

.

८) सोबत झोके आहेतच!

.

९) पण आम्हाला चार झोके झाल्यावर मातीतच खेळायला आवडते

.

१०) हे एक मचान आहे. पण साधेसुधे नाही तर महान आहे. याच्या मधोमध एक झाड प्रगट झाले आहे.

.

११) पोरांना काही एडवेंचरस हवे असल्यास... त्याचीही सोय आहे.

.

१२) खेळून मन भरले की समुद्राच्या कडेकडेने वॉकला निघायला हरकत नाही.

.

१३) बारकाईने पाहिले तर आपल्या रंग बदलण्याच्या शक्तीचा गैरफायदा उचलत झाडांवर असे सरडे लपलेले दिसतात. पण चालता चालता रस्त्यावरच्या मुंग्या टिपणारी आमची पोरं, त्यांच्या नजरेपासून ईतके अजस्त्र प्राणी लपणे अवघडच.

.

१४) चला तर मग वॉकचा आनंदम लुटत अजून पुढे जाऊया

१५)

.

१६) छान स्वच्छ आणि शांत रस्ते वाटत आहेत ना. सोबत नजरेला सुखावणारा समुद्र. कानावर अलगद आदळणारा लाटांचा आवाज. आणि अंगावर येणारी थंडगार खार्‍या वार्‍याची झुळूक... मॉर्निंग वॉकचे सुख सुख म्हणतात ते हेच

.

१७) हा क्षितिजाकडून येणारा उताराचा रस्ता आम्हाला ईतका आवडला आहे की लेकीने पुढच्यावेळी ईथे नाचाची ईन्स्टा रील बनवायचे ठरवले आहे.

.

१८) हे आतले स्पोर्टस कॉम्प्लेक्स. ईथे आत शिरायला पैसे भरून मेंबरशिप घ्यावी लागेल.

.

१९) या बाहेरच्या हिरवळीचा आनंद मात्र मोफत लुटू शकतो.

.

२०) अरे हो, हा खालील फोटो टिपल्यावर या रस्त्यावर आम्हाला एक ऊच्चभ्रू कुत्र्यांची जोडी दिसली. मला कुत्र्यांमधील फारसे म्हणजे काहीच कळत नाही. पण ते चक्क क्यूटसे कोल्हेच वाटत होते. त्यांचेही फोटो मालकाची परवानगी घेत काढायला हवे होते असे आता वाटतेय. पण असो, पुढच्यावेळी... त्यांना टाटा बाय बाय करत आम्ही आमची प्रभातफेरी संपवून तिथून निघालो.

.

चला तर मग, आता संध्याकाळची मजा बघूया. संध्याकाळचे फोटो बघूया.

पण जी मजा फोटोत समजणार नाही ती म्हणजे या गर्मीच्या सीजनमध्ये जिथे दिवसभर वार्‍याच्या नावावर गरम वाफ झेलावी लागते. तिथे या ठिकाणी मात्र संध्याकाळच्या वेळी बेफाम बेछूट थंड वारे सुटले होते. जणू आपण वेगळ्याच अवकाशात प्रवेश केला असे गार्डनमध्ये पहिले पाऊल ठेवताच वाटू लागले.

२१) ही तीच सकाळची मचान, आता संध्याकाळच्या संधीप्रकाशात न्हाऊन निघाली आहे.

.

२२) हे तिथून टिपलेले बागेचे विहंगम दृश्य.

.

२३) आणि हे ही तिथूनच, पण समुद्राच्या दिशेने, नारळीच्या बागांचे..

.

२४) त्याच नारळाच्या बागेत संध्याकाळचे मतलई वारे खात बसलेली एक फॅमिली..

.

२५) सोबत पफकॉर्न खाणारी खारूताई

.

२६) चला थोडे ऊन कमी झालेय तसे समुद्राकडे जाऊया

.

२७) समुद्राचे वारे आता थेट खाऊया

.

२८) हा अस्सा पसरलेला समुद्र दिसतो समोर

.

२९) की जणू सुर्यही आपला सोबती वाटतो.

.

३०) वारा ईतका की बारक्या पोरांचेही केसं ऊडतात

.

३१) लोकं घरच्यासारखे मिळेल ती जागा पकडून पसरतात.

.

३२) कारण समोरचे द्रुश्यच ईतके भन्नाट आणि विलोभनीय असते.

.

३३) समुद्र! समुद्र! समुद्र!... हिच तर मजा आहे मुंबईची

.

३४) एक दगड पकडून आपल्यालाही तो जवळून बघायचा मोह आवरत नाही.

.

३५) काहींना पुढे जाऊन त्याला स्पर्श करावेसे वाटते. पण तुम्ही थोडे अंतर राखण्यातच धन्यता मानता.

.

३६) पण मग तो स्वतः तुम्हाला स्पर्श करायला पुढे सरसावतो

.

३७) पण जर तुम्ही आधीच त्याच्या ओढीने पुढे गेलात....

.

३८) तर मग जरा जपून...

.

३९) हे असे होण्याची दाट शक्यता असते.
लगेचच ती धोक्याची घंटा, परतीचा इशारा समजावा...

.

४०) जर तुमच्यासोबत तुमची प्रेयसी/प्रियकर नसेल, तर मावळत्या सुर्याला निरोप देऊन घरी परतायला हरकत नाही.... पुढची मजा प्रेमी युगुलांना करू द्यावी. बाकी तसा त्यांचा ऊच्छाद ईथे कुठे दिसला नाही हे विशेष.

------------------------------------------------

खालील नकाश्यात जवळपासच्या फिरायच्या जागा हायलाईट केल्या आहेत. आम्ही खादाडीसाठी माझगाव, भायखळा, गिरगाव चौपाटीचा रस्ता धरल्याने जवळच्या खाऊगल्ली ठिकाणांची कल्पना नाही.

४१) नकाशा क्रमांक १

४२) नकाशा क्रमांक २

------------------------------------------------

Priyadarshini Park

Address: Nepean Sea Rd, Malabar Hill, Mumbai, Maharashtra 400006

Timing: 6–11 am, 4–9 pm

धन्यवाद,
ऋन्मेष