प्रसंग अगदी काल घडलाय असा डोळ्यासमोर आहे...
"बाबू, ई नदिलोनि पवित्र जलालधु स्नानम चेसरा... जलालो मुनीगी रा.." नदीकाठावरच्या आणि पलीकडे गुडघाभर पाण्यात उभ्या आईच्या मातुल कुटुंबातील नातेवाईक मंडळींनी कृष्णेच्या 'पवित्र' पाण्यात मी स्नान करावे, असा एकच घोषा लावला होता. स्नानाला कधीही एका पायावर तयार असणारा मी ठामपणे 'नाही' म्हणत असल्याचे दुर्लभ दृश्य बघून आईच्या चेहऱ्यावर आश्चर्य आणि हसू एकाच वेळी झळकत होते. अखेर बळेबळेच मला त्या गढूळ पाण्यात ओढण्यात आले आणि कृष्णा नदीतीरी दर बारा वर्षांनी भरणाऱ्या 'कृष्णापुष्करम' उर्फ 'दक्षिण कुंभ' मेळाव्यात आमचे घोडे न्हाले! 'न आवडलेले' असे आयुष्यातील ते दुर्मीळ स्नान. अन्यथा आंघोळ करणे हे माझ्या जीवनातील सर्वाधिक आनंददायक काम होते आणि आहे.
Bath is to body what laughter is to soul असे कोणीतरी म्हटलेच आहे, नसेल म्हटले तर मी म्हणतो. जन्माला आल्यावर सर्वप्रथम नर्सबाई काय करतात, तर नवजात बाळाला आंघोळ घालून स्वच्छ करतात. त्याशिवाय खुद्द आईबाबांना तरी दाखवतात का ते बाळ? जन्मल्याबरोबर जे काम आपल्याला चिकटते तेच 'आवडते' काम असेल, तर मग त्याचा मन प्रफुल्लित करणारा सोहळा होतो. त्याचे सर्व टप्पे फार आनंददायक होतात आणि हे स्नानसोहळे स्मृतींमध्ये अलगद जाऊन बसतात.
आज पाच दशके भूतलावर काढल्यानंतर कुणी आयुष्याच्या सर्वात आनंदी प्रसंगांबद्दल विचारले, तर मला माझा स्नानप्रवास आठवतो. सकाळी शाळेत जाण्याआधी गारेगार पाण्याने केलेले सचैल स्नान, कडाक्याच्या हिवाळ्यात ऊन-ऊन पाण्याने अंग शेकणारे स्नान, सुट्टीच्या दिवशी आईने खसाखसा घासूनपुसून लख्ख करीत घातलेली आंघोळ, बाबांसोबत जलतरण तलावात केलेले स्नान, सणासुदीचे - प्रसंगविशेष स्नान, आजोळी स्वच्छ नदीपात्रात डुंबत केलेले स्नान... एक ना हजारो आनंदक्षण स्नानाशी जोडले गेले आहेत.
घरी आईचा दिवस सर्वात आधी सुरू होई. तिच्या माहेरी फार धार्मिक वातावरण होते, स्नान केल्याशिवाय ती काही खात-पीत नसे. आम्ही भावंडे अर्धवट झोपेत असताना आईचे स्नान आटोपत असे. हळू आवाजात तिचे गायत्री मंत्राचे पठण ऐकू येत असे. मग चहा-दूध तयार झाले की मला पूर्ण जाग येई. शाळा सकाळची, त्यामुळे आवरून आंघोळ करूनच शाळेत जायचे, असा नियम होता. शेजारीपाजारी सर्व मुलांमध्ये आंघोळ करून वेळेत तयार होण्यात माझा नंबर नेहेमी वर असे. घरी हिरव्या रंगाचा 'हमाम' साबण आम्हा भावंडांचा सामायिक होता. हो, तेव्हा प्रत्येकाला वेगळ्या साबणाची चंगळ नव्हती. त्यामुळे कोरडा साबण मिळावा म्हणून मीच पहिला नंबर लावत असे. ८० वर्षांपेक्षा अधिक वय असलेला शुद्ध हिंदुस्तानी 'लोकल' हमाम साबण आजही ३०० कोटी रुपयाचा ब्रँड आहे! आतासारखे 'आयुर्वेदिक', 'नैसर्गिक', ‘इको-फ्रेंडली’ साबणाचे काही खास कौतुक नव्हते. त्या वेळेपासून (१९३१) नीम, तुळस, एलोवेरा अशा नैसर्गिक पदार्थांचा वापर हे हमामचे वैशिट्य टिकून आहे हे खास. आधी टाटा आणि आता हिंदुस्थान युनिलिव्हर बनवतात. आजही महिन्याला काही कोटी हमाम साबण विकले जातात भारतात.
हिवाळ्यात गरम पाण्यासाठी स्टोव्हवर वेगळा हंडा तापत ठेवलेला असे, त्यातले हवे तेवढे गरम पाणी काढून तेवढेच गार पाणी त्या हंड्यात परत उकळण्यासाठी ठेवले जाई. जुन्या आठवणीत हमखास असणारा पाणी तापवण्याचा बंब मात्र आमच्या घरी कधीच वापरात नव्हता. नळाला पाणी ठरावीक वेळी असल्याने आणि शाळेसाठी उशीर होणे लाजिरवाणे समजले जात असल्याने टाइम वॉज ऑलवेज ऍट प्रीमियम... त्यामुळे आंघोळीची खरी मजा रविवारी असे. त्या दिवशी भरपूर पाणी आणि साबण वापरून मनसोक्त आंघोळ करायला कोणाची ना नसे. फक्त त्याआधी 'केस धुणे' हा गंभीर अत्याचार होत असे. केसांसाठी वेगळ्या 'शिकेकाई' साबणाचा प्रवेश आमच्या घरी झाला नव्हता. रोजच्याच साबणाने किंवा कधी तर सर्फसारख्या पावडरींनी आमचे 'मळके, घाण, चिपचिप' केस स्वच्छ केले जात. साबणाचे पाणी हमखास डोळ्यात जात असल्याने हे मला फार त्रासदायक वाटत असे. एकदा हे झाले की हवा तेवढा वेळ पाण्यात खेळायला परवानगी असे. आम्ही भावंडे एकमेकांवर पाणी उडवून, एकमेकांना ढकलून, दंगामस्ती करत रविवारची सकाळ सार्थकी लावत असू. कधीकधी बाबाही आमच्या कंपूत सामील होत आणि आमच्या जलपंचमीला उधाण येत असे.
उन्हाळ्याच्या सुटीत आमच्या मूळ गावी आणि आजोळी विभागून जात असू. दोन्ही ठिकाणची स्नानवैशिष्ट्ये वेगवेगळी होती. आमच्या गावी पाण्याचे दुर्भिक्षच. घरात विहीर नव्हती. गावातल्या दोन विहिरींनाच काय ते पाणी आणि उन्हाळा म्हणजे तिथेही पाणी कमी. आमचा घरगडी लच्छू विहिरीतून हंडे भरून आम्ही घरचे, गडीमाणसे, जनावरे सर्वांसाठीच पाणी आणीत असे. पाणी जपून वापरावे लागे, आंघोळीसाठी काटकसर करावी लागे. तरी त्या घरी स्नान आवडायचे, कारण विहिरीचे थंडगार पाणी आणि 'लाइफबॉय' साबण. गुलाबी रंगाचा, चौकोनी. बाबांच्या लहानपणापासून तोच एकमेव साबण गावात विक्रीला असे. लाइफबॉय आता सुमारे शंभर वर्षे भारतात विकला जात आहे, अगदी मागच्या एका वर्षातच २००० कोटी रुपयांचे लाइफबॉय साबण विकले गेले भारतात! म्हणजे आजही वट असलेला हा खरा सुपरब्रॅंड! पुढे 'लाइफबॉय है जहाँ तंदुरुस्ती है वहाँ' या जिंगलचे मराठी भाषांतर 'लाइफबॉय ज्याचे घरी आरोग्य तेथे वास मारी' असे करून खिदळणे अनेक वर्षे चालले.
* * *
तिकडे आजोळी वेगळीच तर्हा. दररोज पहाटे साधारण ५च्या सुमारास ...
नंदिनी नलिनी सीता मालती च महापगा
विष्णुपदाब्जसंभूता गंगा त्रिपथगामिनी
भागीरथी भोगवती जान्हवी त्रिदशेश्वरी
द्वादशैतानि नामानी यत्र यत्र जलाशये
स्नानोद्यत: स्मरेनित्यं तत्र तत्र वसाम्यहं…….
सर्व जण साखरझोपेत असताना बाहेर आजोबांचे मोठ्या आवाजात स्तोत्रपाठांसह स्नान सुरू असायचे. आता थोड्याच वेळात दिवस उगवणार आणि आपल्याला बिछाना सोडावा लागणार, हे दुष्ट सत्य हळूहळू मनाला स्पर्श करू लागे. बाहेर पेटवलेल्या बंबाच्या धुराचा, गरम पाण्याचा, मैसूर चंदन साबणाचा, अग्निहोत्रात टाकलेल्या अर्धवट पेटलेल्या गोवऱ्यांचा, पूजेसाठी आणवलेल्या ताज्या फुलांचा एक मिश्र दैवी सुवास पसरत असे.
त्यांच्याकडे एक जादुई कुलूपबंद कपाट होते - फक्त साबणांचे! त्यात वेगवेगळ्या ब्रँडचे अनेक साबण हारीने रचलेले असत. लांबचा प्रवास करून जबलपूरला आजोळघरी पोहोचल्यावर ते कपाट उघडून आम्हा भावंडांना प्रत्येकी एकप्रमाणे हवा तो साबण घेता येई, फक्त मैसूर संदल वगळता. मैसूरवर आजोबांचा एकाधिकार होता आणि तो अन्य कोणालाही वापरायला मिळत नसे. त्याचा राग येई.
पुढे अनेक वर्षांनी बंगळुरूला कर्नाटक स्टेट सोप फॅक्टरीत एका कामासाठी गेलो, तेव्हा तेथे मैसूर संदल साबण आणि त्याचे अनेक नवनवीन प्रकार सुंदर वेष्टनात विकायला होते. आजही पूर्वीसारखेच चंदनाचे शुद्ध तेल वापरतात त्यात. मी अधाशासारखे विकत घेतले, स्वतः भरपूर वापरले आणि घरी-दारी-मित्रांना भेट म्हणून दिले. 'छोटा बच्चा' म्हणून मला नाही म्हणतात म्हणजे काय? ते एक सोडले तर भेडाघाट, ग्वारीघाट अशा नर्मदेच्या वेगवेगळ्या घाटांवर स्वच्छ गार पाण्यात तासनतास केलेले स्नान ही आजोळची सर्वोत्तम आठवण.
सौंदर्यतारकांचा म्हणून नावाजलेला 'लक्स' साबण फार प्रसिद्ध होता. मध्यमवयीन-मध्यमवर्गीय स्त्री-पुरुष आधी फारसा वापरत नसत. शेजारपाजारच्या कॉलेजकुमारी-कुमार मात्र तो साबण खास वापरत. त्यांचा हेवा वाटत असे. मी साधारण १० वर्षांचा होतो, तेव्हा केसांसाठी वेगळा साबण दिसू लागला. श्रीमंत नातेवाईक स्त्रिया 'केशनिखार' साबण वापरत. गोदरेज आणि विप्रो ब्रँडचे 'शिकेकाई' साबण आले आणि मग केशनिखार चे कौतुक संपले. शिकेकाई साबण पुरुष मंडळी मात्र वापरत नसत, आम्हा मुलांनासुद्धा केसांसाठी शिकेकाई साबण वापरणे फार 'गर्ली' वाटत असल्यामुळे आम्ही रोजचाच साबण केसांना फासत असू.
मग काही वर्षांनी 'सनसनाती नींबू की ताजगी' देणारा लिरिल, 'सुपर फ्रेश' सिंथॉल आणि नीम की गुणवत्ता लिये 'मार्गो' असे अनेक ब्रँड बाजारात दिसू लागले. टीव्ही रंगीत झाला आणि जाहिरातीत दिसणारी बिकिनीतली सचैल लिरिल कन्या सर्वत्र चर्चेचा विषय झाली. पुढेही अनेक वर्षे लक्सचे 'फिल्मी सितारों का सौंदर्य साबुन' हे स्थान आणि लोकप्रियता कायम राहिली. ९०नंतर विप्रोच्या संतूर साबणाने लक्सच्या इंद्रासनाला बऱ्यापैकी झटके दिले. 'आप की त्वचा से आप की उमर का पता ही नही चलता' हे फार गाजलेले कॅम्पेन. पण तो 'गर्ली' आहे हे माझे मत काही बदलले नाही. आम्हा पुरुष मंडळींसाठी विशेष वेगळे साबण फारसे नव्हते. लाइफबॉय, सिंथॉल आणि ओके याच साबणांना 'पुरुषांसाठी' म्हणून मान्यता होती. पुढे सुपरस्टार शाहरुख खानने 'लक्स'साठी टबबाथ घेत हे बदलण्याचा एक प्रयत्न केला. त्यामुळे लक्स फक्त बायका वापरतात हा समज थोडा कमी झाला.
फेब्रुवारी १९८२ ह्या महिन्यात माझ्या स्नानप्रेमासाठी एक नवे युग अवतरले. आम्ही स्वतःच्या मोठ्या घरात राहायला गेलो. ह्या घरात वेगळे मोठे भिंतभर टाइल्सची सुखद रंगसंगती असलेले कोरे करकरीत स्नानघर होते. पूर्ण बंद होणारा दरवाजा, उत्तम सूर्यप्रकाश आणि मुख्य म्हणजे डोक्यावर भरपूर जलधारांचा 'शॉवर' होता! आजवर स्नान म्हणजे बादलीत किंवा घंगाळात असलेले पाणी अंगावर घ्यायचे असे स्वरूप बदलून जलौघाचे रेशमी तुषार अंगावर झेलत सचैल स्नान करायचे, असा सुखवर्धक बदल झाला. माझे आंघोळीचे तास वाढले. आमचे शहर उन्हाळ्यात प्रचंड तापत असे, पाणीटंचाई मात्र नव्हती. त्यामुळे दिवसातून दोनदा स्नानाचे सुख लुटले जाई. पुढे काही वर्षांनी पाणी तापवायला गीझर आला, गरम पाण्याचा हिवाळी स्नानसोहळा जास्तच लांबल्यामुळे पूर्ण स्नानघरात वाफेचे धुके पसरत असे. त्यातून बाहेर पडताना आपण ढगातून बाहेर पडून जमिनीवर पाय ठेवत आहोत असा फील येत असे.
१९८०पासूनच शाम्पूच्या बाटल्या आमच्या शहरातल्या दुकानांत दिसू लागल्या होत्या. हे महागडे प्रकरण आपल्यासाठी नाही असे सर्वच मध्यमवर्गीय लोक समजत, त्यामुळे ते काही आमच्या घरी आणले गेले नाही. शाम्पू प्रकरणात खरी क्रांती 'Chik' नामक शाम्पूच्या सॅशे पॅकने घडवली. १ रुपया अशी माफक किंमत, तीव्र सुगंध, भरपूर फेस असे सर्व काही त्यात होते. बहुतेक १९८३ साल असावे. हे झाले आणि मग मात्र वेगवेगळ्या सर्वच ब्रॅण्ड्सचे शाम्पू असे सॅशेमध्ये मिळू लागले, जास्त आवाक्यात आले. २-५ वर्षांतच ते स्नानाचा अविभाज्य भाग बनले. आज तर देशातील एकूण शाम्पूविक्रीपैकी ७५% विक्री फक्त 'सॅशे पॅक'ची असते.
माझ्या स्नानसोहळ्यातही शाम्पूचे कौतुक वाढतेच राहिले. साधारण १० वर्षांनी त्याचा धाकटा भाऊ 'कंडिशनर' बाजारात आला. कंडिशनरचा जन्म मात्र पुरुषांच्या गरजेपोटी झाला आहे, 'ब्रिलियंटाइन' ह्या दाढी-मिश्या चमकदार करणाऱ्या उत्पादनाचे दुसरे रूप म्हणजे कंडिशनर. काही ब्रॅंड्सनी आधी शाम्पूसोबत कंडिशनर मोफत वाटले आणि पुढे त्याची सवय कधी लागली ते समजलेच नाही.
* * *
१९९४पासून नोकरीधंद्याला सुरुवात झाली, शहर बदलले. सर्व साबण, शाम्पू स्वतःच्या आवडीचे घेता येऊ लागले. याच वेळी लिक्विड सोपचे पेव फुटले. एकापेक्षा एक सरस सुगंध असलेले हे द्रवरूपी नावीन्य, त्याचा फेसच फेस आणि त्यासाठी वेगळे 'लूफा' असा जामानिमा. एकदम राजेशाही. मुंबईतील अनेक छोट्या घरात राहिलो. इथे जागा कमी आणि बाथरूम तर मी जेमतेम उभा राहून ओला होऊ शकेन एवढीच जागा असलेले. बाहेर घाम आणि प्रदूषण भरपूर, त्यामुळे दिवसातून दोनदा स्नान हा शिरस्ता कायम राहिला, तरी स्नानसुखात व्यत्यय मात्र आला.
तोवर खास पुरुषांसाठी म्हणून साबण आणि स्नानप्रावरणे भारतीय बाजारात दिसू लागली होती, त्यांचा लाभ घेण्याएवढी ऐपत आली होती. 'एक्स्ट्राव्हॅगंटली मेल' अशी खास टॅग लाइन असलेला 'आरामस्क' साबण दिल्लीच्या दिवान वाधवा ग्रूपने आणला. तो आम्हा तरुण मुलांमध्ये फारच लोकप्रिय झाला. वेगळा, थोडा तीव्र सुवास आणि वेगळाच आकार, साबणाच्या वडीवर एक डौलदार A अक्षर कोरलेली पट्टी असे ते आकर्षक प्रॉडक्ट होते. नीश की काय म्हणतात तसे. तो अनेक वर्षे मी वापरला. पुढे क्रेझ ओसरली आणि तो ब्रँड विस्मृतीत गेला. एका मराठी मुलीने ब्रँड रिव्हायव्हल शीर्षकाखाली ह्या साबणावर शोधप्रबंध सादर केला, इतकी त्याची लोकप्रियता. जुन्या गाण्यांचे जसे रिमेक बाजारात येते, तसे काही खास ब्रॅंड्सचे व्हायला पाहिजे.
दिवाळीचा सण आणि 'मोती' साबणाने स्नान हे अद्वैत तर वर्षानुवर्षे उपभोगतोच आहे. तो सुवास आणि दिवाळी एकमेकांना पर्यायवाची जणू. मोती साबण आणि दिवाळी निदान महाराष्ट्रात तरी एकमेकांपासून वेगळे करता येत नाहीत.
पितृत्व लाभले, तेव्हा स्नानप्रेमामुळेच नवजात बाळाला आंघोळ घालायची जबाबदारी सहज स्वीकारली आणि पार पाडली. जसजसे वय वाढत गेले, तसतसे साबण आणि आइसक्रीमच्या जाहिराती सारख्याच होत गेल्या - मलाई, बदाम, फळांचे रस दोहोंत असल्याचे कानीकपाळी सांगण्यात येऊ लागले. साबणातून 'नैसर्गिक' सुगंध हळूहळू कमी होत गेला आणि साबण 'दिसायला' सुंदर होऊ लागले. आता 'खादी'सारखी दर्जेदार (आणि महाग) उत्पादने सोडली, तर 'खरे' सुवास दुष्प्राप्य झाले आहेत.
पुढे कामानिमित्त देशभर-जगभर प्रवास करता आला. आलिशान-गेलिशान सर्वच प्रकारच्या गेस्ट हाउस, लॉज, तारांकित-बिनतारांकित अशा हॉटेलातून राहण्याचे प्रसंग वाढले. जणू एक नवीन स्नान-दालन पुढ्यात आले. तेव्हा आणि आताही रूमचा ताबा मिळाला की सर्वात आधी तेथील बाथरूमचे निरीक्षण-परीक्षण करणे आणि तिथले शॉवर-तोट्या उघडबंद करण्याचे विशेष तंत्र समजून घेणे हे प्रचंड आवडीचे काम आहे. त्यामुळे नंतर होणारी फजिती होत नाही हा मोठा फायदा. त्यातही प्रचंड वैविध्य असते हे कळले. उंची हॉटेलातून स्नानागारांच्या रचनेवर भरपूर मेहनत घेतलेली दिसून येई, स्वच्छतेचा, सौंदर्याचा आणि स्नानानुभव समृद्ध करण्यासाठी लागणाऱ्या वातावरण निर्मितीवर भर दिलेला असे. स्नानाचा आनंद शतगुणित होत गेला.
वेगवेगळ्या शहरात मुक्कामात बाथ टब, बाथ सॉल्ट, बाथ बॉम्ब्स आणि बबल बाथ यासारखे नखरेल प्रकारही पुरेपूर अनुभवले. Wash away your troubles with some bubbles हे ध्येयवाक्य ठेवून स्टीम बाथ, सौना बाथ, व्हिटॅमिन फिल्टर लावलेले शॉवर, पाठीच्या कण्याला सुखद मसाज देणारे प्रेशर शॉवर, जाकुझी असे शरीराचे चोचले करण्यात मागे राहिलो नाही. अत्याधुनिक स्नानगृहांमुळे काहीदा फजितीही झाली. जपानी हॉटेल्समधली स्पेस कॅप्सुलसारखी अरुंद स्नानगृहे आणि माझे सहाफुटी धूड हे व्यस्त प्रमाण सहन न झाल्यामुळे त्यात असलेल्या असंख्य तोट्या-बटणे-रिमोट-अलार्म यांनी वात आणला होता. स्वीडन आणि जपान दोन्हीकडे पारंपरिक बाथहाउसचा अनुभव घ्यायला म्हणून गेलो असता तिथल्या 'दिगंबर ओन्ली' अटीमुळे काही क्षण अवघडलो होतोच.
सिंगापूरच्या मरीना बे सँडच्या सर्वोच्च मजल्यावर माझ्या छोट्या पिल्लाला सोबत घेऊन खिदळत केलेलं जाकुझी स्नान, गोव्यात थोड्या अप्रसिद्ध शांत समुद्रकिनाऱ्यावरचे रात्रीच्या चांदण्यातले स्नान, भोपाळला ३०० वर्षे जुन्या कादिमी हम्माम मध्ये केलेला नवाबी गुसल, धबधब्याखाली केलेली तुषारस्नाने, मे महिन्याच्या प्रचंड उकाड्यात पटियाला-अमृतसर मार्गावरील अनोळखी गावातल्या एक निर्जन ट्यूबवेलवर मनसोक्त केलेले स्नान, कडाक्याच्या थंडीत मित्रांच्या पैजेखातर तिस्ता नदीच्या उथळ पात्रात केलेले, ब्रह्मपुत्रेच्या घनगंभीर पाण्याकाठी घाबरत केलेले, सोरटी सोमनाथला समुद्राच्या प्रचंड खारट पाण्यात केलेले, उज्जयिनीत क्षिप्रा 'नदी' म्हटल्या जाणाऱ्या ओघळात जेमतेम पाय बुडवून केलेले, पुष्करच्या ब्रह्मसरोवरात भल्यापहाटे केलेले, मालदीवच्या रिसॉर्टमध्ये खाली काचेतून समुद्र आणि वर मोकळे आकाश दिसणाऱ्या राजेशाही स्नानागारात केलेले.. अशा एक ना अनेक स्नानस्मृती माझ्या मनाला आजही भिजवून काढतात. Life is a long bath, the more you stay, the more wrinkled you get हे पुरेपूर पटलंय.
स्नानमाहात्म्यात एक अध्याय टॉवेलचाही आहे. सुती पांढरा पंचा, मग थोडे बरके कोइम्बतूरच्या 'मोती' ब्रँडचे जाडसर टॉवेल, मग सुखसंवर्धक टर्किश टॉवेल, मग खास बांबूच्या/केळीच्या तंतूंपासून बनवलेले अतिमुलायम टॉवेल्स, जुन्या सिनेमातील व्हिलन मंडळी वापरीत तसले स्टायलिश बाथरोब असे सर्व चोचले पुरवायला मिळाले. तो प्रवासही आनंददायक ठरलाय.
* * *
सर्वच स्नानप्रवास आनंदी झाला असेही नाही. प्रयाग-वाराणसीला भेटी घडल्या, पण गंगास्नानाचे आलेले योग बरेचदा पाण्याच्या अस्वच्छतेमुळे नाकारले आहेत - डोक्यावर पाण्याचे शिंतोडे घेऊन प्रतीक-स्नान करून वेळ मारून नेली आहे. गंगेच्या कुशीत स्वच्छ नितळ पाण्यात स्नान करायला मिळाले, तोही प्रसंग अगदी कालच घडल्यासारखा वाटतो.
….. कुरु कृपया भवसागरपारम् ...... तीर्थपुरोहित जुळे भाऊ पंडित सुदीक्षित सुभिक्षित मंत्रपठण करीत आहेत. त्यांच्या कानात हिऱ्यांच्या कुड्या चमचमत आहेत. मावळतीचा सूर्य, नोव्हेंबर महिन्याची कडाक्याची थंडी आणि गंगेच्या स्वच्छ बर्फगार पाण्याचा तीव्र प्रवाह, त्यात भिजत उभा मी. मनाची भावविभोर अवस्था. त्यांचा आवाज टिपेला पोहोचतो ...
तव चेन्मातः स्रोतःस्नातः
पुनरपि जठरे सोऽपि न जातः
नरकनिवारिणि जाह्नवि गंगे
कलुषविनाशिनि महिमोत्तुङ्गे …..
सुदीक्षित मृदू आवाजात म्हणतात, "अनिंद्यजी, माताजी को अंतिम प्रणाम कीजिये, अस्थियों को अब गंगार्पण कीजिये..." आणि त्या एका क्षणातच आईचा हात नेहमीसाठी सुटल्याचे आलेले भान... हरिद्वारचे एकमेव गंगास्नानही कधीच न विसरता येण्यासारखे.
* * * समाप्त * * *
इतरत्र पूर्वप्रकाशित. काही चित्रे जालावरून साभार.
छान रंगली आहे सुगंधी चर्चा !
छान रंगली आहे सुगंधी चर्चा !
<<जस्ट चेकवले तर CAMAY च्या ३
<<जस्ट चेकवले तर CAMAY च्या ३ साबणाच्या पॅकची किंमत रु २५७ दाखवत आहेत.<<
अरेव्वा, सापडला की कैमे!
मागवते आता!
नेहमीचे कलर डार्क ग्रीन, गुलाबी, लाल, हिरवे पोपटी अन आकारात गोल, चौकोनी, लांबोळकेपेक्षा पांढरा शुभ्र रंगाचे हटके आकाराचे साबण जरा जास्तच भाव खाऊन असतात.
Camay the smell is awesome.
Camay the smell is awesome.
... मी साब् णातील सुगंधांवरच
... मी साब् णातील सुगंधांवरच काम कर्ते त्यामुळे मला असा एक लेख लिह्यायचा होता....
जरूर लिहा अमा, आम्हाला सुगंधी जगातील काही Technical गोष्टी कळतील.
मुंबईत मुलुंड जवळ कारखाना असलेली केळकर आणि कं. सुगंधी उत्पादने बनवण्यात आघाडीवर होती, अजूनही असतील काही.
Myntra घ्या फेसबुक पेजवर
Myntra घ्या फेसबुक पेजवर khadi च्या lavendar soap ची जाहिरात दिसत होती.
तिथून पुढे गेलो तर एकाने लिहिलं होतं की या साबणाचा अगदी सहन न होण्याइतका वास येतो.
त्यानेच नंतर एक कमेंट लिहिली की तीन दिवस साबण उघडा ठेवल्यावर वास कमी झाला. त्याला साबण आवडला होता.
खादीच्या काही साबणांचा वास न्हाणीघराबाहेरही येतो.
@ भरत.
@ भरत.
इतक्यात खादी साबण वापरले नाहीत, पण इतका तीव्र सुवास असेल तर साबण म्हणून न वापरता रूम फ्रेशनर म्हणून वापरावे लागतील
अनिंद्य, पूर्वी लेख वाचुन
अनिंद्य, पूर्वी लेख वाचुन प्रतिसाद दिला होताच. त्यांनंतरही दोन वेळा परत वाचला. अतिशय सुंदर लिहिलं आहे.
या साबणाचा अगदी सहन न होण्याइतका वास येतो. >>> भरत, हे अगदी शक्य आहे. फार पूर्वी फॅब इंडियामधुन खादीचा शॅम्पू आणला होता. त्याला भयाण स्ट्रॉंग, चीप उदबत्तीसारखा वास होता. ऑरगॅनिक प्रॉडक्ट म्हणुन विकत असले तरी केस प्रचंड कोरडे व्हायचे, त्यामुळे 2 वेळा वापरल्यावर नन्तर पेडिक्युअरसाठी वापरणे, किचन ओटे पुसायची फडकी, अंडरगारमेंट्स धुणे यासाठी वापरून संपवला. तसेही देशी सुगंध माझ्या आवडीत बसत नाहीत.
त्यापेक्षा bath &body आणि body shop चे विविध shower gels जास्त आवडतात. ( Japanese cherry blossom जास्त आवडता.)
फार पूर्वी फॅब इंडियामधुन
फार पूर्वी फॅब इंडियामधुन खादीचा शॅम्पू आणला होता. त्याला भयाण स्ट्रॉंग, चीप उदबत्तीसारखा वास हो>> कारण ते फारिनर साठीच असतात पाकीट उघ डले की इंडिया फील याया होवा. आपल्याला कसे अमेरिकन व्हॅनिला वगैरे लाइ ट वास मस्त वाटतात. अमेरिकेस गेल्या सारखे वाट्त्ते.
तसे गोर्याला वाटले पाहिजे.
@ कुमार१
@ कुमार१
सुगंधी मैफिलीत पुन्हा स्वागत !
@ मीरा..
होय, स्नानाच्या अतीव आवडीबाबत आपण ट्विन्स ठरलो होतो !
किती मल्टिफंगशनल झाला आहे खादी शाम्पू - साबण, रूम फ्रेशनर, पेडीक्युअर, गारमेंट क्लिनर, किचन क्लिनर.... So versatile !
Liquid Soaps हे आता उन्हाळ्यात फार आवडतील वापरायला. सोबत आता ऑरगॅनिक लूफा मिळतात- ते वाळलेल्या घोसाळ्याचे/ गिलकीचे सुकलेले देह scrubber म्हणून वापरायचे. मजाच मजा !
अनिंद्य, तुमचे प्रत्येक लेख
अनिंद्य, तुमचे प्रत्येक लेख ही मेजवानी असते. नुसतीच माहिती नाही तर त्यात अनेक आठवणी, भावना, तरलता पण असते. हा लेख तर सुंगधाने भारलाय. सध्या आम्ही घरी खादी साबण वापरतो. लाईफबॉय पासुन पार लक्स, चंद्रिका, मेडीमिक्स, हमाम, मार्गो तसेच डव्ह वगैरे बरेच वापरुन झाले. सध्या तरी नवर्याला खादी पसंत आहे. माझा मात्र सगळ्यात जास्त आवडता साबण म्हणजे लिरील. उन्हाळ्यात तर धबधब्यात गेल्यासारखे वाटते लिरील मुळे.
मात्र तुमच्या लेखाचा शेवट खूप टचिंग आहे. खरच गहीवरुन आले.
आज परत एकदा लेख वाचला.
आज परत एकदा लेख वाचला. माझाही स्नानांतर तुमच्याप्रमाणेच घडलंय. रश्मी म्हणतेय तसं खूप तरल लिहीता तुम्ही आणि शेवट गहिवरुन टाकणारा.
@ रश्मी.
@ रश्मी.
कौतुकाच्या शब्दांबद्दल आणि तुमच्या शतकी प्रतिसादाबद्दल अनेक आभार. असे सुंदर प्रतिसाद इथे मिळतात म्हणून लिहिण्याचा उत्साह कायम राहतो.
@ मंजूताई
@ मंजूताई
माझं स्नानांतर तुमच्याप्रमाणेच घडलंय. ….
जय हो _/\_
लेख आवडला
लेख आवडला
छान
छान
मोती आणि मायसोर सँडलचे वास
मोती आणि मायसोर सँडलचे वास पूर्वी वेगळे होते, आता तेल वेगळे वापरतात बहुतेक
खूपच सुंदर लेख.
खूपच सुंदर लेख, अनिंद्य. अगदी लहानपण ची आठवण करुन देणारा.
मलाही आंघोळ अतीव प्रिय आहे. एकवेळ खायला नाही मिळालं तरी चालेल...... पण आंघोळ चुकता कामा नये .
आपल्या संस्कृतीत तर अंघोळीचे किती तरी संदर्भ आहेत.
कुणी बाहेर गावी निघालं.. तर तो गेल्या गेल्या लगेच घरच्यांनी अंघोळीला जायचं नसतं, ..भर दुपारी बारा वाजता आंघोळ नाही करायची, दिवाळीत अभ्यंग स्नानाला आंघोळीच्या आधी तेल, उटणे लावून ओवाळायचं व पुन्हा अंघोळ झाल्यावर बाथरुम मधेच औक्षण करायचं, लहान बाळाला पायावर पालथं झोपवून घातलेली आंघोळ.....
ते तुम्ही शेवटी लिहीलेली, दु:खद, मनात कळ उठविणारी आंघोळ....
हे सर्व वाचून मन मात्र अगदी शुचिर्भूत झालं...!
@ इच्चूकाटा,
@ इच्चूकाटा,
@ BLACKCAT
@ आंबट गोड
आभार.
... .भर दुपारी बारा वाजता आंघोळ..
त्याला आजोळी 'राक्षस स्नान' म्हणायचे आणि त्यावर कडक बंदी होती
अतिशय सुंदर लेख.
अतिशय सुंदर लेख.
लहानपणी केलेल्या बंबातल्या पाण्याच्या आंघोळीची आठवण झाली. त्यातल्या पाण्याचा खरपूस वास (आजच्या भाषेत स्मोकी फ्लेव्हर) हिवाळ्यात अगदी हवाहवासा वाटायचा.
सज्जनगडावर कधी राहिला असाल तर तिथे गरम पाण्यासाठी मोठे फायर गीझर्स असायचे, त्यातलं पाणी पण एकदम कडक असायचं. फक्त उशीरा उठलो तर मात्र गरम मिळायचं नाही; संपून जात असे. पण त्या उंच ठिकाणी थंडीत गरमागरम पाण्याने आंघोळ करून पहाटे काकड्याला गेलं की त्या सुंदर चालींनी आणि तिथे दरवळणार्या चंदन-धुपाच्या सुवासांनी मस्त झोप येत असे पुन्हा.
ट्रेकिंगला जाऊन आल्यावर केलेली आंघोळ ही एक स्पेशल आंघोळ सदरात घ्यायला हवी. चालून चालून पाय आंबलेले असतात. अजिबात उभंच राहवत नसतं. पण नखशिखांत घामात भिजून कोरडे झाल्यामुळे आणि चिखलाने माखल्यामुळे कधी एकदा आंघोळ करतोय असं झालेलं असतं. अश्या वेळी तापलेल्या अंगावरून थंडगार पाण्याचा शॉवर सोडला की सगळा शीण डोक्यापासून पायापर्यंत पाण्याबरोबर वाहत गेल्याचा अनुभव येतो.
टबातली आंघोळ पूर्वी फक्त सिनेमा/जाहिरातीतच बघितली होती. लहानपणी अंग मुडपून बादलीत बसून मी ती इच्छा त्यातल्या त्यात पुरवून घेत असे. पुढे खरोखर टबातली आंघोळ पहिल्यांदा केली ती एकदा सहलीला फिरायला गेलो असताना हॉटेलरूमवर. टब पाहून खूश झालो आणि मनसोक्त डुंबलो. त्यातलं पाणी सारखं गार होत असल्यामुळे पुन्हा पुन्हा नवीन गरम पाणी सोडत राहणे ह्या प्रकाराला वैतागलो. किंवा शरीर त्या तपमानाला सरावल्यामुळे कदाचित अजून अजून गरम घ्यावे असे वाटत असेल. अर्धा तास डुंबून बाहेर पडलो तेव्हा मला जवळपास ग्लानी आली होती. चक्कर येऊन पडतो की काय असं वाटून घटाघट पाणी (आंघोळीचं नाही, प्यायचं) प्यालो तेव्हा जरा बरं वाटलं. पण टबात आपल्या शरीराची घाण वाहून न जाता तिथेच राहते ह्या विचाराने पुढे फार कधी आवडीने ती केली नाही.
सध्या शॉवरनेच आंघोळ करत असलो तरी अजूनही मला बादलीतून पाणी घेऊन केलेली आंघोळ जास्त आवडते. बादली आणि तांब्या दोन्ही धातूचे हवे. मग तो तांब्या पाण्यात बुडवताना बुडुक बुडुक आवाज येतो, त्यातून पाणी घेऊन भस्स्कन अंगावर, तोंडावर मारल्यावर जे काही वाटतं, ते शॉवरच्या तुषारांनी वाटत नाही. शिवाय आंघोळ संपत आल्यावर थोडं पाणी मुद्दामून बादलीत ठेवायचं असतं आणि सगळ्यात शेवटी बादली उचलून डोक्यावर ढास्स्स्स्कन उलटी करून ते पाणी अंगांगावर आदळल्यावर जो मज्जा आता है ना, उसको उपमाच नहीं.
हपा, मस्त पोस्ट. अंघोळ अनुभव
हपा, मस्त पोस्ट. अंघोळ अनुभव मस्त लिहिले आहेत.
मला अंघोळ अतिशय आवडते, त्यामुळे मी या धाग्यावर रेंगाळत असते.
(शॉवर्स, टब्ज, मंद वासाचे साबण, शॅम्पू, लुफा, मऊ टर्किश टॉवेल, अंघोळीशी संबंधित कॉस्मेटिक्स याचं मला obsession आहे. )
आंघोळ न आवडणारे पण कुणी असते
आंघोळ न आवडणारे पण कुणी असते का?
(मला खरंच असा प्रश्न पडलाय म्हणून विचारले)
असतात की.
असतात की.
(No subject)
नावड नाही पण कंटाळा असणारे
नावड नाही पण कंटाळा असणारे असतात
@ हरचंद पालव,
@ हरचंद पालव,
अगदी बरोबर ! टबबाथ चा बेसिक रूल - हायड्रेट बिफोर अँड रीहायड्रेट आफ्टर ! नाहीतर शरीरातील पाणी कमी होऊन घाबरायला होते. तसेच जास्त वेळ गरम पाण्यात डुंबलात तर त्वचा overexfoliate होणार नाही याचीही काळजी घ्यावी.
लय आवड म्हणून मी बाथटबची सोय असलेले घर घेतले आणि दैव असे की मी त्या टबात मावत नाही
.... शेवटी बादली उचलून डोक्यावर ढास्स्स्स्कन उलटी करून ते पाणी अंगांगावर आदळल्यावर.... येस्स.
ह्याला +१
नावड नाही पण कंटाळा असणारे
नावड नाही पण कंटाळा असणारे असतात...
होय, अनेकांना तर बळजबरीने बाथरूम मध्ये ढकलावे लागते रोजच्या अंघोळीसाठी
लय आवड म्हणून मी बाथटबची सोय
लय आवड म्हणून मी बाथटबची सोय असलेले घर घेतले आणि दैव असे की मी त्या टबात मावत नाही >> दात आहेत पण चणे नाहीत किंवा चणे आहेत पण दात नाहीत
मी जिथे हिथे सुट्टीला जाते
मी जिथे हिथे सुट्टीला जाते टब वाली रूम सिलेक्ट करत असते. सिंगापूर ला तर इतके मस्त कलोनिअल टाइपचे हॉटेल आहे. तिथे खोली एवढी बाथरूम व भलामोठा लांब रुंद टब. सर्वइलेक्ट्रोनिन्क कंट्रोल्ड. म्हणजे तुम्ही समजा आत झोपलात तर पाणी सोडले तर तुमच्या डोक्याच्या वर जात नाही. तेव्हा श्रीदेवी नु कती वारलेली होती म्हणून लगेच ट्रायल घेउन बघितली. सहा फुटी माणूस पण हायटेक टबात बुडू शकत नाही. अनलेस दे आर ड्रंक.
मृ - https://youtu.be
मृ - https://youtu.be/JYyEYv2HeNo?t=38
भारीए आयडिया पाणी वाचवायची
भारीए आयडिया पाणी वाचवायची
Pages