त्रास होतो... त्रास नुसता (विडंबन)

सर्व माबोकरांची माफी मागून वैभवच्या मोठ्ठ्या वृतातल्या उच्च गझलेचे हे विडंबन

अताशा काव्य इथले वाचण्यातच वेळ जातो... त्रास होतो... त्रास नुसता
अखेरी हेच जाणवते पुरे आहे... जुन्या कविता, कविंचा भास नुसता

तुझा थरकाप नाही होत का पाहून तंट्यांची अशी बेफाम संख्या
मला तर कोणत्याही बाफ़वर जाताच दिसतो द्वेष अन दु:स्वास नुसता

तुम्ही कित्येक कविता पाडल्या पण वाचले नाहीच मी त्यांना कधीही
कशाला घ्या शिताचीही परीक्षा जर भयंकर येत आहे वास नुसता

अशाने काय होते की लिहावे, ना लिहावे स्पष्ट काही कळत नाही
कुणी ग्रूपामधे म्हणते, कुणी म्हणतेय ग्रुपमध्ये... कसा *बकवास नुसता

कधीचा पारल्यावरती **दबा धरुनीच बसलेलो बघाया खाद्यजत्रा
अरे खादाड अक्कांनो तुम्ही नैवैद्य म्हणुनी खा... खिमा फर्मास नुसता

असे होते, असे होतेच बाबांनो असे वेडेच करते मायबोली
असे तोंडात येते ’धन्स’ अन जगण्यात मा.बो. चा नशीला ध्यास नुसता

तुझे काही खरे नाही... ’मिल्या’ आता तरी थांबव असे वाह्यात चाळे
तुलाबी खायला लागेल बर्फी उंबराची... व्हायचा उपवास नुसता

* बकवास हा शब्द पोर्तुगिज भाषेतून मराठीत आला असून त्याच्या लिंगनिश्चिती बाबत कुठलेही नियम फ. क्ष. दामले ह्यांच्या व्याकरण विषयक पुस्तकात सापडले नाहीत...
आमच्या ’शुद्धेली’ गावातल्या शोनुल्या गल्लितल्या चाफेकर वाड्यातले लोक हा शब्द पुल्लिंगीच चालवतात

** द चा ’ड’ करू नये. अर्थ बदलू शकतो