मुळ्याचा ठेचा/चटका

Submitted by योकु on 27 March, 2015 - 11:58
लागणारा वेळ: 
२० मिनिटे
लागणारे जिन्नस: 

- दोन मध्यम आकाराचे मुळे, फार जून नकोत
- ५/८ तिखट हिरव्या मिरच्या
- पाव लहान चमचा हळद
- मीठ
- तेल
- मोहोरी
- जरासा हिंग
- थोडी बारीक चिरलेली कोथिंबीर

क्रमवार पाककृती: 

- मुळे धूवून कीसून घ्यावेत
- मिरच्या धूवून अगदी बारीक चिराव्यात. मिक्सरमध्ये नकोतच.
- चमचा - दीड चमचा तेल तापवावं. त्यात मोहोरी घालावी.
- तडतडली की चिमूटभर हिंग घालावा. लगेच बारीक चिरलेल्या मिरच्या घालाव्यात.
- जरा परतून मुळ्याचा कीस घालावा. परतावं.
- मीठ घालावं चवीपुरतं.
- झाकण ठेवून वाफेवर मुळा शिजवावा.
- ठेचा/चटका तयार आहे.
- वर थोडी कोथिंबीर पेरावी.
- हवं असल्यास वर लिंबू पिळावं.

वाढणी/प्रमाण: 
आवडेल तसं. मुळा आहे...
अधिक टिपा: 

- मुळा शिजवल्यानी अजिबात दर्प राहात नाही.
- हा चटका बर्‍यापैकी तिखट हवा तरच मजा येते. त्यामुळे मिरच्या घालण्यात कंजूषी करू नये.
- आपण डबा उघडला की बाकी लोक धारातीर्थी पडत नाहीत.
- लाल तिखट घालू नये. रंग बिघडतो.

माहितीचा स्रोत: 
आजी
पाककृती प्रकार: 
Group content visibility: 
Public - accessible to all site users

वा.
आजी याला 'मुळ्याचा आळस' म्हणायची. का माहित नाही. कायतरी फोबियामुळे लहानपणी खाल्ला नाही. करू आता.

मुळ्याचे सगळे प्रकार फार आवडीचे आहेत. या प्रकाराला आम्ही मुळयाची कोशिंबीर म्हणतो आणि चटका मात्र थोडा वेगळा करतो पण. त्यात भरड वाटलेली हरभर्‍याची डाळ घालतो. आणि दही ऑप्शनल.

आमच्यात कोशिंबीर म्हणजे मुळ्याच्या किसावर हे वर दिलेली फोडणी, कोथिंबीर, दाकु आणि दही/लिंबाचा रस यातलं एक. चटका म्हणजे भिजवलेली ह.डाळ वाटून मुळ्याच्या किसात मिक्स करायची. दोन्हीत मुळा कच्चाच ठेवायचा.

आमच्याकडे पण मुळ्याचा चटका आणि कोशिंबीर सिंडरेलानी दिलेल्या रेसिपीनी होतं.

योकुंनी वर दिलेली रेसिपी मुळ्याची परतून भाजी म्हणून केली जाते. हीच भाजी जरा जास्त परतून, म्हण्जेच पाण्याचा अंश अजून कमी करुन , कणकेच्या पारीत सारण भरुन पराठे होतात. कधी ह्या भाजीत मावेल एव्ढी कणीक घालूनही पराठे करते.

पण काहीही म्हणा, मुळा शिजवला की भारी वास सुटतो. योकूंना बिनवासाचा मुळा मिळाला का?

आमच्याकडे मुळा गोल चकत्या करुन खातात. किंवा, किसून कोशोंबीरीत घालतात, किंवा तमिळ पद्धतीचा सांबार केला की त्यात मुळा घालतात. मला सांबारातील मुळा जास्त आवडतो. मस्त पारदर्शक शिजतो.

मी मुंबईला राहायचे तिथे त्या काकू मुळ्याच्या पानांची मस्त भाजी करायच्या. भिजलेली डाळ घालून पानांची भाजी मस्त लागते.

मला चटका म्हणजे आंब्याची(कैरीची) डाळ करतात तशीच सेम कच्या मुळ्याची करतात आणि त्यात लिंबू पिळतात हेच माहिती होतं.

अरे हो, चटक्यात आम्ही पण कच्चा मुळाच घालतो. हळद घालून केलेल्या कोशिंबीरीला मात्र वाफवून घेतो. दह्यातल्या पांढर्‍या कोशिंबिरीला पुन्हा कच्चाच. Proud
बी, मुळ्याच्या चकत्या मला पण आवडतात जेवणात. दहाएक मिनीटं त्या मीठ घातलेल्या पाण्यात ठेवायच्या खायला घेण्याआधी.

शुगोल, तुम्ही भिजवलेली मुगाची डाळ घालता का भाजीत? >>>सिंडरेला, हो !

बहीणीच्या घरी भिजवलेली ह. डाळ घालतात किंवा डाळीचे पीठ लावतात.

मी असाच करते. मला हा नुसता खायलाही आवडतो. पण मी लाल तिखट घालते.

मुळा किसल्यावर पिळून पाणी काढून टाकते. म्हणजे तर अजिबातच दर्प येत नाही.

मुळ्याच्या पानांची भाजी (भिजवलेली मूगडाळ घालून) - तोंपासु.

बी, मुळ्याच्या चकत्या मला पण आवडतात जेवणात. दहाएक मिनीटं त्या मीठ घातलेल्या पाण्यात ठेवायच्या खायला घेण्याआधी.>> करुन बघेन. धन्स बिल्वा.

योकु , आम्ही अशी कोशिंबीर करतो. शेंगदाण्याचा कुट घालून . पण मुळा न परतता. मुळा परतला म्हणजे मग ती भाजी झाली ना?

आमच्यात कोशिंबीर म्हणजे मुळ्याच्या किसावर हे वर दिलेली फोडणी, कोथिंबीर, दाकु आणि दही/लिंबाचा रस यातलं एक. चटका म्हणजे भिजवलेली हडाळ वाटून मुळ्याच्या किसात मिस्क करायची. दोन्हीत मुळा कच्चाच ठेवायचा.>>> +१

हडाळ व दाणे भिजत घालून वाटायचे त्यात दही मीठ साखर वरुन हिंग व लाल तिखटाची फो त्याला आम्ही चटका म्हणतो... ही भाजी वाटतेय करुन पाहण्यात येईल... सांबारातला मुळा छान लागतो...

अशा शिजवलेल्या मुळ्यात मी कणीक घालून पराठे करते Happy शुगोल +१.
चटका म्हणजे मानुषीताईंनी लिहिलाय तसा करते.

>> चटका म्हणजे भिजवलेली हडाळ वाटून मुळ्याच्या किसात मिस्क करायची. >> हे आधी मी हडळ वाचल.. हडाळच्या ऐवजी. म्हटल ही फारच शूर आहेत मंडळी Lol

Pages