Submitted by मिल्या on 23 February, 2015 - 01:57
मी जगतो त्या आयुष्याची मजाच न्यारी
सावजही मी, मीच बाण अन् मीच शिकारी
रोज मनाच्या खिडकीवरती टकटक करतो
देह जणू हा सिग्नलवरचा कुणी भिकारी
फुटो पाहिजे तितक्या वाटा ह्या रस्त्याला
नेतीलच त्या फक्त तुझ्या अन् तुझ्याच दारी
तो आला, पोहला, पोचला पैलतिरावर
केव्हाचा अदमास घेत मी उभा किनारी
अर्ध्या रात्री जो रस्ता अंगावर येतो
अंग चोरुनी बसला असतो तोच दुपारी
अपुल्यामध्ये सेतू येईलही बांधता
पसार कोठे झाल्या पण मौनाच्या खारी
सूर्य, चंद्र, तार्यांची येते दया मला तर
कैद्यांना येइल का घेता कधी भरारी?
शब्दांच्या काही पारंब्या मनात रुजल्या
अर्थ कोणते बघू तरी घेतात उभारी
मिलिंद छत्रे ( 18 - 02 - 15 )
Groups audience:
Group content visibility:
Public - accessible to all site users
शेअर करा
मस्त!!
मस्त!!
सर्वांगसुंदर गजल - खूपच
सर्वांगसुंदर गजल - खूपच आवडली...
रोज मनाच्या खिडकीवरती टकटक करतो
देह जणू हा सिग्नलवरचा कुणी भिकारी >>>>>> विशेष आवडले
सुंदर
सुंदर
सूर्य, चंद्र, तार्यांची येते
सूर्य, चंद्र, तार्यांची येते दया मला तर
कैद्यांना येइल का घेता कधी भरारी?
शब्दांच्या काही पारंब्या मनात रुजल्या
अर्थ कोणते बघू तरी घेतात उभारी<<<
व्वा मिलिंद! तुमच्या ह्या खालील शेरावरून
>>>रोज मनाच्या खिडकीवरती टकटक करतो
देह जणू हा सिग्नलवरचा कुणी भिकारी<<<
मला माझा एक जुना शेर आठवला.
चौकामध्ये गाडी पुसुनी टकटक करते पोर भिकारी
खिशातून रुपया काढेतो लाल बावटा राहत नाही
तो आला, पोहला, पोचला
तो आला, पोहला, पोचला पैलतिरावर >>>>>.
मस्त climax साधलत .
गझल आवडली.
क्या बात है... संपूर्ण गझल
क्या बात है...
संपूर्ण गझल आवडली.
भिकारी हा शेर तर खूप बढिया.
धन्यवाद सर्वांना
धन्यवाद सर्वांना