रंगीत पेन्सिल्स - फ्लेमिंगो आणि ब्ल्यू आयरीस

सर्वांना येणार्‍या नववर्षाच्या शुभेच्छा!

घरात रेखाटलेली चित्रे, सरावचित्रे बरीच जमली होती. त्यांना रद्दी म्हणून कचर्‍यातही टाकवेनात आणि उपयोगही काय करावे कळेना. कच्ची रेखाटने, अर्धवट राहिलेली चित्रे, मनासारखी न झालेली चित्रे फाडून टाकली. पण तरीही पुष्कळ स्केचेस उरली. लहान, मोठी सर्व प्रकारची. मग म्हटले बघावे कुणाला ही चित्रे अशीच हवी असतील तर देऊन टाकू, त्याचे त्यांनी पुढे काय करावे हे मलाही माहित नव्हते आणि दिल्यावर माझ्यापुरता विषय संपणार होता. काही का करेनात! म्हणून फेबुवर Giveawayची पोस्ट टाकली आणि गंमत म्हणजे धडाधड चिकार मेसेजेस आले. एकजण म्हणाली मी व्हेट कडे काम करते, तुझ्याकडे कुत्र्यामांजरांची काहीही असली तरी मला चालतील. दुसरी म्हणाली फिलीपिन्समधल्या माझ्या गावातल्या शाळेच्या बोर्डवर ही लावता येतील. बर्‍याच जणांनी नुसतीच आवडली असे आवर्जून सांगायला मेसेजेस केले. नेबरहुड्मधल्या एका आजींनी सांगितले मला सगळी हवी आहेत! मग काय मला बरेच झाले, त्या आजींना जवळच्या पार्कात भेटले आणि दिली सर्व चित्रे. छान ओळख, गप्पा झाल्या. मी विचारले की तुम्ही काय करणार आहात यांचे? तर म्हणाल्या हे बघून मला स्वतःला स्केचींग ट्राय करायला आवडेल, पूर्वी करत होते. काही मी घरात लावीन.
दुसर्‍या दिवशी आजींचा मेसेज आला की वर्क कमिशन करशील का? डिसेंबरात ख्रिसमसला मी बहीणीकडे जाणार आहे, ती ओरेगनमध्ये राहते. तिला फ्लेमिंगो आणि निळी आयरीस फुले या दोन गोष्टी फार आवडतात, तर या दोन गोष्टींची स्केचेस करुन देशील का?
म्हणून मग ही दोन चित्रे केली. आजींना फारच आवडली. मी ट्रेस पेपरने प्रोटेक्ट करुन दिली, फ्रेमवर्क आजी करुन घेणार होत्या.
कमिशनिंगचा सध्यातरी इरादा नाही, हे छंदापुरतेच सिमित आहे. पण आलेला अनुभव एकदम छान होता आणि आश्चर्यकारक.
स्ट्रॅथमोर या पेपर ब्रँडच्या ६ बाय सहा च्या जाड कागदाच्या चौकोनी टाईल्सचा एक सेट अलिकडे घेतला होता. त्यावरच ही चित्रे काढली. कागद जाड असल्याने, ही चित्रे नुसतीच आर्ट किंवा वाशी टेपने किंवा पिन्स ने डार्क सॉफ्ट बोर्डवर लावली की सुद्धा छान दिसतात. माझी काही चित्रे मी घरात हल्ली तशीच लावते. पुढच्या गिव्हअवेमध्ये त्यांचा नंबर लागेल

Strathmore 300 series artist paper tile.
Faber Castell Polychromos colored pencils.
Amazon Basics HB pencil.

Orange Serenity

Iris Elegance

अलिकडील चित्रे:
रंगीत पेन्सिल्स - Killdeer: https://www.maayboli.com/node/87355
रंगीत पेन्सिल्स - Wings of Sapphire (Blue bellied Roller): https://www.maayboli.com/node/87286