The Ba***ds of Bollywood - द आर्यन (शाहरुख) खान शो!

The Ba***ds of Bollywood - द आर्यन (शाहरुख) खान शो!

जेव्हा शाहरुखने आपल्या मुलाचे नाव आर्यन ठेवले तेव्हापासून मी आर्यनला ओळखत आहे. शाहरुख प्रचंड आवडीचा. अपवादानेच त्याचा एखादा चित्रपट बघितला नसावा. तरी एका हिंदु-मुस्लिम जोडप्याने आपल्या मुलाचे नाव आर्यन ठेवावे याचे कौतुक वाटण्यापलीकडे तो मुलगा काय कसा आहे याची फार कल्पना नव्हती. मध्यंतरी ड्र्ग्स केसमध्ये तो अडकला तेव्हाही त्याच्याबद्दल फार जाणून घ्यावेसे वाटले नाही. किंबहुना त्यावरून त्याला जज न करता शाहरुख या बापाबद्दल वाईट वाटले होते. थोडक्यात लाडक्या बापाचीच पहिली इनिंग संपली नसल्याने त्याच्या मुलाबद्दल शून्य उत्सुकता होती.

पण, काल त्याच मुलाने, आर्यन शाहरुख खानने दिग्दर्शित केलेले जे काही पाहिले त्यानंतर ईतर कश्यापेक्षाही त्याच्या पुढच्या प्रोजेक्टची उत्सुकता जास्त राहील.

खरे तर गेले काही दिवस त्याच्या रील बघण्यात येत होत्या. त्यात तो शाहरुखचीच फर्स्ट कॉपी वाटावे असे संवाद म्हणत होता. ते पाहून म्हटले याची अवस्था अभिषेक बच्चनपेक्षा वाईट होणार. अभिषेक एक गुणी कलाकार असूनही त्याची नाहक अमिताभशी तुलना होणे त्यावर अन्यायकारक ठरले होते. आणि हा जर शाहरुखचीच शैली घेऊन अभिनेता बनायला जाणार असेल तर फार वाईट पद्धतीने तोंडावर आपटेल.

पण तेव्हा मला याची कल्पना नव्हती की त्याचे खरे क्षेत्र तर दिग्दर्शन आहे. आणि काय पहिल्याच चेंडूवर षटकार मारावे किंवा पहिल्याच सामन्यात शतक झळकवावे अशी कामगिरी केली आहे त्याने.

सात एपिसोडची मालिका, रात्री बघायला घेतली. म्हटले तीन-चार एपिसोड आज बघू आणि शिल्लक उद्या.. पण रात्रभर रिमोट हातात घ्यावासा वाटला नाही. सकाळी साडेसहा वाजता पुर्ण संपवूनच सोफ्यातून ऊठलो. एकीकडे पहाटेचे उजाडत होते तर दुसरीकडे एक नवीन स्टार उदयास येत आहे असे फिलींग आले.

स्टोरी म्हटले तर दोनचार ओळींची आहे. ती सांगून पोपटाचा जीव घेत नाही. पण नेपोकिड आणि आऊट सायडर यांची लव्हस्टोरी आहे समजा. सॉरी समजू नका, तीच स्टोरी आहे आणि ती ज्या पद्धतीने प्रेझेंट केली आहे ते कमाल आहे. म्हटले तर हटके आहे, म्हटले तर तेच आपले मसाला मूवी मटेरीयल आहे. पण फुल्ल ऑन एंटरटेनमेंट आहे. आणि या उद्दीष्ट्यापासून एका मिनिटभरासाठी चित्रपट हलत नाही.

चित्रपटात करण जोहरने करण जोहरचाच रोल केला आहे. त्याच्याकडून आर्यनला दिग्दर्शनाच्या टिप्स मिळाल्या असतीलच. पण दिग्दर्शनावर करणचा प्रभाव जाणवत नाही. कारण तो जाणवला असता तर वेगळेपण जाणवले नसते. ते वेगळेपण आर्यन स्वतःच घेऊन आला असण्याची दाट शक्यता आहे.

दिग्दर्शनच नाही तर कथा, पटकथा, संवाद सगळीकडे आर्यन खानचे नाव आहे. आणि संवाद कमाल आहेत. कित्येक पंचलाईन आहेत. तर कित्येक एपिसोड अश्याच एखाद्या पंचलाईनवर संपतात.

फक्त थोडी शिवीगाळ कमी करता आली असती तर फॅमिली चित्रपट झाला असता. हल्ली फॅमिली वेबसिरीजचे निकष सुद्धा बदललेच आहेत म्हणा, पण ते लाऊनही जरा जास्त वाटल्या. त्यातही Ass hole हा शब्द ईतके वेळा ऐकला की Ba***ds of Bollywood देखील मी Bad Ass of Bollywood असे वाचू लागलो

पण त्यातल्या त्यात एक चांगले म्हणजे अश्लील शब्दांचा किंवा संदर्भाचा वापर विनोद निर्मिती करायला फारसा केला नाहीये. ते अजून वल्गर वाटते. यात ते एक कल्चर म्हणून येताना दाखवले आहे. कदाचित बॉलीवूडचे कल्चर तसेच असावे. आणि हो, अंगप्रदर्शन बिलकुल नाही. त्यामुळे हेडफोन लावून बघितल्यास फॅमिली मूव्ही आहे

अभिनय सगळ्यांचेच मस्त. मला उगाच वाटत होते की यात काही नेपोकिडस सहन करावे लागतील. पण तसे काही नाहीये. हिरो-हिरोईन फ्रेश आहेत. हिरोईन सुंदरच नाही तर चांगला अभिनय करणारी आहे. हिरोचा मित्र झालेला राघव जुयाल याला फक्त डान्स शो मध्ये बघायचो, त्यात तो त्याच्या स्लो मोशन डान्ससाठी फार प्रसिद्ध आहे. त्याला ईतका उत्स्फुर्त अभिनय करताना बघणे सुखद धक्का होते.

पहिल्या की दुसऱ्याच एपिसोडमध्ये समीर वानखेडेचा संदर्भ आला आहे. त्याची जरा खेचली आहे. त्या वादाची पार्श्वभूमी माहीत आहे, पण फार डिटेलमध्ये कोण चूक कोण बरोबर याची कल्पना नाही. त्यामुळे त्यावर नो कॉमेंट्स. ईतरही काही ठिकाणी असे स्पूफ आणि काही बॉलीवूडवरच टोमणे आढळतील, पण तुम्ही कान नाक डोळे उघडे ठेवायचा लोड न घेता पिक्चर एन्जॉय करा.

शाहरुखच्या मुलाचा चित्रपट आणि बॉलीवूडचाच विषय असल्याने त्यात कॅमिओ करणार्‍यांची लिस्ट अभिनेत्यांपेक्षा मोठी होईल ईतकी आहे. ती फोडत नाही. उत्सुकताच असेल तर गूगल करू शकता. पण एक नाव फोडायला हरकत नाही आणि ते म्हणजे खुद्द शाहरुख खान!
तो सुद्धा हजेरी लाऊन गेला आहे आणि त्याने आपल्या नेहमीच्याच स्टाईलमध्ये स्वतःवर विनोद आणि स्वतःचे कौतुक, असे दोन्ही करून घेतले आहे.

लॉर्ड बॉबी देओल यात हिरोईनचा बाप आणि मागच्या पिढीचा सुपर्रस्टार दाखवला आहे.
एकेकाळी बॉबी देओल असा रोल करतोय हे हास्यास्पद वाटले असते. आता या रोलसाठी त्याच्यापेक्षा बेस्ट कोणी असूच शकत नाही असा त्याच ऑरा झाला आहे.

कास्टिंगचे जसे फुल मार्क्स बॉबी देओलला जातील तेवढेच अर्शद वारसीच्या गफूरला मिळायला हवे. या भुमिकेसाठी एकीकडे विश्वासार्ह वाटावी अशी भाईगिरी आणि त्याचवेळी पिक्चरच्या जॉनरला जागत संवादात थोडा ह्युमर असे दोन्ही आणायचे होते. अर्शदची त्यात मास्टरीच आहे. त्याच्या एंट्रीला आणि नंतरही तो पडद्यावर आल्यावर "गफूsर" म्हणून गाणे/बॅकग्रांऊड म्युजिक वाजते ते सुद्धा मला आवडले.

शेवटचा ट्विस्ट बघून डोके भंजाळून जाते. त्यावर सगळ्यांनी पाहिल्यावर वेगळी चर्चा होईल.
त्यावर दुसऱ्या बाजूने देखील अजून एक ट्विस्ट येत तो प्रॉब्लेम सुटलेला दाखवतील असे वाटले होते पण तसे काही झाले नाही. पब्लिकला हॅपी एंडिंग आणि सगळ्या गोष्टी जागच्या जागी जुळून आलेल्या बघायची सवय लागली आहे. पण प्रत्यक्षात लाईफ तसे नसते. ते दि एण्डच्या पाटीसोबत संपत नाही तर पुढेही चालूच राहते.

पण एक आहे, तो शेवटाचा ट्विस्ट आवडो न आवडो, पटो न पटो, जर तुम्ही फिल्मी किडे आहात तर ही सिरीज तुम्हाला नक्की आवडेल.

मी ब्रिन्ज वॉच करत बघितल्याने एखादा छान पाच तासाचा पिक्चर बघितल्यासारखे वाटले. ते देखील कंटाळा न येता. कारण पिक्चर असावा तशीच वेगवान सिरीज आहे. उगाच ताणून खेचून मोठमोठे तासाभराचे आठ दहा भाग आणि सीजन वन टू करत बसले नाहीयेत. बरेचसे सीन टाळ्या अन शिट्टया याव्यात असे आहेत. जे थिएटरमध्ये बघायला सुद्धा मजा आली असती. थोडक्यात आर्यन खान चित्रपट दिग्दर्शन करायला सुद्धा तयार आहे. त्यामुळे दोन्ही बापलेकांचा एकत्र चित्रपट, म्हणजे "स्टारींग शाहरुख खान अँड डायरेक्टेड बाय आर्यन खान" लवकरच बघायला आवडेल.

- ऋन्मेऽऽष

इतरत्र प्रकाशित