सुरती पनीर घोटाला

Submitted by लंपन on 7 March, 2022 - 08:29
प्रत्यक्षात लागणारा वेळ: 
१५ मिनिटे
लागणारे जिन्नस: 

पनीर - २00 ग्रॅम ग्रेट करून
३ मोठ्या आकाराचे टोमॅटो बारीक चिरून
भोपळी मिरची (मध्यम) - २ बारीक चिरून
३ ते ४ अमूल चीज क्यूब ग्रेट करून
पावभाजी मसाला - १ १/२ टे स्पून
काश्मिरी लाल तिखट - १ टे स्पून
गरम मसाला - १ टी स्पून
कसुरी मेथी - १ टे स्पून
टोमॅटो केचप - २ टे स्पून
धणे जिरे पावडर - १ टे स्पून
बटर - १ टे स्पून
तेल - फोडणीसाठी अंदाजानुसार
पाणी - एक ते दीड वाटी (आमटीची वाटी)
हिन्ग, हळद, मीठ चवीनुसार

क्रमवार पाककृती: 

कढईत तेल घ्या. तेल तापले की त्यात हिन्ग, हळद व बारीक चिरलेला टोमॅटो आणि भोपळी मिरची टाका. २ मिनिटानंतर त्यात सगळे मसाले टाका, बटर टाका आणि मीठ टाका. तेल सुटू लागले की त्यात पनीर टाका. नन्तर पाणी टाका. एक वाफ काढून त्यात किसलेले चीज टाका. २ मिनिटे वाफ काढा. घोटाला तयार Happy

हा घोटाला मसाला पाव बरोबर मस्त लागतो. त्यासाठी लादी पाव घ्यावा. तव्यावर बटर टाका, बटर वितळले की त्यात थोडे काश्मिरी लाल तिखट आणि कोथिंबीर टाका. पाव मधून कापून ह्या मिश्रणावर दोन्ही साईडने शेकून घ्या.

Paneer Ghotala .jpg

वाढणी/प्रमाण: 
३-४ जणांसाठी
अधिक टिपा: 

ह्यात कांदा अजिबात घालायचा नाहीये. टोमॅटो केचप टाकायचेच आहे. मसाला पावाबरोबर फारच मस्त लागतो. मूळ कृतीमध्ये जिरे घातले जातात फोडणीत, पण जिर्याशिवाय चव जास्त चांगली लागली.

माहितीचा स्रोत: 
युट्युब वरचे गुजराती फूड चॅनेल्स खासकरून Dharmis Kitchen
पाककृती प्रकार: 
प्रादेशिक: 
शब्दखुणा: 
Group content visibility: 
Public - accessible to all site users

रविवार सकाळ

उठावे , असे खावे , पुन्हा गुड नाईट

मस्तच दिसतोय रे हा घोटाला!
सविस्तर रेसिपी आणि छान फोटो Happy

भोपळी मिरची म्हणजे ढोबळी मिरची हे कळले पण पनीर ग्रेट करणे म्हणजे किसणे का ?

छान दिसतोय घोटाला.
पाककृतीत जिन्नस टाकू नका. घाला.

आज स्विगीवरून पोंक वडा मागवला. छान आहे. तुमच्या फोटोतले जास्त कुरकुरीत वाटताहेत.

धन्यवाद लोक्स _/\_ ब्लॅककॅट Happy आबा हो रे किसून घेणे. भरत धन्यवाद, सूचना लक्षात ठेवेन. पोंक वड्याच्या काही रेसिपीत सोडा नव्हता (मी घातला होता), कदाचित मूळ पाकृ मध्ये नसेल सोडा, म्हणून कुरकुरीत नसतील. मैत्रेयी, हो कांदा लसूण काही नाही. सिंड्रेला हो ह्यात पाभा मसालाच घालायचा आहे, चव भन्नाट आहे आणि खूपच कमी खटपट आहे. जाई, अमित, वर्णिता, मृणाली अन वावे धन्यवाद.

हा पदार्थ कायम बनवला जातो. फक्त आम्ही याला आम्ही पनीर भुर्जी/बुर्जी म्हणतो. गरमागरम पराठे आणि भुर्जी आठवड्यातील एक लंच असतंच.
(फक्त यात केचप घालत नाही कारण गोडसर चव आवडत नाही. पनिरच्या पदार्थात हिंग घालत नाही. आणि एक वाटी पाणी लिहिलं आहे ते सुद्धा अजिबात घालत नाही. पनीर आणि टोमॅटोच्या अंगच्या पाण्यात छान शिजतं. वरून पाणी घालुन चव कमी होईल असं वाटतं)

पनीर भुर्जीत कांदा असतो ना? >>> हो असतो. पण यांच्या रेसिपीमधे स्कीप केला आहे तरी हरकत नाही.
पण फोडणीत हिंग आणि शिजताना पाणी या ऍडीशन्स मात्र अजिबात चालत नाहीत. पनीरला वरून अजुन पाणी म्हणजे चव पांचट होईल का असं वाटतं आहे.

भुर्जी कोरडी थोडी लसलशित असते हे पावभाजिसारख थोड पळिवाढ दिसतय त्यामुळे त्याला पाणी /दुध्/क्रिम अस काहितरी लिक्विड लागेलच..
छान प्रकार आहे.

सामो, डीजे, अंजू, मीरा, सीमंतिनी, प्राजक्ता, सोनाली, पराग धन्यवाद. सीमंतिनी हो थोडी गोडसर चव येते केचपमुळे. मीरा पनीर भुर्जी मध्ये नाही पाणी घालत आपण पण ह्यात चीज आहे आणि टोमॅटो न ढोबळी मिरची पण आहे त्यामुळे फार पातळ किंवा पाणचट नाही होत अजिबात. नक्की अशाप्रकारे करून बघा, आवडेलच.

फक्त यात केचप घालत नाही कारण गोडसर चव आवडत नाही. पनिरच्या पदार्थात हिंग घालत नाही. आणि एक वाटी पाणी लिहिलं आहे ते सुद्धा अजिबात घालत नाही. >>> जर हे सगळे घातले तर तुम्ही तयार होणाऱ्या पदार्थाला भुर्जी/बुर्जी न म्हणता घोटाला म्हणू शकता Happy

येस्स! ये आपुनको पता हय! इकडे सुरतची रेस्टॉरंट चेन आहे. तिथे हा प्रकार पहिल्यांदा खाल्ला.. अफलातून लागतो. फक्त इथे ते खरपूस भाजलेले स्लाईस ब्रेड देतात.
गोटाला वर भ र पू र बटर मारतात, अगदी तवंग आलेला असतो. मी युट्युबवर बघून मग घरी ट्राय केला. त्याप्रमाणे त्यात हिरवी मिरची पेस्ट घातली होती. मस्त चव लागते त्याची पण.
अंडा गोटाला सुद्धा ट्राय करा. सेम हीच पद्धत. फोटो भारी आलाय Happy

सामी, देसाई, अंजली धन्यवाद. देसाई, वावे तुम्ही रेसिपी ट्राय केली आणि तुम्हाला घोटाला आवडला हे वाचून छान वाटलं Happy अंजली रेसिपी बघून ठेवली आहे अंडा घोटालाची Happy

Pages