भगर (वरईचे तांदूळ) + आमटी - Bhagar

भगर करताना मी कोकमां ऐवजी ताक घालते.खरंतर कधी लक्षात आले नव्हते की कोकम घालावे म्हणून.फोडणीत कढीलिंब घालते,त्याचा वास नी स्वाद चांगला येतो .
बाकी दाण्याच्या आमटीच्या रेसिपीकरिता धन्यवाद!

आमटी भगर गरम गरम करावी आणि मटकावून मोकळं व्हावं गार भगर चांगली लागत नाही>> अगदी अगदी! माझ्या चविला मी जरा आसटच आणी थोडी तिखटसरच करते भगर, आमच्याकडे सासरी बरोबर दह्यातली आमटी करतात.

आमच्याकडे भगरीत बटाटा घालत नाहीत पण साईडला बटाट्याची उपासाची भाजी मस्तच लागते.

मस्त मस्त.

ह्याला आम्ही फोडणीचे वरीचे तांदूळ किंवा वरीची उपासाची खिचडी म्हणतो आणि सोबत ही दाण्याची आमटी . वरीच्या खिचडीत बटाटा नाही घालत त्याऐवजी आम्ही दाण्याच्या आमटीत घालतो, उकडलेला बटाटा.

उपवासाची आमटी ताकाची करतात

मी प्युअर व्हाइट भगर पक्षी व र्‍याचे तांदूळ. दाण्याची आमटी, चिंच घालून . पुणेरी असल्याने कोकम थिंग इज नॉट देअर इन माय किचन.
सोबत उपासाची बटाट्याची भाजी. बरोबर गुड क्वालिटी दही किंवा काकडी ची दह्यातली कोशिंबीर. मी उपासतापास नाही करत. एकाद्या दिवशी
मूड आला तर असेच करते.

छान आहे पाकृ.. अशी करून बघायला हवी आता कोकम घालून
प्रत्येक एकादशी ला करते, थोडी वेगळी पद्धत आहे माझी.. तुपाची फोडणी करते, त्यात जिरं, हिरव्या मिरच्या, काकडीचा कीस किंवा बटाट्याचा कीस परतून घेऊन मग भगर टाकते.. आणि हो दही आणि दाकू हवंच मला

फोटो कुठाय रे?
त्याशिवाय रेस्पी नापास असते भावा.

आमच्याकडे सुद्धा अमा ची रेसिपी असते भगरीची. लिंबाच्या गोड लोणच्यासह. कधीतरी बटाटा पापड भरीस.

मला यात गुळ घालून बनवलेला भात खूप आवडतो. उपवासाला मी हाच पदार्थ खातो. आमच्यात तिखट व गोड प्रकाराला भगरीचा भात असे म्हणतात. भगरीच्या भाकरी/थालिपीठं ही खूप टेस्टी लागतात, त्या आमच्याकडे बटाट्याची कांदा लसूण न घातलेल्या सुक्या भाजीबरोबर खातात.

रेसिपी छान.
मी प्युअर व्हाइट भगर पक्षी व र्‍याचे तांदूळ. >> म्हणजे??

वरी भाताला भगर म्हणतात , बहुतेक ठिकाणी नुसतेच शिजवतात व उपवासी आमटी बरोबर खातात

आमच्याकडेही भगर-आमटी असेल तर भगर नुसतीच थोडे मीठ घालून शिजवतात. आमटी चिंच-गूळ / ताक अशी अदलून बदलून होते. चिंच गुळाची जास्त छान लागते. अजिबात आंबट काहीही न घालता सुद्धा होते. ती सुद्धा चांगलीच लागते.

सासरी फोडणीची भगर असते..त्यात जिरे, बटाटा, दाण्याचे कूट असते. माहेरी उपासाला जिरे चालत नाहीत. उपासाला फारसे खाण्याचे लाड न करण्याची माहेरची पद्धत. त्यामुळे नुसत्या कुटाची भगर करतात. ती तशीही चांगली लागते. गरम असेल, तर वरून तूप घेऊन, हवं असल्यास दह्यासोबत खातात. अशी कुटाची थंड भगर वरून दही +दूध किंवा ताक घालून खायला मला स्वतः ला खूप आवडते!!!

फोडणीची भगर असते..त्यात जिरे, बटाटा, दाण्याचे कूट असते. > >>>ही कशी करतात? साधारण साबुदाणा खिचडीसारखी वरीच्या तांदुळाची खिचडी खाल्लीय. पण वरीचे तांदुळ कधी स्वतः वापरले /बनवले नाहीत. साबुदाण्यासारखे भिजवतात की भातासारखी दुप्पट पाणी घालुन शिजवायचे?

भातासारखी दुप्पट पाणी घालुन शिजवायचे?... हो.बटाटा असेल तर अजून जरासे पाणी/ ताक.

ऑल टाईम फेव्हरीट. लाल तिखटाऐवजी आम्ही हिरवी मिरची घालतो. आमटी बरोबर खायची असल्याने भगरीचे लाड नाहीत. जर आमटी करायची नसेल तर रुचिरात सांगितल्याप्रमाणे तुपाच्या फोडणीत दालचिनी, लवंग पावडर घालून बटाटा, दाण्याचे कूट, थोडासा गूळ, कोकम घालून भगर खिचडी करायची.

आमच्याकडेही भगर फक्त मिठ टाकून शिजवतात. मी बरेचदा भिजवलेली भगर वाफऊन करतो खुसखुस (Couscous) सारखी. यापध्दतीने करुन पहायलाच हवी.

भगर म्हणजे वरी हे धान्य गिरणीत भरडून बनवली जाते. भारतात फक्त घोटी इथे भगर मिल आहेत. साळीपासून तांदूळ बनवतो तसं वरई पासून भगर बनते. आदिवासी भागात मी न कांडलेली वरई मिठ घालून शिजवून खाताना पाहिली आहे व खाल्ली सुध्दा आहे. आजकाल मिलेट म्हणजे तृणधान्ये विषयी बरीच जागृती होत आहे. वरई बरोबर सावा, भादला, कोद्रा असे बरेच जंगली धान्य आहे. नागली वरई शेती सारखीच असते.