इडली रव्याचा उपमा (झटपट नाश्त्याचा एक यशस्वी प्रयोग)

Submitted by ललिता-प्रीति on 21 December, 2015 - 02:25
प्रत्यक्षात लागणारा वेळ: 
१० मिनिटे
लागणारे जिन्नस: 

इडली रवा, १ वाटी
पाणी, एक ते सव्वा वाटी (अधिक टिपा पहा.)
ताक, १ वाटी (अधिक टिपा पहा.)
हिरवी मिरची (आवडीनुसार)
कढीलिंब, ४-५ पानं
मीठ (चवीनुसार)
तेल, फोडणीचं साहित्य

क्रमवार पाककृती: 

- मावेसेफ काचेच्या भांड्यात इडली रवा, पाणी, ताक, मीठ सर्व व्यवस्थित एकत्र करावं.
- छोट्या कढल्यात तेल-मोहरी-हिंग-कढीलिंब-मिरच्या यांची फोडणी करावी. ती इडली रव्याच्या मिश्रणावर ओतून मिश्रण लगेच चांगलं ढवळावं.
- मावेला झाकण टाकून हाय पॉवरवर आधी ३ मिनिटं मिश्रण शिजवावं.
- भांडं बाहेर काढून मिश्रण व्यवस्थित ढवळून पुन्हा हाय पॉवरवर झाकण टाकून ३ ते ४ मिनिटं शिजवावं.
- कोथिंबीर टाकून गरमागरम उपमा चापावा.

वाढणी/प्रमाण: 
या मिश्रणात २ जणांसाठी नाश्ता होईल.
अधिक टिपा: 

- अक्षरशः १० मिनिटांत उपमा तयार होतो.
- काचेचं भांडं आणि मावे यांच्यानुसार शिजवण्यासाठीचा वेळ थोडा इकडेतिकडे होऊ शकतो. करताना तितपत अंदाज घ्यावा.
- मऊ, गुलगुलीत उपमा आवडणार्‍यांनी वर दिलेलं पाणी-ताकाचं प्रमाण घ्यावं. ज्यांना मोकळा उपमा आवडतो त्यांनी ते प्रमाण कमी करावं.
- ताक खूप आंबट असल्यास ताक कमी आणि पाणी जास्त घ्यावं.
- इतर पदार्थांना फोडणीसाठी जितकं तेल वापरता त्यापेक्षा यात थोडं जास्त घ्यावं.
- फोडणीत हळद घालू नये.
- आंबट ताकाचा, बिनताकाचा, कांदा घालून इ. व्हेरिएशन्स करून खाऊन बघण्यात आलेली आहेत. पैकी हा प्रकार मला सर्वाधिक आवडला. ज्याने-त्याने आपापल्या जबाबदारीवर व्हेरिएशन्स करायला हरकत नाही.

माहितीचा स्रोत: 
स्वत:चे प्रयोग (चक्क!)
पाककृती प्रकार: 
Group content visibility: 
Public - accessible to all site users

इडली रव्याचे राईस बुलेट्स नेहमी केले जातात, पण ते शिजवून पुन्हा वाफवले नाहीत तर फार सुके सुके लागतात. हे मावेतलं प्रकरण एकदा करून बघायला पाहिजे.

रच्याकने, ते हाय पॉवरवर झाकण कसं ठेवायचं त्याचं एकदा प्रात्यक्षिक द्या बाई... आम्हाला फक्त भांड्यावर झाकण ठेवता येतं Proud

हाय पॉवरवर झाकण कसं ठेवायचं >>> Lol

'प्रतिसाद तपासा' स्टेजला मला ते लक्षात आलं होतं. पण बदलायचा कंटाळा केला. Proud

उलट मंजू राईस बुलेट्स ओले ओलेच राहतात मी केलेले Sad

आंबट ताकाची चव मस्त येत असेल. मी आलंही घालेन जरा. सोप्पी रेसिपी वाटतेय.
या दिवसात करताना उपम्यात गाजर-मटार घालायचे, की पौष्टिक उपमा तयार! Wink

मी फॉलो करतो ती रेसिपी आणखी झटपट आहे. (मूळ रेसिपी रवा इडलीची आहे. त्यातंच उपम्याचं व्हेरिएशन दिलंय) मावेमध्येच तुपावर फोडणी करून रवा हाय पॉवरवर एक मिनिट भाजायचा. मग पाणी+ लिंबाचा रस /ताक घालून ३-४ मिनिटे मायक्रोवव्ह केलं की उपमा तयार.)
इडल्या करायच्या असल्या तर रवा भाजून झाला की पाच मिनिटांनी दही, ओलं खोबरं, कोथिंबीर, पाणी , सोडा घालून नीट ढवळून दहा मिनिटे ठेवायचं आणि मग इडल्या करायच्या. .

मसाला रवा इडलीला सुरुवातीला काजू तुकडे तर व्हेजिटेबल रवा इडलीला गाजर्/फरसबी बारीक चिरून.

मी एकदा ओटमीलसारखा पण जरा जास्त वेळ असाच ताकात भिजवून शिजवून बघितला होता. पण कुछ जम्या नही ! शिजलाही नीट नाही आणि चविष्टही झाला नाही कढईतल्यासारखा. आता परत तुझी पद्धत फॉलो करुन पाहायला हवी.

उपमा आवडतो त्यामुले या प्रकारे पण ताक न घालता करून बघेन नक्की. घरून काम करत असलं की काय जेवायचं हा प्रश्नच असतो, हा उपमा चांगला पर्याय आहे.

आंम्ही करून पहाण्यात येइल..असे म्हणू शकत नाही. कुणी करुन दिला Wink
तर खाऊन पहाण्यात येइल..असं म्हणू शकतो. Wink

आशू, चव किंचित वेगळी लागते. (उकडीत लसूण असतं नॉर्मली, यात नाही.)

चनस, उपमा, उकड क्याटेग्रीतले सर्व प्रकार मावेत अगदी पटकन होतात. करून पाहा.

अरे वा छान ग प्रिती.

माझी सासू म्हणते की गावाला तांदूळाचा खास रवा काढून उपमा करतात.

मी आज लगेच केला Happy

idli rava upama.jpg

गाजर, कांदा, मटार घालून केला. हे सगळं फोडणीत परतून घेऊन ताक- पाणी- रवा- मीठ-साखरेच्या मिश्रणात घातलं आणि मावेत ३+१+१ मिनिटासाठी हाय पॉवरवर ठेवलं. छान झालाय उपमा. ताक+पाणी मिळून जवळपास तिप्पट होतं पण रव्याचा एखादा दाणा मधूनच कच्चट वाटला. पुढच्या वेळी इडलीरवा कोरडाच भाजून घेऊन बघेन.

इडली रवा, उकड्या तांदळाचा असतो का ? रवा मिळणार नाही इथे, पण तांदूळ मिळतील.. घरी रवा करायचा म्हणतोय.