मोड आलेल्या मेथीदाण्यांची भाजी

Submitted by सामी on 5 February, 2015 - 07:44
प्रत्यक्षात लागणारा वेळ: 
१५ मिनिटे
लागणारे जिन्नस: 

एक वाटी मोड आलेले मेथी चे दाणे,
१ कांदा बारीक कापून
१ टॉमेटो बारीक कापून
फोड्णी साठी हिंग, मोहरी, जीरे आणि कडीपत्ता
हळद, मसाला पूड, मीठ
चवीसाठी साखर, खोबरे, कोथिंबीर.

क्रमवार पाककृती: 

मेथी ही भाजी पाने व बिया (मेथीदाणे) या दोन्ही रूपांत वापरली जाते.
मेथीच्या पानांप्रमाणेच मोड आलेल्या मेथीदाण्यांची भाजी/उसळ चविष्ट लागते. आमच्या कडे थंडी मधे ही भाजी केली जातेच.

  1. मेथी धूवून रात्रभर पाण्यात भिजवून ठेवा.
  2. सकाळी पाणी काढून एका जाळीच्या भांड्यात मोड येण्यासाठी झाकून ठेवा. मेथीदाण्यांना मोड यायला दोन दिवस लागतात. रात्री पुन्हा मेथी धुवून परत झाकून ठेवा. दुसर्या दिवशी मोड आलेले मेथीदाणे भाजी करण्यासाठी तयार आहेत.
  3. कढईत तेल तापल्यावर त्यात मोहरी आणि कडीपत्त्याची फोडणी द्या. मग जीरे आणि हिंग घालून बारीक चिरलेला कांदा घाला.
  4. कांदा थोडा फ्राय झाल्यावर बारीक चिरलेला टॉमेटो टाका.
  5. टॉमेटो शिजल्यावर मोड आलेले मेथीदाणे टाका.
  6. हळद, मसाला आणि मीठ टाकून परतून भाजी झाकून ठेवा आणि वाफेवर शिजण्यासाठी झाकणावर थोडे पाणी घाला
  7. मेथीदाणे शिजल्यावर एक चमचा साखर टाकून गॅस बंद करा
  8. वरून चिरलेली कोथिंबीर आणि खोबरे टाका

मोड आलेले मेथीदाणे
methi-mod.jpgतयार भाजी
methi-tayar.jpg

वाढणी/प्रमाण: 
दोघांसाठी
अधिक टिपा: 

ही भाजी भिजलेली चण्याची डाळ किंवा बटाटा घालून ही करता येते.

माहितीचा स्रोत: 
आई
पाककृती प्रकार: 
प्रादेशिक: 
Group content visibility: 
Public - accessible to all site users

मस्त.. या भाजीत खारीक घातली तर छान लागते.

मेनका, नाचणी ८ तास भिजवून, निथळून मग पुरचुंडी बांधून ठेवायची. अधून मधून त्यावर पाणी शिंपडायचे. १२ तासानी मोड येतात. पण फार लांब मोड येत नाहीत.

मस्तच आहे ही कृती. मी हा प्रयोग कधीच करुन पाहिला नाही.

आम्ही विषुववृत्तापासून खूपच जवळ राहतो. इथे कायम गरम वातावरण असत. मग मोड आलेली मेथी चालेल का? मला तर एक चमचा तिळही बाधतात इथे.

मेथी दाण्यांची उसळ डेलिव्हरी नंतर खायच्या प्रकारात करतात - उष्ण म्हणून!

http://www.maayboli.com/hitguj/messages/103383/49686.html?1148303387

आणि इथे दिनेशदांनी पण रेसिपी दिल्ये.

http://www.maayboli.com/node/35181

सगळ्यांना धन्यवाद.

दिनेशदा खारीक घालून करून बघेन एकदा. तुम्ही ही रेसिपी दिली आहे हे मला माहीत न्हवते ( कशी काय मिस झाली;:-) ?). आता रायगड यांनी दिलेली लिंक बघितली. तरीही तुम्ही माझ्या क्रुती वर रिप्लाय दिलात. धन्यवाद.

बी, सायो आणि निधी मोड आल्यामुळे असेल कदाचीत पण ही उसळ बाधत नाही आणि कडू ही लागत नाही. नुसती खायला पण आवडते मला. शक्यतो थंडीतच केली जाते.

फोटो छान आहे. थंडीत करायला हवी एकदा. थोडेच दिवस राहिलेत.

सामी, अगं इथे एकाने पाकृ लिहिली आहे म्हणजे दुसर्‍याने लिहूच नये असा नियम नाहीये अगं Happy

मटकीच्या उसळीत हे मोड आलेले मेथीदाणे घालतात. म्हणजे मेथी पोटात जाते, पण उष्ण पडण्याची भीती नाही. Happy

भयंकत पित्तकर भाजी आहे, ज्यांना पित्तानं डोकं चढतं अशांनी जपूनच खावी, पण चवीला मस्त लागते.

मोड आलेली मेथी कडू नाही लागत...अशी भाजी / सलाड मध्ये छान लागते...
पण पित्तकर...✓✓
- अशीच भाजी , आणि फोडणीस टाकताना ,थोडी भिजवलेली तूरडाळ घालून आमच्याकडे करतात...तयार झाली की भरपूर कोथिंबीर आणि लिंबू पिळून खायची...मस्त लागते...