वांगं-मुगवडी फ्राय

Submitted by मृण्मयी on 11 July, 2008 - 02:18
प्रत्यक्षात लागणारा वेळ: 
३० मिनिटे
लागणारे जिन्नस: 

६-८ छोटी वांगी-हिरवी किंवा जांभळी
२ मध्यम आकाराचे कांदे
१ टोमॅटो (नसला तरी चालेल)
भरपूर कोथंबीर
मीठ
गरम मसाला
हळद
तीखट
अर्धा चमचा चिंचेचा घट्ट कोळ
एक छोटा खडा गुळाचा
१ वाटी मुगवड्या
२ पळ्या तेल (भाजीला शक्यतो तेलाच्या वाफेत शिजवावं म्हणून)

क्रमवार पाककृती: 

* वांगी, टोमॅटो आणि कांदा हे सगळं धूउन पातळ आणि उभं चिरून घ्यावं. (वांग्याला पाण्यात टाकून ठेवलं तर त्यातली चांगली सत्व निघून जातात, तेव्हा पाण्यात टाकु नये). या सगळ्या भाज्या कापून एकत्र ठेवल्या तरी चालतील.
* फोडणीत, तेल गरम करून मोहरी-हिंग घालून मुगवड्या घालाव्या. २-३ मिनिटं परतावं.
* त्यावर थोड्या चिरलेल्या भाज्या घालून हळद, तीखट, मीठ, मसाला आणि चिंच घालून नीट परतावं. ऊरलेल्या भाज्या घालून परत सगळा मसाला नीट सगळ्या फोडींना लागेल इतकं ढवळून मंद आचेवर १० मिनिटं ठेवावं. त्यात वांग्याचा उग्र वास जाईल.
* परत एकदा भाजी घाटून, पाण्याचा हलका शिपका देऊन झाकळ घट्ट लावून भाजी शिजवावी.
मुगवड्या शिजल्या की ३-४ मिनिटं जास्त आचेवर भाजी फ्राय करावी. याच वेळी थोडा गुळ घालावा आणि बारिक चीरलेली कोथिंबीर पेरावी.

वाढणी/प्रमाण: 
४ ते ५ जणांसाठी सहज पुरेल.
अधिक टिपा: 

*** यात कांदा व्यवस्थीत गळतो. चांगला ब्राऊन पण होतो. तेव्हा फोडणीत त्याला वेगळं परतुन घ्यावा लागत नाही.
*** काही मुगवड्या शिजायला खूप वेळ लागतो. त्यांना फोडणीत घालण्याआधी १० मिनिटं पाण्यात भिजवून निथळून घ्याव.

पाककृती प्रकार: 
प्रादेशिक: 
Group content visibility: 
Public - accessible to all site users

या बया! ही जुलैत लिहिलेली कृती आत्ता वर आली!!

मीरा, हो हो. त्याच ह्या वड्या. Happy

भाग्या, ह्या भाजीमधे उन्हाळ्यात कैरी घालतात नं नागपुरात?

हो! सुनिधी हरभर्‍याच्या डाळिचे वडे करतात ना ऊन्हाळ्यात सेम तसेच..
(म्रु तुझ्यावतिने आधिच उत्तर् दिले चालेल ना!)
म्रु च्या या रेसिपिने मी खुपदा भाजी केलिय्..एकदम झकास होते.

मॄ, फारच छान रेसिपी. सांडगे पटकन शिजत नाहीत असा माझा अनुभव. कुणी काही सांगू शकेल का ? ह्या भाजीला तसं झालं तर वांगी फारच शिजून जातील म्हणून विचारलं.

अगो! मुगवड्या असतिल तर पटकन शिजतात अपेक्षेपेक्षा..शंका वाटत असेल तर 'म्रु' ने लिहलय तस कोमट पाण्यात टाकुन निथळुन घ्यायच्या.

मृ, केली ग आज तुझ्या पध्द्तीने भाजी. मी नेहेमी कांदा परतून घेते. पण तुझ्या रेसिपीनेपण कांदा छान शिजतो आणि मग पटकनपण होते. आवडली रेसिपी.

अगो, मुगवड्या पटकन शिजतात.
आमच्याकडे सांडगे थोड्या तेलावर परतुन, पाण्याचा शिपका मारुन मग शिजवतात. तेलावर परतल्याने लवकर शिजतात आणि मोडत नाहीत.

मीहि दिपांत ने लिहिल्याप्रमाणे अगदि थोड्या तेलात परतून घेते, लालसर रंग येईपर्यंत. त्याने पटकन शिजतात मुगवड्या, पण भरपूर फुलतात.

आज केली ही भाजी. यम्मी !!! माझ्याकडे आईकडून आणलेल्या हरभरा डाळीचे वडे असतात. मी ते घालून केली. मस्तच.

काल सम्राट मधे जेवायला गेलेले, तिथे हि भाजी खाल्ली. बैंगन बडी .... मस्त होती !!

काल केली ही भाजी . देशी स्टोअरमधल्या मूगवड्या होत्या. त्या फोडणीत चांगल्या फुलल्या, ब्राउनिश झाल्या पण तरी भाजीत जराशा कच्चट लागत होत्या. शिवाय त्या वड्यांना फारशी चव पण नव्हती . भाजी मस्तच लागली तरी पण. वड्या वगळून सुद्धा वांग्याची भाजी अशा स्टाइलने करता येईल.