९) ऑटीझमचे फायदे

Submitted by Mother Warrior on 3 April, 2014 - 16:19

शीर्षक वाचून दचकायला झाले ना? मलाही लिहीताना अवघड गेले. पण मुलाच्याबरोबरीनेच माझाही पर्स्पेक्टीव्ह बदलत चालल्याचे लक्षण असावे हे.

मी हा लेख लिहीत आहे याचा अर्थ असा नाही की सगळं आलबेल आहे. ऑटीझमच्या बरोबर येणारे त्रास काही कुठे जात नाहीत. इन फॅक्ट त्या त्रासाबद्दलच मी इतके दिवस लिहीत आहे इतक्या लेखांमधून. पण आज जरा वेगळ्या अँगलने विचार करू.

माझ्या मुलाला ऑटीझम आहे म्हणूनच :

  • त्याचा इनोसंस वयाच्या ३-४ वर्षापर्यंत टीकून राहीला आहे. अजुनही त्याच्याकडे पाहील्यावर, त्याचे खेळणे पाहील्यावर एखादे बाळच वाटते ते. आम्हाला मनापासून आनंद देते हे बाळ! Happy
  • पूर्णपणे शुद्ध्/प्युअर मन आहे त्याचे. त्याला खोटं बोलायला कधीही जमणार नाही. लबाडी, कोणाची फसवणूक कधीही जमणार नाही.
  • तो कधी फारसा रडत नाही. हे खरंतर फारसं चांगले नाही त्याच्या दृश्टीने. परंतू आमच्या आधीच चिंतेने ग्रासलेल्या घरात सतत मुलाचं व्हायनिंग व रडणं असतं तर अवघड गेलं असतं आम्हाला कायम सॅनिटी टिकवणं!
  • तो कधीच दमत नाही! (कदाचित त्याला कळत नसेल.) परंतू तो कायम हसतमुख असतो. आमच्यासाठी रोजचा धडा असतो तो. काहीही होऊदे, सगळं जग मनाविरूद्ध चालत राहूदे, पण मन कायम आनंदी असले पाहीजे.
  • त्याच्या सेन्सरी इंटीग्रेशनच्या प्रॉब्लेममुळे आम्ही अचानक स्वतःला मिळालेल्या पाचही, नाही सातही इंद्रियांच्या दैवी देणगीबाबत ऋणी झालो आहोत. आपला मेंदू एकाच वेळेस गाडी चालवतो आहे, सिग्नल्स पाळतो आहे, पेडेस्ट्रियन येत असेल तर ते टिपतो आहे, फायर इंजिन आले तर तो आवाज ऐकून लगेच गाडी बाजूला घेत आहे, त्याचवेळेस शेजारी बसलेल्या नवरा/बायकोशी पुढील महीन्यातील महत्वाच्या कामांची यादी करत आहे,त्याचवेळेस नाकाला खाज सुटली तर नाक खाजवत अहे. सगळं विदिन २ मिनिट्स! किती मल्टीटास्कींग करतो आपण!! we should really be thankful to our brains!
  • वयाच्या १.५व्या वर्षीपासून माझ्या मुलाला सर्व अल्फाबेट्स, शेप्स, कलर्स, नंबर्स पूर्णपणे येतात. ऑक्टॅगॉन, ट्रॅपेझॉईड सुद्धा! त्याच्या वयानुसारच्या अ‍ॅप्स्/व्हीडीओज मध्ये नंबर्स केवळ १ ते १० असतात. त्यामुळे मी त्याला १ ते ५० आकडे शिकवले. माझी खात्री आहे त्याला ३० पर्यंत नक्की येतात आकडे. हे झाले माझ्याकडून. तो स्वतः युट्युबवर १००,१००० इत्यादी आकड्यांबद्दलची गाणी शोधून ऐकत असतो. असल्याबाबतीत एकपाठी असल्यामुळे ते ही येत असावे त्याला. मला पत्ता नाही. शिवाय अ‍ॅप्स व व्हीडीओजवरून तो गणिताचे बेसिक्स पण शिकतोय सध्या. २+२=४ , १२+२=१४ इत्यादी. त्याच्यादृष्टीने तो मजा करतोय. परंतू त्याचा ब्रेन त्या कन्सेप्ट्स रजिस्टर करून घेत असतो.
  • दुसर्‍या वर्षीपासून त्याला वाचता येऊ लागले. तेव्हा शब्द दाखवायचा बरोबर. आता स्टोरीबुक्स मधील शब्दांवर स्क्रोल होत वाचणॅ खूप आवडते. व्हेजीटेबल, एलिफंट, हार्वेस्ट, झायलोफोन इतक्या मोठाल्या शब्दांचे स्पेलिंग त्याला अचूक येते. वॉटर, मिल्क, डान्स, सिंग, वॉक, बेबी आईनस्टाईन, सुपर व्हाय, कुकीज इत्यादी शब्दांचे कार्ड्स तो माझ्याकडे आणून देतो - जेव्हा त्यातली अमुक गोष्ट त्याला हवी असते. मी त्याच्याशी संवाद साधताना कायम त्याच्या मॅग्नेटीक पाटीवर ऑप्शन्स लिहून देते. Eat - Poli or Oatmeal. तो त्यातील हव्या त्या शब्दावर बोट ठेऊन तो पदार्थ खातो.
  • रंगामध्ये रमायला तर आवडतच आले आहे त्याला. त्यामुळे चित्रकलेत बराच वेळ रमतो. नवीन स्किल, स्मायली फेस काढणे. ते बर्‍याचदा ग्रम्पीच येतात. परंतू तो प्रयत्न करतोय!
  • लिहायला शिकतो आहे तो- वयाच्या ३.५ वर्षी! अक्षरं सुबक व छोटी नाही येत त्याला काढता. परंतू A to Z पर्यंत सर्व अक्षरं त्याला लिहीता येतात. त्याची पेन/ मार्कर धरायची ग्रिप्/होल्ड जरा चुकत असल्याने त्रास होत आहे. मी त्याला सध्या हेच शिकवते. मार्कर्स पुढे धर. व्यवस्थित मोठ्या माणसांसारखा तीन बोटात धरतो तो. पण मार्करच्या शेवटी धरल्याने काम सोपे होते. मला घाई काहीच नाही आहे. त्याला लिहीता येते हेच माझ्यासाठी वरदान आहे! अक्षर कसं का असेना!
  • एव्हढुस्सं बाळ. परंतू एक नंबर 'फ्रेंडस मधील मोनिका" आहे! घरात फिरताना कुशन खाली पडलेले त्याला चालत नाही. तो उचलून ठेवतो. डब्याचे झाकण उघडे राहीले - जमत असेल तर बंद करतो. भिंतीवरील आर्टवर्कची जागा बदलेली लगेच कळते त्याला. बेडची चादर अस्ताव्यस्त तर मुळीच खपत नाही. रात्री ३ वाजता पाणी पिताना देखील झोपेत ती चादर नीट करतो. तो दुध पीत असताना जरा खाली सांडले तर लगेच वाकून साफ करतो! (ऑटीझमबरोबर ओसीडी वागणूक येते हे ऐकले होते. आता प्रॅक्टीकल समोर दिसते आहे. ह्याला आवर घालण्यासाठी मी कधीही घरात अमुक एक गोष्ट अमुक ठिकाणी असं करत नाही. माझ्या घरातील आर्टवर्क, फर्निचर या गोष्टी सतत जागा बदलत असतात, याच कारणासाठी!)
  • कुठलेही नवीन जिगसॉ पझल त्याला झरकन सोडवता येते. हे तो कसं करतो माहीत नाही. जिगसॉ पझलच्या पीसेसच्या आकारावरून त्याला कळत असावे कदाचित, तो कुठे जाणार ते. बहुधा, visual - spatial intelligence
  • आयपॅड, आयफोन ही तर अगदी सोपी उपकरणं झाली. या मुलाला टाईप करता येते. २-३ वेळेस त्याने टाईप करून 'Eat" असे लिहीले आहे. कधी प्राण्यांची नावं लिहीली आहेत. नेक्स्ट गोल : माऊस वापरता येणे.
  • संगीताबद्दल अतोनात ओढी. मी त्याला सारेगमप वाजवायला शिकवते. तो कान देऊन ऐकतो. माझी खात्री आहे काही दिवसातच तो स्वतः वाजवू लागेल.
  • ही मुलं फारशा भावना चेहर्‍यावर दाखवत नाहीत. पण माझे मत उलटे आहे. एक्स्ट्रीम संवेदनशील असावीत ही मुलं कदाचित.
  • ऑटीझम जर आमच्या घरात आला नसता, तर मला माझी ओळख कधीच झाली नसती! माझ्यामध्ये किती अमाप मानसिक ताकद असू शकेल हे मला आधी माहीत नव्हते. मी उत्तम शिक्षिका, प्लॅनर, रिसर्च स्टुडंट, काउन्सेलर, थेरपिस्ट आहे हे मलाच माहीत नव्हते. आणि हो, लेखिका देखील! या मुलाने मला किती किती दिलंय त्याची गणती करणं अवघड आहे.

आम्ही त्याच्याबरोबर सतत काम करतो. त्याला आपले नॉर्म्स सांगतो कारण त्याला त्याचे आयुष्य जरा सोपे जाईल, समाजात वावराताना. तो कुठे 'कमी' आहे म्हणून नाही. 'नॉर्मल' काय असते ते आम्ही आमच्या आयुष्यावरून पाहीले आहे. नॉर्मल म्हणजे चारचौघांसारखे. परंतू तो 'स्पेशल' आहे. चारचौघांपेक्षा वेगळा. त्या त्याच्या क्वालिटीज आम्हाला ऑटीझममुळेच मिळाल्या आहेत -हे विसरून चालणार नाही. तो खरोखर आमचा 'बेबी आईनस्टाईन' आहे!

http://marathi.journeywithautism.com/

Group content visibility: 
Public - accessible to all site users

अमेझिंग! पर्स्पेक्टिव/अ‍ॅटिट्यूड्/दृष्टिकोन म्हणजे सर्व काही असतं आयुष्यात त्याचा प्रत्यय आला ह्या लेखातून.
तुम्हाला आणि तुमच्या लेकाला शुभेच्छा!

पर्स्पेक्टिव/अ‍ॅटिट्यूड्/दृष्टिकोन म्हणजे सर्व काही असतं आयुष्यात त्याचा प्रत्यय आला ह्या लेखातून. >> +१

पण तरी ते फायदे शिर्षक थोडसं ऑफ वाटल हे ही खरंच.

ए, स्व... (हो अशीच हाक मारायचं मनात आहे आता).
शब्दं सापडू नयेत प्रतिसाद द्यायला असं करून ठेवलं आहेस.
ह्या स्पेशल बाळासाठी "त्या"नं घडवलेल्या ह्या स्पेशल आई-वडीलांना एक कडक्क सॅल्यूट. स्वमग्नतेकडे बघण्याची दृष्टी तर अधिक प्रगल्भ होतेच आहे पण आमच्यासारख्या सर्व-सामान्य आयुष्याकडेसुद्धा एका नव्या दृष्टीनं बघण्याची प्रेरणा देते आहेस बाई...
काय म्हणू... तू आसपास वावरत असावीस ... असं मागणं आहे.
इतकच.

मी आत्ता ऑटीझमवर खूप काही वाचले आणि हा प्रकार नक्की काय आहे हे जाणून घेतले. सिंगापुरमधे माझ्या एका मैत्रिणीचा मुलगा तिच्यासोबत मराठी कार्यक्रमाला यायचा. त्याला मी अगदी ३ वर्षांपासून पाहतो आहे. त्याच्याकडे खेळण्यातील कार असायच्यात आणि तो त्या कार एकामागे एक करुन जोडायचा. महिन्यातून दोन तीन वेळा आम्ही भेटायचो. त्याची आई बाबा माझे उत्तम मित्र आहेत. तो खूपच कमी बोलायचा. सुरवातीला तर त्याला बोलताही येत नव्हते. जेव्हा तू चांगला उंच वगैरे दिसायला लागला तेंव्हा सुद्धा तो काहीच बोलत नसायचा. एकदा मीच माझ्या मैत्रिणीला म्हणालो हा काहीच बोलत नाही. तेंव्हा तिने मला तू दिलेली माहिती सांगितली. ती तेंव्हा मला कळली नव्हती पण आत्ता लख्खपणे त्या सवांदाची आठवण झाली. तिच्या मुलाला कारचे इतके वेड होते की त्याची कार जरा रांगेतून बाजूला झाली तर तो लगेच त्याच्या बाबाला हातवारे करुन चार सरळ करायला सांगायचा.

आता मात्र त्या मुलामधे खूपच परिवर्तन झाले आहे. तो आता नवव्या वर्गात आहे. ७ व्या वर्गापासून सगळे शब्द बोलतो. बर्‍यापैकी हसून मिसळतो. मी जेंव्हा त्याच्यामधील हा बदल पाहिला तेंव्हा थक्कच झालो. पण, एक मात्र सांगावेसे वाटले ते त्याच्या आईने कधीही आपल्या मुलात कमी आहे असे जराही दर्शवले नाही. त्याचे वडील त्याच्यासोबत इतके हळुवार वागत की कधीकधी मला ते थोडे खटकायचे. पण आता ऑटीझमबद्दल वाचून मला वाटते त्यांनी त्यांच्या मुलाला खूपच छान वाढवले. आता तो मुलगा उत्तम बोलतो. अजूनही कार वगैरे खेळतो पण त्याच्यामधील परिवर्तन खूपशे सकारात्कमक आहे.

मस्त!
तुमचा मुलगा काहीतरी चांगलं पुढे करुन दाखवणार हे नक्की! मग ते सायन्समधे असेल, कलाशाखेत असेल किंवा इतर कुठे असेल Happy

सर्वांचे आभार! तुमच्या सद्भावना आमच्या पाठी आहेत हे वाचून चांगले वाटते.

बी, तुमच्या स्नेह्यांच्या मुलाबद्दल वाचून आनंद वाटला. त्याचे डाएट काही स्पेसिफिक होते का?

केदारः शीर्षक ऑफ वाटणे साहजिक आहे. पण असेच पुस्तक आहे ना, कॅन्सर माझा सांगाती?. अवघड वेळा आल्या की माणूस कमालीचा सुधारतो व त्यामुळे अवघड वेळांबाबत मित्रत्व वाटू लागत असावे. Happy

तुझी पॉजिटिविटी तुझ्या बाळाभोवतीचं संरक्षक कवच ठरलंय. जन्माला येणार्‍या प्रत्येक बाळाच्या आईवडिलांनी

तुझ्याकडून हा गुण शिकला पाहिजे.

तुझ्या मुलाची उत्तरोत्तर अशीच प्रगती होत राहावो, हीच सदिच्छा!!!

एकदम दमदार झालाय हा लेख सुद्धा. किती आत्मियतेने लिहीताय. आप तो एकदम दिल पे छा गए हो!

खूपच आवडला हा लेख. तुमच्या attitude ला सलाम. तुम्ही वर्णन केल्यावरून तुम्ही तुमच्या मुलासाठी किती मेहेनत घेताय ते कळतच आहे. तुमच्या मुलाला ज्या कुठल्या क्षेत्रात जास्त गती आहे जसे त्यात त्याची अशीच प्रगती होत राहो. जमलं तर आम्हाला update अवश्य द्या.

किती आत्मियतेने लिहीताय. आप तो एकदम दिल पे छा गए हो! >> +१

खरंच किती काय काय येतंय त्याला वयाच्या मानाने. हुशार बाळाला अनेक उत्तम आशीर्वाद Happy

लेख सुरेख नेहेमीप्रमाणेच.

फक्त positive attitude मुळे आयुष्य बदलू शकते हे मला नेहीमिच वाटते परंतु खरेच तुमचे लेख वाचून त्याची खात्रीच झाली आहे . आत्ताच ब्लोग वर एक लेख लिहिला ' ज्योतिषशास्त्र का , कशासाठी ? ' परंतु मला वाटते तुम्हाला तर अशा कोणत्याच गोष्टीची गरज नाही . तुम्ही खरेच या बाबतीत बर्याच लोकांना मार्गदर्शक आहात .
तुमच्या बाळाच्या उत्तोरोत्तर प्रगती करता खूप खूप शुभेच्छा !

जब्बरदस्त! हॅट्स ऑफ टु यु! Happy
खुप आवडला लेख!
भारतात कधी आलात तर तुम्हाला व तुमच्या बाळाला भेटायला आवडेल मला!

किती सकारात्मक आहात तुम्ही. मेरी तो बोलती बंद.
स्वमग्नतेकडे बघण्याची दृष्टी तर अधिक प्रगल्भ होतेच आहे पण आमच्यासारख्या सर्व-सामान्य आयुष्याकडेसुद्धा एका नव्या दृष्टीनं बघण्याची प्रेरणा देते आहेस बाई...>> +१

Pages