नक्षलींकडे पाकिस्तानी बॉम्ब

मटा ऑनलाइन वृत्त । रांची

नक्षलवाद्यांच्या हल्ल्यात शहिद झालेल्या एका जवानाच्या पोटात दीड किलोचा बॉम्ब सापडल्याने खळबळ उडाली असताना या हल्ल्यासाठी नक्षलवाद्यांनी वापरलेली स्फोटके व शस्त्रसाठा ' मेड इन पाकिस्तान ' होता , अशी धक्कादायक बाब समोर आली आहे .

लातेहारच्या जंगलात सोमवारी रात्री नक्षलवाद्यांनी घडवलेल्या स्फोटात तसेच सुरक्षा दलाच्या तुकडीवर केलेल्या अंदाधुंद गोळीबारात ११ जवान शहिद झाले होते . हल्ल्यानंतर नक्षलवाद्यांनी क्रौर्याची परिसीमा गाठत बॉम्बस्फोट घडवून मृतदेहांच्या चिंधड्या उडवल्या होत्या . त्यातील एका जवानाचे पोट फाडून त्यात दीड किलोचा बॉम्ब लावण्यात आला होता , अशी धक्कादायक माहिती काल उघड झाली . या घटनेनंतर सुरक्षा दलांनी नक्षलवाद्यांविरुद्धची मोहिम अधिक तीव्र केली असून या नक्षलवाद्यांना थेट पाकिस्तानातून कुमक मिळाल्याचे समोर आले आहे .

लातेहार भागात सुरक्षा दलांनी नक्षलवाद्यांच्या अड्ड्यावर टाकलेल्या छाप्यात मोठ्या प्रमाणात शस्त्रे व बॉम्ब जप्त करण्यात आले . हा सगळा साठा पाकिस्तानातून पाठवण्यात आलेला होता . हा शस्त्रसाठा नेमका नक्षलवाद्यांकडे कसा आणि कोणी पोहोचवला , याचा शोध आता सुरक्षा यंत्रणा घेत आहेत . यापूर्वी चीनमध्ये बनवण्यात आलेली शस्त्रे अनेकदा नक्षलवाद्यांकडे सापडलेली आहेत . पाकिस्तानात बनलेली हत्यारे नक्षलवाद्यांकडे सापडण्याची ही पहिलीच वेळ आहे . एकीकडे भारत - पाकिस्तान सीमेवर तणाव वाढलेला असताना नक्षलवाद्यांना पाकिस्तानातून कुमक मिळत असल्याचा हा प्रकार म्हणजे भारतीय सुरक्षा यंत्रणांसाठी नवे आव्हानच मानले जात आहे .

Ref: http://maharashtratimes.indiatimes.com/articleshow/17980684.cms