पालक वड्या (फोटोसहित)

Submitted by दिनेश. on 17 October, 2011 - 05:42
palak wadya
प्रत्यक्षात लागणारा वेळ: 
४० मिनिटे
लागणारे जिन्नस: 

१) एक जूडी मोठ्या पानांचा पालक किंवा वडीचे अळू
२) १ कप बेसन
३) आवडिप्रमाणे हिंग, तिखट, मीठ, हळद, गरम मसाला, आले लसूण वाटण, गूळ वा साखर
४) आंबटपणासाठी एक टेबलस्पून चिंचेचा कोळ किंवा दोन टेबलस्पून दही (अळू असेल तर कोळच )
५) एक टिस्पून तेल (वरुन फोडणी द्यायची असेल तर जास्त + फोडणीसाठी तीळ, मोहरी, हिरवी मिरची)
६) वरुन पसरण्यासाठी कोथिंबीर आणि ओले खोबरे

क्रमवार पाककृती: 

हा काही नवीन पदार्थ नाही. पुर्वी फॉईलवर पालकाची पाने पसरून त्यांचा अळुवडीप्रमाणे रोल केला होता. पण त्यापेक्षा हि कृति खुपच सोपी आहे.

१) पालकाची किंवा अळूची जी पाने घेतली असतील त्याचे शिरा वगळून मोठे मोठे तूकडे करून घ्या.
२) बेसनात दही वा कोळ आणि बाकी मसाले घालून भज्यांसाठी भिजवतो त्यापेक्षा थोडे घट्ट भिजवा. (हे थोडे जास्त तिखट / आंबट असू द्या)
३) कूकरच्या डब्याला तळाशी पुसटसा तेलाचा हात लावा.
४) त्यावर पालकांच्या पानाचा एक थर द्या
५) पण बाकिचे तूकडे बेसनात घोळवून वर पसरत जा आणि त्याचे थर करा.
६) वरचा थर जमल्यास नुसत्या पानांचा द्या किंवा शिल्लक राहिलेला घोळ वर ओता (जे काही उरेल त्यावर अवलंबून)
७) कूकरमधे शिटी न ठेवता २० मिनिटे वाफवा.
८) पूर्ण थंड झाले की आवडीप्रमाणे वड्या कापा.
९) पथ्यासाठी या नुसत्यास कोथिंबीर घालून खाता येतील, नाहीतर तेलाची तीळ, जिरे मिरची घालून फोडणी करून वर ओता, व खोबरे कोथिंबीर पसरून घ्या किंवा फोडणीत परता किंवा शॅलो फ्राय करा.

वाढणी/प्रमाण: 
चार जणांसाठी
अधिक टिपा: 

तेल / तळणे वगळले तर हा पथ्याचा प्रकार होईल. उपहार म्हणून भरपेट होतो.

माहितीचा स्रोत: 
अळुवड्या वळायचा आळस आला म्हणून हा प्रयोग केला.
आहार: 
शाकाहारी
पाककृती प्रकार: 
उपाहार
शब्दखुणा: 
पालक
वड्या
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

खुपच छान..
मी पानकोबी किसुन,/पालक,/अळु ची पाने चिरुन अशा वड्या करते..बाकी घटक वरील प्रमाणेच घेते..तेल्,तिळाची खमंग फोडणी करुन वड्या खुटखुटीत होईपर्यत छान परतुन घेते..

Submitted by सुलेखा on 17 October, 2011 - 07:43

अरे वा! माझ्याकडे स्वीस चार्डची पाने आहेत,त्याच्या अळुवड्यासारख्या वडया करायचा कंटाळा आलाय, या पद्धतीने करेन. दिनेशदा तुसी ग्रेट हो जी!

Submitted by आश on 17 October, 2011 - 12:37

मस्तच.

Submitted by जागू-प्राजक्ता-... on 17 October, 2011 - 13:26

भजी तर सगळेच जण करतात पण पालकाच्या वड्या असतात हे माहीत नव्हतं. खूपच सोप्याही आहेत करायला.

Submitted by मैना on 17 October, 2011 - 21:04

मस्तं दिसतायत वड्या... फोटोमधुन उचलुन खाता यायला हव्या होत्या.. अगदी अगदी,
दिनेशदा तुम्हाला मी खूप मस्त या शब्दांची S I च देते ( कारण तुमचे सर्वच पदार्थ करायला सोपे,सुटसुटीत आणि चविष्ट असतात.) फक्त आम्ही केल्यावर (म्हणजे मी केल्यावर हं!) ते फोटोतल्या सारखे दिसत नाहीत......

Submitted by शांकली on 18 October, 2011 - 01:45

केल्या आज या वड्या, मस्त झाल्या. Happy
आले-लसूण वाटण नाही घातले, तिळ मिश्रणातच घातले. चाळणीत वाफवल्या, खाली पाण्यात थोडा ओवा टाकला. मस्त स्वाद आला ओव्याचा.
धन्यवाद दिनेश ...

Submitted by आरती on 3 November, 2011 - 13:01

दिनेश दा.. खूप्पच छान प्रकार.. संडे का नाश्ता Happy
तुम्हाला कुणी कधी रेसिपीज चं पुस्तक लिहायची रिक्वेस्ट केलीये??
तुमच्याकडे तर 'साध्या,सोप्या ,पौष्टिक' रेसीपीज् चं भांडार आहे.. पुस्तक लिहिण्याचं मनावर घ्याच्च!!!

Submitted by वर्षू. on 3 November, 2011 - 20:17

Pages