लागणारा वेळ:
२० मिनिटे
लागणारे जिन्नस:
एक किलो चिकन, २ मोठ्ठ्या लसणाच्या गड्ड्या, एक मोठ्ठा आल्याचा तुकडा, ४-५ हिरव्या मिरच्या, १ अमुल बटरची वडी, मीठ, मिर्याची पुड, एक लिंबु
क्रमवार पाककृती:
एका कढईमध्ये अमुल बटर तापवून घ्यावे. त्यात ओबडधोबड वाटलेले आलं-लसुण आणि हिरवी मिरची घालून परतावे. लसूण, हिरवी मिरची व आल्याचे वाटण अंदाजे अर्ध्या वाटीपेक्षा जास्त असावे आणि त्याची पेस्ट न करता अर्धवट ठेचून बटर मध्ये परतावे. एखाद्या मिनिटानंतर त्यात चिकन चे तुकडे घालावेत. चिकन परतावे. चवीप्रमाणे मीठ अन मिरेपुड घालावी. परतत राहवे. २-३ मिनिटांनी त्यावर लिंबु पिळावे. चिकन शिजेपर्यंत मधून अधून परतत रहावे
चिकनचे तुकडे छोटे असावेत . याप्रकारामध्ये बोनलेस चिकन पन वापरले तर चालू शकेल.
वाढणी/प्रमाण:
खाणार्यावर अवलंबून. परवाच साडेतिन किलो चिकन १० जणांनी संपवलं, जेवणाच्या आधी स्टार्टर म्हणून. :)
अधिक टिपा:
हे चिकन गरम गरम खायला छान लागते. थंड झाल्यावर बटर आळल्यामूळे चव चांगली लागत नाही.
चिकन संपल्यावरही खाली भरपुर बटर अन थोडा आलं लसणाचा मसाला उरतो. त्यात केलेला भात अप्रतिम लागतो. 
मी आज चिकन ऐवजी बटण मश्रुम वापरुन भाजी केली होती. मस्त लागली.
माहितीचा स्रोत:
दीर अन जाऊबाई
सहिये अल्पना, आमच्याकडे जरा वेगळे प्रकार हवेच असतात, हे बरंय एकदम सोप्प
मश्रुम कुठले वापरतेस, फ्रेश का कॅनमधले?
इंटरेस्टींग वाटतय
सुटसुटीत पाककृती. आवडली.
एव्हरीबडी लव्ज रेमंडमधल्या डेब्राच्या फ्येमस लेमन चिकनची पाकृ हीच असावी काय?
फ्रेश बटन मश्रुम वापरले मी. २५० ग्रॅमचे पाकिट. दोघांसाठी केली होती, पण कमीच पडली आम्हाला.
भारीये कृती. पनीर, उकडलेले बेबी बटाटे, बेबी कॉर्न चालतील ना.
छे, त्या डेब्राने फक्त लिंबू अन मिरी टाकली असनार.
एक अमुल बटरची वडी? म्हणजे किती नक्की बटर?
अल्पना, ह्या चिकनमध्ये ग्रेव्हीकरता काहीच दिसत नाहीये. कोरडं होत असेल नां?
मस्त वाटतेय कृती. एक वडी म्हणजे किती वजन असतं अमूल बटरच ?
ऑ ऑ घालून करुन पाहीन म्हणतेय!
१०० ग्रॅम असते एक वडी. आख्खी न वापरता थोडीशी कमी वापरली तरी चालेल. सॉल्टेड बटरच वापरा, साध्या बटरनी चव बदलेल असं मला सांगितलं गेलं. नायतर गावाकडे घरंच लोणी वापरून करा असा सल्ला साबा कडून मिळाला होता.
मेधा ऑ ऑ वापरुन बघ अन मलाही सांग.
सिंडी, बटाटे अन पनीर पेक्षा बेबीकॉर्न आणि मश्रुम जास्त छान लागतिल. मश्रुम तर मी काल रात्रीच खाल्लेत.
आडो, हे चिकन स्टार्टर म्हणून खायला छान आहे. ग्रेव्ही नसतेच यात.
अल्पना सान,
२५० ग्रॅम मश्रुम्सना पण १ आक्खी १०० ग्रॅम ची वडि घ्यायची का?? पाव किलोचं प्रमाण सांगा ना!!
नाही नाही, अगं एक किलो चिकनला १०० ग्रॅम किंवा त्यापेक्षा किंचित कमी बटर घ्यायचे. २५० ग्रॅम मश्रुमसाठी मी त्या अमुलच्या वडीचा पावपेक्षा थोडा जास्त भाग घेतला होता. बाकी लसूण अन आलं वैगरे पण कमीच केलं होतं. १०-११ लसूण पाकळ्या अन तेवढाच आल्याचा तुकडा. एकच हिरवी मिरची (लहान मुल खाणार होतं म्हणून), २-३ चिमुट मिरे पुड असं सगळं घातलं होतं.
मीही करुन पाहीन कसले तरी व्हेज वर्झन. धन्यवाद अल्पना.
रैना, आयाम नुसतीच मश्रुमची भाजी खात बसला होता काल. त्याचं जेवण झाल्यावर माझ्या ताटातली पण बरीचशी तशीच पोळीला न लावता खाल्ली भाजी.
करुन बघ, इराला पण आवडु शकेल.
ओके, आता करुन बघते आणि कळवते!!
आजच करुन खाल्ले. खुप छान झाले आणि पटकन पण.
मस्त रेसिपी
एक वडी म्हणजे किती वजन असतं अमूल बटरच ?
ऑ ऑ घालून करुन पाहीन म्हणतेय! >> ही दोन वाक्यं एकापाठोपाठ आल्यामुळे शोनू "किती ते बटर ऑ ... किती ते बटर ऑ ! " असं म्हणत म्हणत बटर भांड्यात काढताना डोळ्यांसमोर आली. नंतर अल्पनाची पोस्ट वाचली तेव्हा ऑ ऑ चा अर्थ लागला
फुलगोभी वापरुन केला हा प्रकार. मस्त झालाय. थोडं जास्तच तिखट लागतय त्यामुळे पोळीबरोबर खाल्ला
स्टार्टर म्हणून मस्त आहे हे.
"किती ते बटर ऑ ... किती ते बटर ऑ ! ">>
हा प्रकार करून बघितला. जबरदस्त लागला. बटर म्हणून स्मार्ट बॅलन्स (US मधे मिळत) ते वापरल. कोथिंबीरी शिवाय पान हालत नाही म्हणून वरून ती सुद्धा बारीक चिरून घातली. बरोबर जीरा-राईस आणि टॉमेटो-बीट सूप.
मी पण काल करताना भरपूर कोथिंबीर घातली. छान चव आली. उरलेलं थोडंस चिकन आणि त्याचा मसाला वापरून आज भात केला. तुपावर जीरे, कांदा परतून थोडीशी धण्याची पूड घातली आणि त्यात हे चिकन घालून भात केला. आज दुपारचे मस्त जेवण झाले.
यात मी एकदा चिकन ऐवजी पनीर वापरुन पाहिलं होतं. फिंगर फुड म्हणून मस्त वाटलं. सोप्पी आहे रेसिपी
मस्त सोपी आहे पाकॄ
लिंबु कोंबडी नक्की करुन बघणार.