काव्यसंभ्रम

नदीच्या आरशात
============

सांज धुराच्या पाउली आली,
काठावरची घेऊन सावली;
नदी निळी की रात्र विराणी,
कुणाची होती कोण जाणली.

पिंपळ हलला, चंद्र न हसला,
पाण्यावरती चांदी फुटली;
निळ्या पक्ष्याच्या कृष्णपंखी
दूर कुठेशी रात्र दाटली

रेशीमरेतीत शंख पहुडला ,
आत कुणाची झोप बोलली;
कान लावुनी ऐकित राहिली ,
लाटगहिरी सांगून गेली.

घरपरतीच्या वाटेवरती
एक पाखरू मागे उरले
डोळ्यांत तयाच्या आकाश कोणते
मावळले की पुन्हा उगवले?