सतार होता येईल का मला ?

एकदा माझ्या मनात
सहज एक , विचार आला
सप्तसुरांसह खेळणारी
सतार होता येईल का मला ?

माझ्या नाजूक ,सुंदर देहाला
अलगद कुणी कुशीत घेईल
उजवा दंड , तुंब्यावर माझ्या
कसा छान मला आधार देईल !

रिषभ - धैवत कोमल गाऊन
गंभीर रस मी आणेन
संथ गतीच्या आलापाने
भैरव ला मी सजवेन

यमन सुंदर आळवीता मी
"क्या बात है " दाद मिळेल
चारुकेशी चे गुण गाता मग
नेत्र अश्रूंनी भरून निघेल

मिया मल्हार नि मेघ मध्येही
सळसळती अशी तान निघेल
पण खरंच का हो ,धर्तीवरती
तेव्हा पाऊस पडेल !?