वॉल्त्झ

आपणा कानसेनांचा एक प्रॉब्लेम आहे. आपली स्वरांची भूक कधी भागत नाही आणि कान कधी पोटासारखे भरत नाहीत. स्वरांच्या नवनवीन चवी आस्वादाव्याश्या, आळवाव्याश्या वाटतात. कशाचा शोध घेतो माहीत नसताना सतत कसला तरी शोध सुरु असतो. आणि मग अवचित कुठल्या क्षणी अचानक आपण कुठेतरी वाट चुकतो आणि अलिबाबाची गुहा सापडते. आंतरजालावर निरुद्देश भटकत असताना नुकताच माझ्या हाती असाच एक स्वर्गसुखाचा ठेवा लागला. एक गाणं, दोन गाणी, अक्खी मैफिल, अनेक अक्ख्या मैफिली असं मी अधाशासारखं ऐकत गेले. वेळ पुरत नव्हता आणि मनही भरत नव्हतं.