विरह्गीत

लुटूपुटूचा डाव मांडूया
तुझा नि माझा खेळ रंगवूया
सारथी तू अन सोबती मी
स्वप्नातील वारू उधळूया

हरवून जाऊ धुक्यामध्ये
तुझ्या नि माझ्या स्वप्नांमध्ये
जे साकारले फक्त भासांमध्ये
ते अनुभवू आज श्वासांमध्ये

घडीभरच्या भातूकलीतील
खेळभांडीही मांडूया
तुझ्या नि माझ्या भासांमधले
घर-संसारही आज थाटुया

पुसटशा होतील मग मर्यादा
ओझरत्या स्पर्शावरच थांबूया
भान हरवता एकाचे
दुसर्याने अलगद सावरुया

लुटुपुटूच्या डावामधल्या
आठवणी हृदयात साठवूया
न उमटलेली डोळ्यांतील प्रीती
उरी जपुनी ठेवूया