पंचमहाभूतांचे आपण बोनसाय केवळ

घडलेल्यावर करत राहतो हाय हाय केवळ
पंचमहाभूतांचे आपण बोनसाय केवळ

तेहतीस कोटींना आज्ञा स्थलांतराची द्या
सव्वा अब्जांची भागवते भूक गाय केवळ

जळताना हे जाणवले की प्रेम पोचले वर
आता कळले....तुला हवीशी असे साय केवळ

मन भोकाड पसरते हल्ली इतक्या त्वेषाने
असे वाटते, फक्त असावी इथे माय केवळ

कसली दु:खे, काय जाणिवा, गेले रे दिन ते
पिढी राहिली आहे आता हायफाय केवळ

असण्यावरती टीका केली कोणी नसण्याने
कोणी असणे सोसावे का मीच काय केवळ

परदु:खाने दु:खी होण्याचा अभिनय करता?
'बेफिकीर'ची ध्यानी घ्या की एक राय केवळ