रंगल्या रात्री अश्या !!!!

मी गेली ४० वर्षे तरी रात्रीचा केवळ ५ तास झोपत आलोय. कॉलेज सकाळचे असायचे, म्हणून त्या काळात जी सवय लागली लवकर उठायची, ती आजही कायम आहे. रात्री साडे अकरा ते पहाटे साडे चार, एवढी झोप मला पुरेशी होते.
पण ती लागते मात्र अतिशय गाढ. अगदी मला कुणी उचलून नेले तरी जाग येणार नाही अशी.

पण तेवढी झोप मात्र मला हवीच. जागरण मला जमत नाही. कधी घडलेच तर दुसरा दिवस वाईट जातो. आताशा माझे इमिरेटस चे विमान पहाटे साडेचारचे असल्याने, ती सर्व रात्र जागतच काढावी लागते, पण मग एकदा विमानात बसलो, कि थेट दुबईलाच जाग येते. विमान धावले कधी, उडाले कधी आणि उतरले कधी, ते अजिबात कळत नाही.