काही मुक्तछंद...

मी पाहतेय वाट ,
त्या ओथंबल्या मेघावलीची
जी निरोप घेणारया माहेरवाशीणीगत
गदगदून रडेल ,माझ्या कुशीत शिरून
त्यावेळी पापणीबंद केलेले
कित्येक एकाकी पावसाळे
झरझरून वाहतील माझ्या गालावरुन.

मी पाहतेय वाट त्या अनुभुतीच्या क्षणाची
ज्याच्या तेजकणिका ठिबकतील
या प्रवाहयामिनीतील मंदावल्या दिपकळ्यांतून
दाह शमवतील त्या अश्वत्थ् मनाचा
शीतल चांदणलेप होऊन ….

मी पाहतेय वाट त्या अमृतदंशाची
जो भिनत जाईल खोलवर गोठत
जाणारया रक्तातून अन सळसळती जीवनेच्छा
तृणपात्यांसम तरारून वर येईल
हा टणक प्रस्तर भेदून
पुन्हा एकवार दुडदूडतील पावसाळी झुळझुळवाटा