मुक्तक ललित आठवण

चिंब पाऊस, कॉफीचा मग आणि तू
कितीतरी वेळ बरसणारा तो आणि तुझ्याबरोबर,
तुझ्याच मिठीतून वेड्यासारखी खिडकीतल्या त्याच्याकडे
बघणारी मी...

आताशा बरसणार्‍या त्याला बघुन, हरवून जाते मी
पण तुला आठवत...भिनते पहाटेची ती निळीभोर वेळ..
समोर दिसणारं चांदणभरलं आभाळ अन् चंद्राची कोर
वार्‍याच्या अलवार झोताबरोबर घट्ट घट्ट होत जाणारी तुझी मिठी
अन् निश्चिंत मनाने टाकलेले ते उसासे... सलतात कितीतरी!

रिमझिम बरसणार्‍या त्याला बघुन आठवतोस तू..
अन् रिमझिम सरीसारख्या भेटीतली अनामिक ओढ,
कितीतरी वेळ तुझ्याबरोबर घालवलेले निरव शांततेतले क्षण
शब्दांची गाज रूंजी घालते मनात अन् समोर दिसतोस तू!