हसायचीस.. मनावर प्रहार करताना

हसायचीस.. मनावर प्रहार करताना
रडू नकोस अता हे विचार करताना

तुझा विचार सदोदीत आडवा येतो
विचार काय करू हा विचार करताना

नसेल पाळत जो, तो पडेल एकाकी
अवश्य घाल कलम हे करार करताना

तरी बर्‍याच पसरल्यास तू तुझ्या सीमा
मनामधून मला हद्दपार करताना

खुशाल ये मरणा, जन्म काढला सारा
बळी म्हणून मला मी तयार करताना

कितीक ज्येष्ठ बघितले..जुनाट स्मरणांनी..
उदास जीर्ण मनाला किनार करताना

किती करूणपणे प्राण सोडुनी गेले
अनेकदा दिसले जे शिकार करताना

बरेच मित्र मिळाले चिथावणारेही
नि 'बेफिकीर' असा अपप्रचार करताना