झुकणे

आकाशाचे खाली येणे झुकणे नसते,
साठवलेल्या ओलाव्याला मुकणे असते..

नकोस हासू पानगळीतील झाडांना तू,
ते तर त्यांचे दोन क्षणांचे सुकणे असते...

जेव्हा म्हणते तू मजला कि नकोस जाऊ,
तुझ्या मनातील पालीचे चुकचुकणे असते...

पहिला पाऊस पडताना आडोसा बघणे,
भिजर्‍या ओल्या आनंदाला हुकणे असते...

स्विकारल्या तू माझ्या सार्‍या सवयी जरका,
रोज तुझे मी गेल्यावर पुटपुटणे असते...

रेशमधागा जोडत असतो आपली नाती,
संशय म्हणजे संबंधांचे तुटणे असते...

-- संतोष वाटपाडे (नाशिक)