मायबोलीचे मोबाईल अॅप (अँड्रोईड + आयओएस) सर्वांसाठी उपलब्ध आहे.
काय झाले ते कळेना
Submitted by आनंदयात्री on 8 January, 2014 - 03:20
काय झाले ते कळेना
सत्य बिल्कुल ऐकवेना
संपली केव्हाच मैफल
पाय पण माझा निघेना
पोचलो वरती अचानक
आणि खाली उतरवेना
विस्मृतीने जन्म घ्यावा
स्मरणवेणा सोसवेना
जवळचे सोडून गेले
हट्ट तरिही सोडवेना
भोवती ओसाड दुनिया
आतली गर्दी हटेना!
शोधुया मुक्काम नंतर
सोबतीचा हात दे ना!
भोगण्याचा मोह नाही
अन् विरक्तीही जमेना!
नेहमी कर्तव्य केले
देव का अजुनी दिसेना?
विषय:
शब्दखुणा:
