हेही करून दमले तेही करून दमले

हेही करून दमले तेही करून दमले
वणवे मनातले ना काही करून शमले

मागे बघून वळणे नाही अपेक्षिले मी
मागे वळून बघणे हेही तुला न जमले

विरहातल्या अबोल्या घे धन्यवाद माझे
आले समोर तेव्हा दोघे किती वरमले

देवास निर्मिणे ही माणूसकीच आहे
माणूस होउनी ते देवासमोर नमले

नव्हतो कधी तिचा जी नव्हती कधीच माझी
माझे न मन करमले ना मन तिचे करमले

ज्याच्या नजाकतीवर केले प्रहार त्यांनी
तो 'बेफिकीर' आहे कळताच ते शरमले

-'बेफिकीर'!