बॉटलनेक
Submitted by बेफ़िकीर on 7 October, 2013 - 04:56
माझ्या हाडांवर शेवाळे कवितांचे
अर्थ सटकती सरळ चालत्या शब्दांचे
माझ्या रक्तामध्ये बुडलेले अनुभव
उसळत करती रोज साजरा काव्योत्सव
चरबी चढते परदु:खाने रडताना
हृदय थांबते मजवर हृदये जडताना
घसा राखण्या ग्रंथींचे हेवेदावे
लाळेपेक्षा अश्रूंनी तो ओलावे
समुद्र वर्तवण्या मुख आहे केवळ एक
अनुभूतींच्या वाहतुकीची बॉटलनेक
-'बेफिकीर'!
विषय:
शब्दखुणा: