विलापिका

मुक्तछंदाच्या दिसात, ऐकू येता अष्टाक्षरी,
मन गेले पार मागे, छोटे वय मन भरी

माझ्या मनाच्या कुपीत, काही स्मृतींची अत्तरे
उठे सुगंधाची कळ, दिस होती वो साजिरे

तन झोपले तरीही, मन राही की हो जागे
एका क्षणी होते इथे, दुज्या क्षणी जाई मागे

माझ्या मनाचा जो वेग, काय त्याचा जी झपाटा
मन जाई पार मागे, दिसे मज मीच छोटा

माझ्या छोट्याशा डोळ्यात, स्वप्ने भली मोठी सारी
ऐलतीर भासे खुजा, मग घेतली भरारी

झालो नव्हत्याचा होता, पालथली गावे, देश
बारा गावांच्या पाण्याने, बाल्य संपे भसाभस

दु:ख संपले म्हणून, हसू येई कानोकानी
जुनी सुखे आठवून, डोळा येई खारे पाणी