आरसाही मागतो

आरसाही मागतो आता पुरावे

Submitted by SADANAND BENDRE on 1 May, 2013 - 04:28

आरसाही मागतो आता पुरावे
राहिल्या अब्रूसवे आता निघावे

सोडले मोकाट आम्ही लांडग्यांना
मोजताना वासरे मग का रडावे

फारसे लावून हल्ली घेत नाही
नेहमीचे तू करावे मी भरावे

पालखीमागून अनवाणी निघालो
लाख डोळ्यांना तुझ्या इतके दिसावे

होउ दे डोहाळजेवण यातनांचे
मोकळे व्हावे, पुन्हा मनसोक्त गावे

वेड हे समृद्ध व्हावे जाणिवांनी
अन शहाणा तू मला तेव्हा म्हणावे

मी तसा डरतो कुठे मृत्यूस माझ्या
फक्त तो येईल तेव्हा मी नसावे

Subscribe to RSS - आरसाही मागतो