वेदना माझी जगाला मी दिसू नाही दिली : स्वच्छंदी

पापणी भरली परंतू........ओघळू नाही दिली
वेदना माझी जगाला मी दिसू नाही दिली

वेदनेला येत राहिल गंध विरहाचा तुझ्या
याचसाठी ही जखम मी भळभळू नाही दिली

मी अशा जादूगिरीने विरह होता सोसला
चेहऱ्यावर रेघ साधी मी उठू नाही दिली

त्या जगाने कापणी केली सुगीची नेमकी
ज्या जगाने ओल बेन्याला मिळू नाही दिली

वेदनांची जन्मभर केली जरी पारायणे
मी सुखाची एक ओंजळ दरवळू नाही दिली

घेतली जाणून माझ्या जिंदगीची वास्तवे
तू स्वतःची मात्र धडधड जाणवू नाही दिली

'माणसां'मध्ये म्हणूनच मोजला जातोय मी
मी कुणाला जात माझी ओळखू नाही दिली

: महेश मोरे (स्वच्छंदी)