धुरंधर हा राजकीय चित्रपट आहे का ?

धुरंधर बद्दल अनुपम चोप्रा यांनी संतुलित मत व्यक्त केलं आहे. माझ्या मते त्या कोणत्याही पक्षाच्या नाहीत. तसेच त्यांचे वय आणि अनुभव बघता दोन गोष्टी त्या सांगू शकतात. पण त्यांचा रिव्ह्यू आल्याबरोबर त्यांना गलिच्छ भाषेत ट्रोल केले गेले. ही गोष्टच पुरेशी आहे कि धुरंधर हा पॉलिटिकल अजेण्डा रेटण्यासाठी बनवलेला चित्रपट आहे.

भाजप सरकार आल्यानंतर अजेण्डा रेटणारे अनेक सिनेमे आले. त्यातले जे अगदी वाईट होते ते आपटले. पूर्वीही अजेण्डा असलेले सिनेमे असायचे. पण त्यांचा हेतू वाईट नव्हता. मसाला चित्रपटातून धार्मिक एकतेचा अजेण्डा दाखवला जाई . अमर अकबर अँथनी सारखे. तर तत्कालीन सरकारवर टीका करणारे चित्रपट तेव्हांही असत. आणिबाणीच्या काळात आंधी आणि किस्सा कुर्सीका असे दोन सिनेमे आले ज्यांच्यावर बंदी आणली. यातला आंधी हा नंतर कल्ट सिनेमा ठरला. किस्सा कुर्सी का कधी बघायला मिळाला नाही. आंधी राजकीय आहे पण राजकीय अजेण्डा त्यात नाही. तरीही त्याच्यावर बंदी आली.

त्यानंतर मसाला फिल्म्स मधून कायदा हातात घ्यायला सांगणारा सुप्त अजेण्डा असलेले अनेक सिनेमे आले. या सिनेमांमधून व्यवस्थेविरोधात असंतोष अजाणतेपणी पेरण्यात आला. उदा शोले मधे अहिंसेवरचं ठाकूरचं भाष्य हे बहुसंख्य प्रेक्षकांना अहिंसा हे कुचकामी तत्व असल्याचे पटवून देते. चित्रपट हे प्रभावी माध्यम आहे. यानंतर नायकाने कायदा हातात घ्यायचे समर्थन असलेले अनेक सिनेमे आले. यातून व्यवस्था आपल्यासाठी नाही आणि आपल्याला कायदा हातात घ्यायला हवा असे लोकांना वाटू लागले. आज पन्नाशीत असलेले अनेक अ़कल्स याचे शिकार आहेत. यातल्या काहींनी रस्त्यावर तर काही ज्यांना रस्त्यावर अँग्री यंग मॅन होणे शक्य नव्हते ते आता सोशल मीडियात तो राग काढत असतात.

चित्रपट किंवा कोणत्याही माध्यमाचे सूक्ष्म आणि मोठे परिणाम होत असतात. ज्यांना या माध्यमाची शक्ती ं माहिती आहे त्यांच्यासाठी ते नवीन नाही. चित्रपट आहे चित्रपटासारखा पहा हे सांगणारे पण ते स्वतःच्या पदरचे सांगत नसतात. एकतर अशा कोणत्यातरी चित्रपटाच्या पीआर ने एन्फ्ल्युएंसर्सना हाताशी धरून पेरलेली ही चटपटीत वाक्ये लोक आपली म्हणून दामटून देत असतात.

बंगाल फाईल्स, आसाम फाईल्स असे आलेले अनेक चित्रपट आपटले. काही चालले. चाललेल्या पैकी काही वाईट होते तर काही चांगले होते. उरू हा चित्रपट उत्कंठावर्धक होता. देशप्रेमाची फोडणी ओतप्रोत असली तरीही चित्रपट म्हणून तो कुठेच कमी पडत नव्हता. तसेच धुरंधरच्या बाबतीत आहे. यावर जास्त बोलत नाही कारण ध्रुव राठीने ते काम प्रभावी पणे केलेले आहे.

पण अनेक प्रश्न या व्हिडीओ नंतरही शिल्लक राहतात.
ध्रुव राठीने मोदी सरकार गद्दार कसे असेल असा प्रश्न कुठल्यातरी चित्रपटाच्या बाबतीत कि भाषणाच्या बाबतीत उपस्थित केला आणि आता तो विचारतो कि मनमोहन सरकार गद्दार कसे असेल ? हे भूमिकेतले सातत्य मान्य आहे.

मात्र इंटेल असतानाही २६/११ चा हल्ला जर होत असेल तर त्याबद्दल शंका उपस्थित झालीच पाहीजे. आम्ही तुमच्यवर शंका घेत नाही, तुम्ही आमच्यावर घेऊ नका, फिट्टंफाट हा फालतूपणा देशाच्या दृष्टीने घातक आहे.

राजकारण करताना काही पथ्ये पाललीच पाहीजेत. बघा तुम्ही आमचे २६/११ काढले तर आम्ही तुमचे कंदाहार काढू, म्हणुन दोघेही गप्प बसू याला काही अर्थ नाही. जनतेला कंदाहार मधे इंटेल असताना चूक का झाली या प्रश्नाचे उत्तर हवे आहे. तसेच कारगिल प्रकरणात इंटेल असतानाही घुसखोरी झाली, तोफा आल्या याची चौकशी होऊन जनतेला माहिती मिळाली पाहीजे.

देशात फक्त दोन सत्ताधारी पक्ष अस्तित्वात आहेत या भ्रमात कुणी राहू नये. हू किल्ड करकरे या पुस्तकात उपस्थित केलेल्या प्रश्नांची उत्तरे आजवर मिळालेली नाहीत.

तसेच पुलवामा अ‍ॅटॅक का झाला कसा झाला, आर डी एक्स कसे आले, एक संशयास्पद पोलीस अधिकारी आणि त्याची भूमिका याबद्दल देशाला माहिती व्हायलाच हवी.

या घटना तोडून मोडून आपल्या राजकीय फायद्यासाठी दाखवणारा धुरंधर चित्रपट आहे म्हणुन चित्रपटासारखा पहा असे सांगणार्‍या चित्रपट पंडीतांना हात जोडून नमस्कार.

ध्रुव राठीच्या निमित्ताने अनेक प्रश्न आहेत. त्यांची उत्तरे देशाला कधी मिळणार ?