ज्वारीच्या पीठाचा उत्तपा

सर्वप्रथम इच्छाशक्ती आणि कंटाळा असे जबरदस्त कॉम्बिनेशन घेऊन रविवारी सकाळी काहीतरी छान खायचे आहे, पूर्वतयारी नाहीये, मेहनत कमी करायचीय, healthy पाकृ हवी असे नखरे करावेत.
कंटाळा येऊ नये म्हणून सकाळी ९ वाजता कांदेपोहे करून /करवून /मागवून खावेत म्हणजे जरा energy येते. रील्स बघायला घ्याव्यात. जरासं पहुडावं, २ तास सहज जातात.
मग ११ वाजता अचानक इच्छाशक्ती जागृत झाल्यासारखे उठावे, पाणी प्यावे आणि मिक्सर च्या जार मध्ये वर दिलेल्या प्रमाणानुरूप ज्वारीचे पीठ, रवा, दही, मीठ घालून घुर्रर्र करून घ्यावे.
झाकण उघडून बघावे, तर त्यात अपेक्षे प्रमाणे बॅटर दिसणार नाही कोरडे पीठ दिसेल, अरेच्चा पाणी राहीलच की!
असे म्हणून बेताने पाणी घालावे.
झाकण लावून अजून एकदा घुर्रर्र करावे.
हे घट्ट मिश्रण एका बोलमध्ये काढून, मिक्सर जार मध्ये पाणी घालून तो चांगला विसळून ते पीठाचे पाणी त्या बोल मध्ये ओतावे.
छान व्हिस्क करून घ्यावे.
आता ह्या स्टेप ला तुमचा किंवा ai चा intelligence वापरून consistency योग्य आहे की नाही हे ठरवावे.
साधारण पळीने बॅटर तव्यावर टाकल्याअंतर आपणहून जरासे पसरले पाहिजे, पण सैरावैरा पळून नाही गेले पाहिजे.
( नाही कळलं तर जीपट्या ला prompt द्या, u need to upgrade cooking techniques guys )
.... आता खाण्याचा सोडा घाला, गरज वाटत असेल तर मीठ घाला, हलक्या हाताने मिक्स करून ह्या मिश्रणाला १ तास आराम द्या. खरे तर १५ मिनिटे रेस्ट दिली तरी चालेल, पण रविवार आहे मिश्रणबरोबर तुम्ही सुद्धा एखादी वामकुक्षी घेऊन टाका.
..

आता १२ वाजता उठा, सिंडारेला च्या थाटात आवडत्या भाज्या किंवा वरती दिलेल्या भाज्या घ्या त्यात किंचित मीठ किंवा चाट मसाला घालू शकता मिसळून ठेवा किंवा हवे तसे उचलून sprinkle करू शकता.

..
नॉन स्टिक चा तवा तापायला ठेवा.
मिश्रण बघा कसे झालेय , त्यात एक पळी type चमचा बुडवा आणि अंदाजे दीड पळी मिश्रण घेऊन तव्यावर घाला. जास्त पसरवायचं नाही, किंचित जरासं पसरून गोलाकार द्यायचा.
गॅस मध्यम आचेवर हवा.
आता त्यावर टॉपिंग च्या भाज्या घाला किंचित तेल आजूबाजूने सोडा आणि थोडे हवे असेल तर वरती घालू शकता. इथे दोन गोष्टी लक्षात ठेवायच्या, उलथणे लाकडी वापरायचे आणि परतयच्या आधी भाज्या जरा प्रेस करायच्या म्हणजे त्या सुटणार नाहीत आणि दोन्ही बाजू नी व्यवस्थित भाजलं जाईल.
अल्टी पलटी करून छान भाजून घ्या.

कुठल्याही चटणी सोबत सर्व्ह करा