शुभविवाह - उर्फ डेडली आत्या

आत्यांच्या विरहाने शोकाकूल असणाऱ्या फॅन्ससाठी >>>
आकाशने मोठ्या मनाने का रिकाम्या डोक्याने माफ केले >>>
तेवीस किलोची चेक ईन बॅग होईल अशा बॅगेतून दोन-दोन ग्रामच्या तीन फाईली निघाल्या तरीही आकाशला संशय आला नाही >>>

जबरी पोस्ट आहे. तोच बिनडोकपणा परत परत सुरू आहे असे दिसते. त्या आत्याच्या रूमच्या बाहेर पाच मिनीटे ऐकत उभा राहिला तरी आकाशला सर्व कळेल लगेच. किंवा इतकी दिवस आपली बायको आरोप करत आहे तर या दोघीच फक्त असताना त्यांचा संवाद आपण ऐकू वगैरे काहीही त्याला सुचत नाही. त्याच्या आईबापांना मारलेले जर तो माफ करत असेल, तर ऑफिसमधले पैसे चोरल्याबद्दल करेलच. इतकेच नव्हे, तर मधे तो आत्यालाच आई म्हणायला लागला आहे. आता डब्बा कार्टेलसारखा तिला बा ही म्हणेल

तिची डिलीव्हरी झालेली आहे का मुळात? मला शंका आहे. आणि बाळाला दु:ख होईल वगैरे वाक्यांनी तसेच वाटते. एरव्ही प्रत्यक्षातील काही महिने किंवा वर्षे लागणार्‍या गोष्टी सिनेमात्/सिरीज मधे ५ मिनिटांत होतात. पण प्रत्यक्षात साधारण नऊ महिने लागणारी गोष्ट सिरीज मधे त्याहून जास्त काळ चालू आहे हे मराठी सिरीज मधेच होऊ शकते.

रिकॅप करायल थोडे भाग पाहिले. पण या वरच्या वर्णनाच्या आधीचे पाहिलेत. भूमी फायनली आत्याचे सगळे सिक्रेट्स उघड करते तो भाग. आधीच्या मानाने हे भाग जरातरी एंगेजिंग होते. पण तरीही मजा होतीच. आपण केलेल्या कृत्यांची पहिल्यापासून सर्व माहिती या लोकांना अधूनमधून कोणाला तरी सांगायची हुक्की येत असते, त्यामुळे आत्या हे कोणालातरी सांगत असताना भूमीने ते रेकॉर्ड केलेले असते. ते शोधून काढायचा भाग अफलातून अचाट आहे. पण ते सापडते.

मग आत्याला का कोणास ठाउक पण "इण्डियन बिझिनेस असोसिएशन" तर्फे "बिझिनेस वूमन" हा सन्मान देण्यात येणार असतो. इथे "बिझिनेस वूमन" असे दोन स्वतंत्र शब्द लिहीले आहेत, तसेच त्या बॅनरवर आहेत. दुसरे म्हणजे तिलाच ते अ‍ॅवॉर्ड देण्याचा समारंभ असतो, तरी स्वागतवाली बाई "यांनी येथे येउन या समारंभाची शोभा वाढवली" वगैरे म्हणत असते.

महाजनांपैकी कोणालाही देश लेव्हलला सोडाच, पण अगदी राहतात त्या भागातील पातळीवर सुद्धा अ‍ॅवॉर्ड देण्याइतके काम त्यांनी आत्तापर्यंतचे सगळे एपिसोड अ‍ॅड केले तरी केलेले नाही. त्यामुळे हे अ‍ॅवॉर्ड कशाबद्दल ते समजले नाही.

इतके दिवस हे लक्षात आले नव्हते पण महाजन कुटुंबिय सुद्धा महाजन चा उच्चार हिंदीसारखा करतात. म्हणजे त्यातला ज हा "जागतिक" मधल्या ज प्रमाणे उच्चारतात. ही मालिका मूळ हिंदीतील असावी अशी शंका येणारे बरेच संवाद आता ऐकले. काही तर लिटरल भाषांतर आहेत. "रघूकाकांची मुलगी आज आपल्यामधे आली आहे" असे भूमी आकाशला म्हणते. मला तर भूमी व आकाश यांच्या मधे कोणी दिसले नाही व ती मुलगीच अजून न दिसल्याने ती मेटॅफोरिकली सुद्धा कशाच्या मधे आली कळाले नाही. मग तिची एण्ट्री दिसल्यावर लक्षात आले की "वोह आज हमारे बीच है" चे ते लिटरल भाषांतर होते.

या सर्वांच्या त्या सीन मधल्या एण्ट्र्या हा एक वेगळाच अफलातून प्रकार आहे. आपल्या नावाचा पुकारा होईपर्यंत पोलिसांपासून ते साक्षीदारांपर्यंत सगळे बाहेर कोठेतरी दबा धरून बसलेले आहेत. भूमी एकेक रहस्य उघड करत आहे व ज्यांचे नाव घेतले जाईल त्यांना पोलिस बाहेरून आणून हजर करत आहेत. हे सगळे त्या "बिझिनेस वूमन" समारंभाच्या मंडपात सुरू आहे. आणि येणारी प्रत्येक व्यक्ती आधी सीनकडे आपली पाठ करत नाचत येत नाही हा भाग (थँकफुली) सोड्ला, तर बाकी सीन साधारण केजोच्या किंवा तसल्या पिक्चर मधे गाण्यांत गेस्ट अ‍ॅक्टर्स येतात तसाच आहे.

डिलीव्हरी काही एपिसोड्सनंतर झालेली दिसते. पण तो "बाळ' संदर्भ ओके असेल कारण इथे दिग्दर्शक मनमोहन देसाई मोड मधे आहेत. भूमीचे बाळ आत्या बहुतेक दवाखान्यातूनच गायब करते. नंतर ते कोणालातरी सापडते. हे भाग अजून पाहायचे आहेत. चालू भागांपर्यंत तरी ते भूमीकडे परत आलेले नाही.

त्यामुळे भूमी व आकाश त्याला बाळच म्हणत असतील.

मात्र बिझिनेसवूमन (सॉरी, बिझिनेस वूमन) समारंभात आत्याचे किमान दहा खून व एक दोन बॉम्बस्फोट उघडकीस आले आहेत. हा तपास प्रामुख्याने भूमी व परितोष करतात व पोलिस त्यांना अधूनमधून लागेल तसे सहकार्य करतात. म्हणजे उदाहरणार्थ - ती आत्याच्या वल्गनांची क्लिप, जिच्यामुळे तिचे गुन्हे उघड होतात - ती तपासात महत्त्वाची असेल तर मोबाईल कंपनीतून मिळवणे हे खरे म्हणजे पोलिसांचे काम. पण इथे तपासात पोलिसांचा केवळ साइड रोल असल्याने तो भूमीलाच करावे लागते. ती क्लिप मागितल्यावर मोबाईल कंपनीचा माणूस म्हणतो "हे खरे म्हणजे बेकायदेशीर आहे पण तुमच्या कडे पोलिसांचे कायदेशीर पत्र असल्याने तुम्हाला देत आहे"! मग कसले बेकायदेशीर?

साइड रोलचे अजून एक उदाहरण म्हणजे भूमीला जेव्हा किडनॅप करून जंगलात बांधले होते त्यानंतर या लोकांनी पोलिस कंप्लेण्ट वगैरे काही केली नव्हती. तेव्हा तपास आकाश करत होता. नंतर पुढे इतर कारणांनी पोलिसांना जेव्हा तपासात शिरकाव करून दिला तेव्हा त्या किडनॅपिंगचा संदर्भ दिला गेला - की अहो से काही झाले होते. पोलिसही मग असे होय मग ठीक आहे म्हणून "मूव्ह ऑन" करतात.

पण एकूणच लीड इन्वेस्टिगेटर भूमी व ती नाव पुकारेल तसे मंडपाबाहेरून आरोपी आणणे हे इन्स्पेक्टर गायकवाडांसकट इतरांचे काम. त्यात अटक करायला तितका संशय असणे हे खरे म्हणजे बास असायला हवे. पण तेथे आख्खा खटला चालतो त्याच मंडपात. पोलिस, वकील व न्यायाधीश हे सगळे रोल भूमी, आत्या व उपस्थित लोक करतात. आकाश व आजी हे कोर्टातील प्रेक्षकांचे रोल करतात. म्हणजे तेथेच आत्या भूमीला क्रॉस क्वेश्चन करते की तुझ्याकडे काय पुरावा आहे. मग भूमी ज्याने तिला पूर्वी किडनॅप केले होते त्याचे नाव घेते. तेव्हा पोलिस त्याला घेउन येतात मंडपाबाहेरून. (इथे आत्याला धक्का इतका बसला आहे की तो माणूस दिसायच्या आतच तो बसतो. अरे त्याला निदान फ्रेम मधे येउ दे.). त्या वरच्या रघूकाकांच्या मुलीचा ना फिर्यादी म्हणून ना आरोपी म्हणून काहीही संबंध तोपर्यंत नसताना उगाचच दोन महिला पोलिस तिला घेऊन येतात.

किमान दहा खून केलेल्या बाईला कोर्टातून जामीन कसा मिळतो व तिला पुन्हा फिर्यादींच्याच घरी कसे राहायला मिळते हा भाग अजून पाहायचा आहे. मराठी सिरीयल्सचे पीनल कोड हे स्वतंत्र आहे हे "आई कोठे काय करते" व इतर अशाच सिरीज मधे दिसले आहे. तसेच काहीतरी असेल.

पुण्यात तरी आम्ही महाजनचा उच्चार कर्जत मधल्या ज ने करतो. कोकणातही तसाच करत असावेत. ही कथा अलिबाग मधली आहे. हिंदी उच्चार वेगळा - जन आणि महाजन मधला ज सेम - आहे हे माहीत आहे.

एनीवे, तर लोकहो या अभूतपूर्व खटल्यात १०-१२ खून केलेल्या, बोटीवर बॉम्बस्फोट घडवलेल्या, सुनेचे अपहरण करून खुनाचा प्रयत्न करणार्‍या व वेळोवेळो विविध कटांत सामील असलेल्या साथीदारांचेही खून केलेल्या आत्याची सुटका केवळ "आकाश ने तक्रार मागे घेतली" म्हणून झालेली आहे! इतकेच नव्हे तर ज्या घरातील लोकांचा तिने खून केला आहे त्याच घरी पुन्हा परत जाण्याचीही मुभा तिला आहे.

ही सुटका आहे की जामीन आहे क्लिअर नाही. तो इन्स्पेक्टर परवा म्हणत होता की आकाश ने तक्रार मागे घेतली तर जामीन मिळू शकतो. पण आत्या तर तिला सोडून दिले म्हणत होती. हा एखादा पैशांच्या फसवणुकीचा किरकोळ सिव्हिल खटला आहे अशा थाटात सगळे चालले आहे. सरकारला यात काही इंटरेस्ट दिसत नाही.

आणि आकाशने तक्रार मागे घेण्याचे कारण तितकेच महान आहे. "अलिबाग वार्ता" हे एकाच वेळेस किरकोळ लाचेवर पाहिजे तशी बातमी देणारे, पण शहर-राज्य लेव्हलचे टॉप चॅनेल आहे. त्यात महाजन कुटुंबाच्या बातम्या त्यात एखाद्या मालिकेतील गप्पांसारख्या सांगितल्या जातात. नुसता "आकाश, टीव्ही लाव" म्हंटल्यावर टीव्ही लावला, की यांचीच बातमी सुरू असते. (आधीही त्यांच्या पेपर मधे आत्याला बिझिनेस वूमन मिळाले ही फ्रंट पेजवर मेन हेडलाइन होती). तर त्या बातमीदार व्यक्तीने यातून काय महाजन गार्मेण्ट्स ही कंपनी टिकत नाही वगैरे "बातमी" दिलेली असते. मग यातून महाजनांची बदनामी, कुटुंब चर्चेत राहणे ई नको म्हणून आकाश "तक्रार मागे घेतो".

अशा गंभीर गुन्ह्यात अशी तक्रार वगैरे मुळात महत्त्वाची नसते. हे खटले सरकार विरूद्ध आरोपी असे असतात. फिर्यादी वि आरोपी असे नव्हे. एखाद्याचा खून केला व त्याच्या मुलाने अहो जाउ द्या म्हंटले तर त्याने काही फरक पडत नाही.

आणि अभिजीत व पौर्णिमा हे आत्याच्या सगळ्या गुन्ह्यांत सामील होते. अभिजितचा अनेक गुन्ह्यांत प्रत्यक्ष सहभाग होता व त्या साक्षीदारांच्या जबानीत ते सगळे ऑलरेडी आलेले असणार. प्रमुख साक्षीदाराने त्याला गोळी लागल्यावर तेथे अभिजितला पाहिलेलेही असते. तरीही ते दोघे मोकळे फिरत आहेत. बहुधा ते सिरीज मधले साइड रोल्स असल्याने त्यांच्या गुन्ह्यांना कोणी विचारत नाही असे दिसते.

आत्या परत घरी आल्यावर मग भूमी व आकाश तिला "बेदखल" करतात. म्हणजे घरातून हाकलून देतात. पुन्हा बहुधा तीच केसरी ट्रॅव्हल्सची रिकामी बॅग दिसते फेकलेली. भूमी अ‍ॅपरण्टली वरती जाउन ती भरून आणते. पण भूमी व आत्या ज्या सहजतेने ती हॅण्डल करत होत्या त्यावरून ती पूर्ण रिकामी होती हे नक्की. नाहीतर इतके लोक तेथे असताना हे महान लोक ६-७ महिने प्रेग्नंट असलेल्या स्त्रीला कपड्यांनी भरलेली बॅग उचलून जिन्यारून खाली यायला व ती उचलून फेकायला लावत होते असा अर्थ होईल.

अजून काही दिव्य भाषांतरे ऐकली. "याची चर्चा शहरभर चालू आहे" हे एक. दुसरे म्हणजे "अजून तुझे दुधाचे दात तुटले नाहीत...". एकूण याच नव्हे तर इतर बर्‍याच मराठी सिरीजमधले मराठीचे वय हे अजून दुधाचे दात न पडलेले तुटलेले आहे.