ओल्या हरभर्‍याची आमटी

एका बाजूला पाणी गरम करत ठेवावे.
दुसरीकडे सोललेले हरभरे, मिरच्यांचे तुकडे अन सोललेल्या लसूण पाकळ्या एका जाड बुडाच्या कढईत कोरड्याच भाजायला घ्यायच्या; मंद आचेवर. नीट भाज बसली नाही तर आमटीला जी अपेक्षित चव आहे ती साधत नाही.
चांगले ५-७ मिनिटं भाजून झाले - मिरच्या लसूण हरभरे यांना काळसर डाग पडले की एक लहान चमचा तेल त्यावर घालायचे आणि पुढे परतत राहायचे. लगेच ते सगळं प्रकरण खर्पुसेल. चांगलं खमंग झालं की गॅस बंद करून थंड होऊ द्यायचं.
गार झालं की मिक्सर ला गुळगुळीत पेस्ट करायची. पाणी वापरून अर्थात.

कोरडी भाज -

तेल घातल्यावर -

त्याच तेलाच्या कढईत उरलेलं तेल तापवून मोहोरीची फोडणी करायची, मोहोरी तडतडली की हिंग आणि लगेच वर ही पेस्ट घालायची. मीठ, साखर ही घालावी. पेस्ट तेलात ४-५ मिनिटं परतून वर बर्‍यापैकी पातळ होईल इतकं कढत पाणी यात ओतायचं. उकळी येइस्तो मोठ्या आचेवर सतत ढवळत राहायचं. उकळी फुटली के पुढे अजून १० मिनिटं तरी आमटी उकळू द्यावी. जरा थिक झाली की ५-७ मिनिटं झाकण घालून मुरू द्यावी आणि गरमगरमच खायला घ्यावी.

उकळतेय. फोटो वाफेमुळे नीट नाही आला.

ज्वारीची भाकरी, भात किंवा नुसतीही प्यायला सुरेख लागते.

या जेवायला ! - वाटीत ही केलेली आमटी, ताटलीत लाल भोपळ्याची बाकर भाजी, मुगाच्या डाळीची आंबट - गोड अशी खिचडी, भाकरी - फुलका, लोणच्यात लिंबू मिरची आणि आवळ्याचं लोणचं आहे.