कोरोना वार्डात मी

Submitted by डॉ.विक्रांत प्र... on 1 June, 2020 - 04:36

कोरोना वार्डात
**********

कोरोना वार्डात
चिंतातुर रुग्ण
दाटलेले प्रश्न
मुखावरी ॥
कुणा थोडा ताप
कुणा लागे धाप
कुणा नसे झोप
रात्रंदिन ॥
बाहेरून बंद
कक्षाचे ते द्वार
चाले येरझार
आतमध्ये ॥
स्वतःहून साऱ्या
घराचीच चिंता
जिवलग चित्ता
सदोदित ॥
परी एकमेका
देऊनी आधार
चाले व्यवहार
सबुरीचा ॥
कोरोनाच्या कथा
डोक्यात नाचती
सांभाळावे किती
मनामध्ये ॥
बेचव ते अन्न
येई भरपूर
परी जाई चार
घास आत ॥
त्यात काही होते
काही चिन्हां विना
नशिबाने त्यांना
साथ दिली ॥
इतरांस तेही
होते सांभाळत
आणि धीर देत
वेळोवेळी ॥
परी काही केल्या
नव्हते सरत
दिन उलटत
भरभर ॥
मग दिनमान
तेही उलटले
आले ते भोगले
भोग सारे ॥
थंडावले युद्ध
रोग ओसरला
परी तो उरला
बंदिवास ॥
भयाची सावली
मिटता उरली
मनी भरलेली
कृतज्ञता ॥
डॉ.विक्रांत प्रभाकर तिकोणे
https://kavitesathikavita.blogspot.com

शब्दखुणा: 
Group content visibility: 
Public - accessible to all site users

खरंय... चित्रदर्शी वर्णन...

या सगळ्या लढ्यामध्ये तुम्हा डाॅ. चा सहभाग हा कौतुकापलिकडील... त्याकरता सर्वच डाॅ. व वैद्यकीय कर्मचारी यांना अनेक सलाम...

____________/\__________