सिंघासन

मी आपला निमित्तमात्र आहे. मला व्यक्तिशः हे सिनेमे बघायला प्रचंड आवडतात कारण हे सिनेमे तुमची नजर तयार करतात. यांचे गूफअप्स इतके ब्लॅटंट असतात की तुम्ही ते कधीच विसरत नाहीत आणि मग हळूहळू तुम्ही प्रत्येक फ्रेम बारकाईने बघू लागता.

भाभू चांगलाच टिकाउ दिसतो. >> हो ना अरे. त्या पब्लिक राजसभेचा फायदा घेऊन भाभूला कोणीही सहज टपकावू शकतं. बहुधा त्याचा आजारलेला चेहरा बघून लोक म्हणत असतील हा तसाही फट म्हणता जाईल. उगाच कशाला कष्ट घ्या.

लग्न न करताच मूल झाले तर? >> २०० मोहोरा. शक्ती कपूर असे कुठेच म्हणत नाही की जन्म कर हा लग्न करानंतरच भरायचा आहे. तुम्हाला लूपहोल काढायचेच असेल तर त्याचे वाक्य नीट ऐका - "जो भी बच्चा जनम लेगा उसके माता पिता को जनम कर देना होगा". समजा मूल झाले आणि त्या मुलाला या लोकांनी द्रोणात ठेवून नदीत सोडून दिले किंवा तत्सम कुंती-इन्स्पायर्ड ट्रिक्स वापरल्या आणि मूल अनाथ वाढले, तर त्याचा कर कसा वसूल करायचा याची तरतूद शक्ती कपूरच्या प्लॅनमध्ये नाही.

आता ते बूबा बूबा गाणे माझ्या डोक्यात बसले >> विकु असे पाताल भैरवी पाहिल्यानंतर माझ्या डोक्यात "एक दुपट्टा दो दो मवाली" बसलं होतं.

तुपारे संपल्याने फोकस इतरत्र जाउ शकतो सध्या >> या सीरिअल्समध्ये काही सेल्फ कंटेन्ड स्टोरी आर्क्स असतात. उदा. श्श कोई हैं मध्ये विक्राल और मायाकाल ची एक मस्त अठरा एपिसोडची आर्क होती. अशा आर्क्स एकदा बघायला पाहिजेत. पण सीरिअल्स अ‍ॅनालाईज करायला खूप वेळ जातो.

६) मुख्य व्हिलन

६.१) फुकाची सोशल कमेंट्री

काही कारणाने आता दिग्दर्शकाला सामाजिक भाष्य करण्याची हुक्की आलेली आहे. लग्नाचा सीन. इतका वेळ अवंती, गांधार अशी उत्तर भारतीय राज्यांची नावे वापरल्यानंतर सामाजिक भाष्य करताना मात्र आपल्या संस्कृतीची आठवण होऊन दाक्षिणात्य पद्धतीने लग्न सुरु आहे. केळीचे खुंट वगैरे आहेत, भटजी सुद्धा दाक्षिणात्य वाटतो. पण शूटिंग करायला बहुतेक लग्नाचा व्हिडिओ करणार्‍या कोणाला तरी बोलावलं आहे कारण अतिशय चुकीचा अँगल लावला आहे. या व्हिडिओमध्ये नवरा नवरी सोडून सर्व दिसावे लागतात कारण मग अनेक वर्षांनंतर घरी पाहुणे आले की त्यांना कटवायला "आमच्या लग्नाच्या व्हिडिओ मध्ये कोण कोण आहे बरं?" असे खेळ खेळता येतात. एखादी बाई आपल्या लहान मुलाला सांभाळण्याची पराकाष्ठा करत असेल तर हमखास तिला फ्रेममध्ये चटकन नजरेत भरेल अशा जागी उभे केले जाते. या फ्रेममध्ये काही कारणाने सर्व पुरुषांना बसवून बायकांना उभे केले आहे. यातून काय साध्य होते? कृष्णालाच ठाऊक. दोन भटजी, नवरा-नवरी आणि त्यांचे आई-वडील, वाटलंच तर एक करवली अशी सुटसुटीत फ्रेम लावण्याऐवजी हा मॅरेज व्हिडिओ याने का शूट केला असेल देव जाणे.

असो, तर सोशल कमेंट्री. हे लग्न अवंती राज्यात चालू असल्याने लग्न झाले की कर द्यावा लागणार. ती वेळ येऊ नये म्हणून हे गुपचुप लग्न उरकत आहेत. पण मग गावजेवण घालण्याची काय गरज आहे? सगळा गाव एका जागी जमा झाला की शिपायांना संशय नाही येणार? बरं यांचे प्रॉब्लेम्स सुद्धा इतके फडतूस आहेत - म्हणे वर गांधाराचा आणि वधू अवंतीची तर लग्न कोणत्या पद्धतीने लावायचं? दुसरा एक भटजी म्हणतो की ते काही नाही आधी मंगळसूत्र घालण्याचा विधी कॉमन आहे, तो तरी व्हायलाच हवा. च्यामारी, असे किती विधी वेगवेगळे आहेत या दोन पद्धतींमध्ये? आणि हे काय बडजात्या वेडिंग आहे का रीतिरिवाज डिस्कस करायला? चार अक्षता टाकून पानं वाढायला घ्यायचं बघावं तर यांचं अजून देवक बसेना. असा फालतू प्रकार करत असल्यावर शक्ती कपूर तिथे येऊन न थडकता तरच नवल!

आंतरदेशीय विवाह होत आहेत याची नोंद घेऊन त्यांनी आंतरदेशीय विवाहांवर वेगळा कर बसवण्याची खबरदारी घेतलेली असते. सोबत अमजद खानही आहे. अमजदच्या सदर्‍यावर ड्रॅगनचे चित्र आहे. पण हा ड्रॅगन सर्पाकृती नसून त्याची शैली मध्यपूर्वे आशियाई वाटते. तसेच बदामाची लागवड सर्वप्रथम पर्शियनांनी करायला सुरुवात केली असा समज आहे. पर्शियन सुपर्ण अहुरमज्दाची पूजा करत असत ज्याचे अस्त्र पाश व भाला (आय थिंक) असते. तसा मागे कोट ऑफ आर्म्स पण आहे. त्यामुळे अमजद हा पर्शियातून प्राणकडे शिकायला म्हणून आला असण्याची शक्यता नाकारता येत नाही. याला पुष्टी देणारा आणखी पुरावा म्हणजे त्याच्या कोट ऑफ आर्म्समध्ये एक सिमिटार पण आहे जी मध्यपूर्वेतली वक्राकार तलवार आहे. अशा कॅरेक्टर्सना "विनोदनिर्मितीचा लहानसा प्रयत्न" करायला ठेवलेले असल्यामुळे चार दोन शेलके विनोद होतात. मग शक्ती कपूर अत्याचाराचे शस्त्र उगारतो आणि हिरोची एंट्री होते.

६.२) बापने मारी मेंढकी, बेटा तीरंदाज

जॅक-१ ला कोणीतरी काहीतरी करेपर्यंत विंगेत दबा धरून बसायची भारी खोड आहे. इथे तो शक्ती कपूर तलवार उगारायची वाट बघत एका झाडावर बसून आहे. तलवार उगारता क्षणी तो बाण सोडून याची तलवार खाली पाडतो. आता काळा सुती सदरा, त्यावर बाणांचा भाता बांधण्याच्या दृष्टीने छातीवरून घेतलेले दोन पट्टे, हातात धनुष्य आणि डाकू स्टाईलचे तोंडावरून ओढलेले फडके असा विक्रमसिंगचा वेष आहे. गांधारामध्ये भरपूर अत्याचार निर्दालन केल्यामुळे तो अवंतीत आपला अन्याय निवारणाचा बिझिनेस एक्स्पांड करू बघतो आहे. आधी तो शक्ती कपूरला म्हणतो की तुम्ही कोण कर लादणारे? शक्ती कपूर म्हणतो आम्ही आमच्या राज्यात काहीही करू, जाब विचारणारा तू कोण उपटसुंभ? यावर जितेंद्र उत्तरतो की आधी हे लक्षात घे की मी असेपर्यंत तू अत्याचार करू शकणार नाहीस. समोरच्याचा प्रश्न काय, आपण देतो आहे ते उत्तर काय कशाचा काही संबंध नाही. शाब्दिक बाचाबाची झाल्यावर जितेंद्र म्हणतो की तुला धडा शिकवण्याकरिता माझी करंगळीच पुरेशी आहे. एवढं बोलून तो एक बाण मारून शक्तीचा मुकुट पाडतो.

एकतर यात करंगळीचा कुठे संबंध आला? मेरे बाये हाथ का खेल पर्यंत ठीक होतं, मेरी छोटी उंगली काफी हैं काय? दुसरं म्हणजे जितेंद्राला धनुष्य कसे काम करते हे अजिबात कळलेले नाही. तो बाण मारत नाही, तो बाण भिरकावतो. तो प्रत्यंचा तर्जनी, मध्यमा, अंगठा आणि बाण यातील पोकळीत धरून ओढतो. असलं काहीतरी जमत असतं तर एकलव्य अंगठा गमावूनही श्रेष्ठ धनुर्धर राहिला असता. अंगठ्याचा वापर करून प्रत्यंचा ओढणे आणि तर्जनी, मध्यमेने बाणाला स्थिर ठेवणे हे भ्याड लोकांसाठीचे तंत्र असल्याने तो असलं काही करत नाही. धनुष्याला आधार देणार्‍या हाताच्या तर्जनीने बाणाला अ‍ॅडिशन सपोर्ट देऊन नेम धरणे वगैरे गोष्टी ज्यांचा नेम नॅचरल नाही अशांसाठी आहेत. त्यामुळे त्याचे भिरकावलेले बाणही बरोब्बर निशाण्यावर लागतात आणि विक्रमसिंग फार मोठा तीरंदाज असल्याचे सिद्ध होते.

६.३) महाराणी आणि मुहूर्त

प्रत्यक्ष फाईट फारच स्ट्रेटफॉरवर्ड आहे. जितेंद्र आणि त्याचे लोक बाणांचा वर्षाव करतात समोर शत्रु दिसत असतानाही शक्ती कपूरचे लोक लगेच हतबल होतात आणि हार मानून पळून जातात. अमजद खान हिंमत करून जितेंद्राच्या अगदी जवळ जातो आणि विचारतो की आमची धुलाई करणार्‍या महावीराचे नाव कळू शकेल काय? कसं आहे की परत गेल्यावर सांगता येईल आमची ही अवस्था कोणी केली बादाम खाके. जितेंद्र पण फारसे आढेवेढे न घेता सांगतो की मी विक्रमसिंग आहे.
मग प्रेक्षकांसाठी माहितीचे आदानप्रदान होते. विक्रमसिंग अपराजिता देवीच्या जंगलात वास्तव्य करून आहे तर अमजद खानचे वडील प्राणचे मित्र होते. प्राणला आपल्या लोकांच्या झालेल्या फजितीचे वैषम्य वाटत असले तरी तो राग आवरतो. प्राणच्या दालनात इजिप्शियन फराओ सारखे एक आसन आणि सिंगापुरी सिंहमूर्ती आहेत. शक्ती कपूर बढाई मारतो की तो जंगलात जाऊन विक्रमसिंगला पकडून आणेल. प्राणला त्याची कुवत ठाऊक असल्याने तो हे बोलणे हसण्यावारी नेतो.

तिकडे जॅक-२ आणि बेडकीचा रोमान्स जोरात चालू आहे. जॅक-२ आता तिला रेग्युरली भेटायला जातो आणि तीही त्याची वाट बघत असते. धबधब्यावर एक सांकवही बांधला गेला आहे याच्या येण्याजाण्याकरता. तिची हेअरस्टाईलही आता ऋषिकन्येप्रमाणे राहिली नाही. आता एक बँड लावून केसांचा पोंगा उजव्या बाजूला सोडला आहे. गळ्यातले आणि कानातले सुद्धा अपग्रेड झाले आहेत. जॅक-२ तिला ब्रँडेड गिफ्टा देत असणार यात शंका नाही. जॅक-२ ला आता लग्नाची स्वप्ने पडत आहेत. तो मुहूर्त बघायला लागला आहे. पण हिला राजमहालात यायची घाई झाली आहे. जॅक-२ म्हणतो की जरा थांब. तुझं मी राणीसारखं स्वागत करायचा प्लॅन आखला आहे. रस्त्यांवर मोती, हिरे, जवाहिर पसरवून टाकेन छाप "अमीर लोग" प्लॅन आहे त्याचा. एकंदरीत अवंतीची महाराणी जिचे कूळ आणि मूळ माहित नाही अशी मुलगी होणार हे नक्की आहे.

तिकडे गांधाराची परिस्थिती अजूनच बिकट आहे. जयाप्रदा गांधाराची महाराणी होणार हे तर निश्चित आहे पण तिचा महाराज कोण हे अजून निश्चित नाही. भाभूचेही वय होत चालले असल्याने तो जयाप्रदालाच राजतिलक करून गादीवर बसवायचा विचार करतो आहे. त्यानुसार चैत्र शुद्ध सप्तमीचा मुहूर्त काढला आहे. यात एक छोटीशी अडचण आहे. राजतिलक करण्यासाठी गरजेचा असा राजमुकुट चोरीला गेला आहे आणि तो अजून परत मिळालेला नाही. भाभू म्हणतो की अजून धीर नाही धरवत. रिप्लेसमेंट म्हणून एक फुलांचा मुकुट बनवा आणि तो वापरू. इथे प्रथमच गुलशन ग्रोव्हर फोकसमध्ये दिसतो. ज्या रीतिने तो कादर खान शेजारी उभा आहे ते बघता तो कादर खानचा मुलगा असावा हे मानायला वाव आहे. भाभू कादर खानला सर्व बंदोबस्त करायची आज्ञा देतो, कादर खान हो म्हणून गुलशनसोबत निघून जातो.

६.४) भविष्यवाणी

आता जी गुफा आधी जितेंद्राचा अड्डा म्हणून दाखवली होती, तीच थोडे फेरफार करून कादर खानचा खुफिया अड्डा म्हणून दाखवली आहे. कादर खान आणि गुलशन ग्रोव्हरने कटैया, कालभैरव वगैरे सामंतांना या खुफिया अड्ड्यावर बोलावून घेतले आहे. काय बरे काम पडले, अशी विचारपूस चालू असतानाच तिथे अमजद खान येतो. तो भविष्यवाणी येत असल्याची वर्दी देतो. मुख्य व्हिलन येतो आहे हे ऐकून प्रेक्षक सावरून बसतो.

प्रत्यक्ष रिव्हील जरा अंडरव्हेल्मिंग आहे. भविष्यवाणी कादर खान किंवा प्राण यापैकीच असला पाहिजे हे जितेंद्रला ते पत्र सापडते तेव्हाच सांगता येते. आता कादर खान ऑलरेडी तिथे असेल तर येणारा भविष्यवाणी प्राणच असला पाहिजे. तसेही मुख्य व्हिलनला साजेशा प्लॅनिंगची त्याने चुणूक दाखवली आहे (विषकन्या) ते बघता प्राण भविष्यवाणी आहे हे खूप आधीच सांगता येते. प्राण आणि शक्ती कपूर मग मीटिंग जॉईन करतात. प्राण मग अजेंडा सांगू लागतो. प्रॉब्लेम असा झाला आहे की भाभूने अचानक जयाप्रदाचा राजतिलक करायचा ठरवला आहे आणि व्हिलन गँगला रिअ‍ॅक्ट व्हायची संधी मिळाली नाही. काही कारणाने प्राणला देखील जयाप्रदाचा राजतिलक होणे पसंत नाही. त्यामुळे तो कालभैरव, कटैया गँगला चिथावतो आहे. त्याचे म्हणणे असते की राज्याचा शासक पुरुषच हवा आणि स्त्रीची शासक म्हणून नेमणूक अपमानास्पद आहे. एका कसलेल्या मुख्य व्हिलनप्रमाणे प्राण या सामंतांच्या सुप्त इच्छेला सेक्सिझमचा वापर करून खतपाणी घालतो आहे. पण तेवढ्यावरच प्राणचं प्लॅनिंग थांबत नाही.

त्याचा सल्ला असा - जर मुहुर्ताच्या वेळी काही करून जयाप्रदाचा राजतिलक होऊ दिला नाही तर जनतेत खळबळ माजेल कारण पब्लिक डिसक्लोजर! अशावेळी जर कोणी महापुरुष पुढे आला आणि त्याचा राजतिलक झाला तर अँक्झाईटी रिडन जनता त्याला पाठिंबा देईल. एवढे बोलून तो साळसूदपणे सुचवतो की महामंत्री भानूप्रतापचा मुलगा कालकेतु गांधाराच्या गादीवर बसावा. इथे प्रेक्षकाची अवस्था - कालकेतू? कौन हैं कालकेतु? कालकेतु कौन है? अखेर कळते की गुलशन ग्रोव्हरचे नाव कालकेतु असून तो कादर खानचा मुलगा आहे. प्राण इकडे फार दूरची खेळी खेळतो आहे. तो सामंतांना पूर्ण स्वायत्तता देण्याच्या बदल्यात गुलशनचे राजपद फिक्स करून घेतो. मग १ तास पाच मिनिटांनी अखेर गुलशनला एक डायलॉग मिळतो. विक्रमसिंगने काही सामंतांना आपल्या बाजूने वळवून घेतले आहे. जितेंद्र आपल्यासोबत राजकीय डावपेच करत असल्याचे समजल्यावर प्राण छद्मी हसतो. इथे "हां मालूम हैं चल अपने बाप को मत सिखा" अ‍ॅटिट्यूड आहे. प्राणचा प्लॅन मग कादर खान इस्कटून सांगतो गांधाराची ती पब्लिक राजसभा एका किल्ल्यात भरते. हा किल्ला पूर्वेकडून समुद्राने वेढलेला आहे. तरी उत्तरेकडून कालभैरव, दक्षिणेकडून विजयसिंग आणि पश्चिमेकडून कटारी कटैया सामंतांचे नेतृत्व करतील. राजतिलकाच्या दिवशी अचानक हल्ला करून गांधाराच्या सेनेचा नि:पात करायचा असं ते सगळं प्लॅनिंग.

मुख्य व्हिलनने प्लॅन तर जोरदार बनवला आहे. यावर हिरो लोक काय प्रत्युत्तर देतील?

प्राणच्या महालात एक इजिप्शियन बनावटीचे सिंघासन आहे >> केला आहे उल्लेख. माझी थिअरी अशी आहे की प्राण आयोनियामधील यातुधान वगैरे असावा नाहीतर इजिप्शियन सिंहासन आणि विषकन्या रेसिपी वगैरे प्रकार कसले जमायला त्याला?!

हे जर 'द कॉमेडी ऑफ एरर्स' लिहिणार्‍या शेक्सपीयरने पाहिले असते, तर 'येथे कर माझे गळती' म्हणत हतबुद्ध होऊन बसला असता! >> जितेंद्र बॉलिवूडच्या इतिहासातला सर्वाधिक एंटरटेनिंग हिरो आहे असे माझे नम्र मत आहे. इतर हिरो अधिक लोकप्रिय किंवा अधिक अभिनयकुशल असतील पण प्रेक्षकांच्या करमणुकीचा चोवीस तास विचार करणार्‍यांमध्ये जितेंद्राचा नंबर फार वरचा आहे.

७) बेबच्या राज्यारोहणासाठी दाही दिशा

७.१) प्रभावी टॅक्टिक्स लढाई जिंकून देतात

जसे मंगल कार्यालयांमध्ये वेगवेगळ्या मजल्यांवर वेगवेगळी कार्ये सुरु असतात तसे त्याच गुहेच्या सेटच्या दुसर्‍या भागात जॅक-१ आपली मीटिंग घेतो आहे. इथे प्रथमच एखाद्या बॉलिवूड हिरोने प्रपोझिशनल लॉजिक वापरले आहे. विक्रमसिंग सांगतो की अभंगदेवच भविष्यवाणी आहे. आता त्याला हे कळण्याचे खरे काही कारण नाही. त्यामुळे त्याने मोडस पोनन्डो टोलन्स वापरला असलाच पाहिजे. विक्रमसिंग्ज प्रूफ
१) अभंगदेव किंवा भानूप्रताप वगळता कोणी इतर भविष्यवाणी असू शकत नाही.
२) भानूप्रताप भविष्यवाणी नाही. जर तो असता तर त्याला जहागीरदारांपर्यंत खजिना जंगलामार्गे पाठवायची गरज नाही. तो हे सर्व लीगल मार्गांनी करू शकतो.
३) मोडस पोनन्डो टोलन्स => अभंगदेव भविष्यवाणी असलाच पाहिजे.
(याचं प्रपोझिशनल लॉजिक वापरून फिच स्टाईलचं प्रूफही लिहिता येईल - http://logica.stanford.edu/logica/homepage/fitch.php. क्ष आणि य असे दोन प्रिमाईस घेऊन क्ष एक्सऑर य आणि मग ~य अझंप्शन करून सोडवता येईल.)
तसेही इतके पैसे पाठवायचे तर मुळात ते व्हिलनकडे पाहिजेत. कसले कसले कर लावून प्राण तितका श्रीमंत झाला आहे हे जॅक-१ ला कळले असल्याने त्याच्याकडे तार्किक सिद्धतेला पुष्टी देणारा पुरावाही आहे. मग जितेंद्र लाल रंगाचा फेटा घालून येरझार्‍या घालत आपले तर्क सांगतो आहे. ग्रीकोरोमन ब्याकग्राऊंड बघता हा प्लेटोवादी (किंवा येरझारावादी) असावा. अलकनंदेचा राजतिलक समारोह होणार आहे हे त्यालाही कळलेले आहे (पब्लिक डिसक्लोजर). प्राण ही संधी दवडणार नाही हे जाणून तो तर्क करतो की त्याने कादरखानच्या मदतीने जहागीरदारांची मोट बांधली असणार. एक एक्सट्रा याची बडबड संपावी म्हणून विचारतो की यावर आपली योजना काय आहे?
तो म्हणतो सिंपल आहे, हे लोक जंगलातून येत असतील. तर रामसिंग तू पश्चिमेस जा, महावीर तू उत्तरेस जा, मानसिंग तू दक्षिणेस जा, आणि तिघे मिळून गांधारात यायच्या रस्त्यांना बंद करून टाका. गद्दारांना मारुन टाका किंवा पळवून लावा, पण त्यांना राज्यात पोहोचू देऊ नका. मग तिथे नसलेल्या अभंगदेवला उद्देशून तो म्हणतो की तू अगस्त्य ऋषींप्रमाणे कूटनीति वापरून गांधारा राज्याचा नि:पात करण्याची योजना आखली आहे पण हे षडयंत्र विफल होऊन तुझा पराभव निश्चित आहे. इथे कोणत्या पुराणकथेचा रेफरन्स आहे हे ते काही कळलेले नाही.

मग काय व्हायचे तेच होते. जंगलातून एवढे प्रचंड घोडदळ नेणे काही खायचे काम नाही. त्यात जितेंद्रकडे जंगलात लपून अचूक नेम असलेल्या तिरंदाजांची फौज आहे. असा स्ट्रॅटेजिकल मिसमॅच प्राणसारख्या तज्ञ माणसाच्या लक्षात येऊ नये ही खेदाची बाब आहे. बघता बघता बाणांनी सर्व सैनिक टिपले जातात. काही सेना नदीमार्गे येण्याचा प्रयत्न करते. तर नदीमध्ये या लोकांनी करवती, काटेरी अडसर लावलेले असतात. त्याला अडखळून घोडे नदीत पडतात आणि असहाय सैनिकांना बाणांच्या मदतीने टिपले जाते. काही ठिकाणी झाडांना मोठे मोठे थर्माकोलचे काटेरी लोहगोल बांधून ठेवलेले आहेत. ते गोळे मारून उरल्या सुरल्या सैनिकांचा नि:पात केला जातो.

७.२) रिस्की मूव्ह

तिकडे विक्रमसिंगला व्हिलन लोकांच्या गुहेचा पत्ता सापडला आहे. तो तिथे एकटाच काळा फेटा, कटैयाला हरवताना घातलेले जाकीट घालून जातो. रिस्की मूव्ह! पण व्हिलन लोक त्याच्याहूनही मूर्ख असल्याने तिथे एकच माणूस मागे सोडला आहे. हा बहुतेक तोच का.क. डाकू आहे ज्याने मुकुट चोरला होता. तो जितेंद्राला बेसावध समजून त्याच्यावर वार करतो पण जितेंद्र हॅज गुड रिफ्लेक्सेस. तो शिताफीने का.क.डा. चा वार चुकवून त्याला आपल्या तलवारीच्या धारेवर धरतो. विक्रमसिंगला आपल्या बेबचा राजमुकुट परत हवा आहे. का.क.डा. आधी आढेवेढे घेतो पण समोरचा प्राणी विक्रमसिंग आहे हे समजताच मुकुट समोरच्या गुहेत आहे असे सांगतो. मग जॅक-१ त्याला बेशुद्ध करून मुकुट ठेवलेल्या गुहेत प्रवेश करतो.

हा तोच सेट आहे फक्त लायटिंग मारून वेगळ्या गुहेत आल्याचा आभास निर्माण केला गेला आहे. या गुहेत कोळिष्टके लोंबताना दाखवली आहेत. हे कसं शक्य आहे? का.क.डा. च्या म्हणण्यानुसार या गुहेत मुकुट ठेवला आहे. आता ही गुहा प्राणच्या मीटिंगच्या गुहेला लागूनच आहे. म्हणजे तिथे लोकांचे येणेजाणे आहे. का.क.डा तर इथे राहतो आहे. मग तो जागेची किमान साफसूफ करणार नाही? का प्राणला आपल्या कारस्थाने करण्याच्या जागेच्या स्वच्छतेशी काही घेणेदेणे नाही? हे कमी म्हणून तिथे झाडांची मुळे दिसत आहेत. म्हणजे ही गुहा जमिनीच्या खाली आहे आणि वरच्या झाडांची मुळे छप्पर फोडून आत आली आहेत. ही गुहा डेंजरस आहे. जर भूकंप आला आणि विक्रमसिंगच्या डोक्यावरच छप्पर कोसळले तर? (हा विचार "ए आई आपण बुंग मध्ये बसलो, वर आभाळात गेलो आणि अचानक बुंग बंद पडलं तर?" वरून प्रेरित आहे) विक्रमसिंगची ही मूव्ह किती रिस्की आहे हे त्याचे त्यालाच उमगलेले नाही. थोडे पुढे जाताच एक नारळाचे झाड दिसते आहे. गुहेत नारळाचे झाड? लाईक सीरियसली, एकालाही गुहेत नारळाचे झाड दाखवायच्या कल्पनेवर फेरविचार करावासा वाटला नाही?

७.३) जॅक वि. ड्रॅगन

हे कमी म्हणून तिथे सहा तोंडांचा एक ड्रॅगन पण आहे. जर हा नऊ तोंडांचा असता तर त्याला हायड्रा म्हणता आले असते आणि जॅक-१ हर्क्युलस म्हणता आला असता. ग्रीक प्रेरणांची कन्सिस्टन्सी पण राखता आली असती. आता तसे काही झालेले नाही बट दे ट्राईड!!! या ड्रॅगनचाही जितेंद्र इतकी रिस्की मूव्ह करत आहे यावर विश्वास न बसल्याने त्याचे डोळे बाहेर आले आहेत. प्रत्येक तोंडाला गोलाकार लाल डोळे आहेत जे चमकत आहेत. याला पापणी नसल्याने त्याचे डोळे पाकपूक करत आहेत ते तो अ‍ॅक्चुअली मिचकावत आहे असे म्हणावे लागेल. हा साप मुकुटाच्या रक्षणासाठी तैनात केला आहे. आता एवढा जबर्‍या प्राणी रक्षणाकरता असताना त्या टुकार का.क.डा. ची गरज ती काय? असो, या ड्रॅगनच्या पाठीवरच्या शिंगसदृश खवल्यांमध्ये (scute) मुकुट ठेवला आहे. जितेंद्र ड्रॅगनची नजर चुकवून मुकुट काढता येतो का ते बघतो.

ड्रॅगन भलताच चतुर असतो. जितेंद्र जवळ येतो आहे हे बघून तो आग ओकतो. जितेंद्र सुरक्षित अंतर ठेवल्याने वाचतो पण आग त्याच्या बर्‍याच जवळून जाते. इथे ड्रॅगनचे पाय दिसू शकतात आणि हा साप नसून ड्र्रॅगनच आहे यावर शिक्कामोर्तब होते. आता ड्रॅगन हळू हळू जॅक-१ च्या दिशेने सरकतो आहे. त्याचा इरादा निश्चितच जॅक-१ ला भस्म करण्याचा आहे. गंमत म्हणजे इथे त्याच्या चारच तोंडांतून आग निघते आहे. बहुधा दोन तोंडांचे इंधन संपले असावे. जॅक-१ मागे मागे सरकत जातो आणि अखेर एका द्रवकुंडाच्या कडेला येऊन थबकतो. द्रवकुंडातील द्रवामधून बुडबुडे निघत असल्यामुळे तो द्रवपदार्थ आम्लीय (अ‍ॅसिड) असल्याचे स्पष्ट होते. पुढे आग मागे आम्ल अशा अवस्थेत आपला हिरो अडकला आहे.

पण अतिशय कन्व्हिनिअंटली या कुंडाच्या मधोमध एक दगडी स्लॅब आहे. ही स्लॅब जणू तिथे बसून कोणीतरी आंघोळ करणार आहे अशा रीतिने बनवली आहे. अर्थात जॅक आधी स्लॅबवर उडी घेतो आणि मग आणखी एक उडी मारून दुसर्‍या कडेला जातो. या दुसर्‍या कडेला गुहेच्या वरच्या मजल्याकडे जाणारा रस्ता आहे. या रस्त्याने जॅक ड्रॅगनच्या नजरेच्या टप्प्याच्या बाहेर जातो. अतिशय जुना डिक्टम आहे, हायर अल्टिट्युड प्रोव्हाईड्स टेरेन्शिअल अ‍ॅड्व्हांटेज. आता जितेंद्र अधिक उंचीवर असल्यामुळे त्याचे पारडे जड आहे. पण ड्रॅगनही पक्का असतो. तो आपल्या शेपटाच्या मदतीने जॅकला खाली पाडतो. आता उडी मारून टेलिपोर्ट होणे या सुपरपॉवरचा उपयोग करण्याशिवाय पर्याय उरत नाही. तसा मग तो उडी मारून मुकुट हस्तगत करतो. आता ड्रॅगनशी लढा देऊन मरण्यात काहीच हशील नसल्याने तो तिथून काढता पाय घेतो.

७.४) राज्यारोहण सोहळा

तिकडे राजधानीत कादर खान, गुलशन ग्रोव्हर, कालभैरव, कटैया प्रभूती उपस्थित आहेत. निश्चितच ते आपापल्या सेना कधी राजधानीत पोहोचतात याची वाट बघत आहेत. तोवर भाभू आणि जयाप्रदासमोर नाटक करण्याशिवाय गत्यंतर नसल्याने कादर खान जमलेल्या आबालवृद्धांचे स्वागत करतो. काहीबाही संस्कृत श्लोक म्हटले जात आहेत. जयाप्रदा भरपूर दागिने घालून प्रवेश करते. इथे हिची केशभूषा देवसेनेसारखी आहे. मागून पुष्पवर्षाव करायला दोन दासी ठेवल्या आहेत. भाभू लगेच उठतो आणि तिच्यासाठी सिंहासन रिकामे करतो. भटजी निर्विकारपणे राजमुकुट घालायला सांगतो. हा टोन "हं आता पळीभर पाणी ताम्हनात सोडा" वाला टोन आहे. जयाप्रदा टेचात डावा हात सिंहासनाच्या कडेवर रेलून बसली आहे. पण भाभू राजमुकुटाच्या उल्लेखाने भावुक होतो (म्हणजे आमचा आपला अंदाज कारण त्याच्या चेहर्‍यावर तेच सदैव दुर्मुखलेले एक्सप्रेशन. बैजु बावरात याची मीनाकुमारी मेल्यापासून हा मनापासून हसलाच नाही). तो म्हणतो की फुलांचाच मुकुट आहे चालेल. इथे तो पुरोहित/भटजी एवढा घाईत आहे की भाभूचा डायलॉग पूर्ण होण्याची वाट न बघता तोच फुलांचा मुकुट भाभूच्या हातात देतो. असा हा "फुलं नाहीत तर मंत्रपुष्पांजलीला अक्षता वापरा" स्टाईल राज्यारोहण संस्कार सोहोळा बघून प्रेक्षकाच्या दगडी हृदयालाही पाझर फुटू शकतो. पण विक्रमसिंगला हे मंजूर नसते.

तो जोरात ओरडून सगळ्यांचे लक्ष वेधून घेतो. हा प्राणी सिंहासनासमोरच्या सज्जात राजमुकुट घेऊन उभा आहे. हा इथे कधी आला? कुठून आला? सगळे दरवाजे बंद दिसत असताना याला आत कोणी घेतले? हे असे सर्व प्रश्न व्यर्थ आहेत कारण जॅक-१ कोणासाठीही कुठेही विंगेत दबा धरून बसू शकतो. इथे तो भाभू "राजमुकुट नाही" याची जाणीव होऊन कधी भावुक होतो याची वाट बघत विंगेत थांबला आहे. इथे केवळ कॅमेरा पॅनोरमा प्रमाणे फिरवून जितेंद्राचा चांगली क्लोजअप लावता येत नाही म्हणून कट दिला आहे. अन्यथा कटैया सीन प्रमाणे कॅमेरा कितीतरी अंशात फिरवून जितेंद्र दाखवायला कमी केले नसते. आपला हिरो बघून जयाप्रदा एक्साईट तर कादर खानची पाचावर धारण. तो सांगतो की हे बघा मी राजमुकुट घेऊन आलो. त्याचे भाषण कटैया इतक्या सिन्सिअरली ऐकतो आहे की ते एक डाव बघण्यासारखे आहे. जयाप्रदा यावर एक्साईट स्क्वेअर. आपला प्लॅन बोंबलतो आहे हे लक्षात येऊन कादर खान हलकेच कालभैरवला इशारा करतो. भाभू राजमुकुट ताब्यात घेऊन जितेंद्रला थँकयू म्हणतो. आता याचे राजद्रोहाचे आरोप वगैरे सगळे विसरायचे. जयाप्रदाला मुकुट घालणार इतक्यात कालभैरव म्हणतो "ठहरो!! क्या आपने पंखा बंद किया?" (मुकेश खन्ना कुजबुजतो - अरे तू भीष्म नाही भीम, हा डायलॉग तुला नाही मारता येणार)

७.५) व्हिलन लोक, स्त्री राज्य, आणि हमारा अगला पिलान

इतक्या सहजासहजी राज्यारोहण सोहळा होऊ दिला तर ते व्हिलन लोक कसले! कालभैरव एक लास्ट ट्राय म्हणून ओरडतो की ठहरो!! पण जॅक-१ ठरवून आलेला असतो की आज आर या पार. आपल्या बेबचा राजतिलक आज झालाच पाहिजे. तो म्हणतो कोण आहे रे तो जो ऑब्जेक्शन घेतो आहे? कालभैरवसाठी सुद्धा आता परिस्थिती हातघाईवर आलेली आहे. सेना अजूनही आलेली नाही पण विक्रमसिंग पोहोचला आहे. म्हणजे काहीतरी प्रॉब्लेम झालेला आहे. आता या तर वेळकाढूपणा करता येईल किंवा उघड उघड आव्हान देता येईल. वेळकाढूपणा तरी कितीवेळ करणार? त्यामुळे तो थेट सांगतो की माझी या राजतिलकाला हरकत आहे. कादर खान अधिक पॉझिटिव्ह असल्याने त्याला अजूनही सेना येण्याची आशा असते. त्यामुळे तो वेळकाढूपणा करायचे ठरवतो. तो कालभैरवचे ऑब्जेक्शन चर्चेला घ्यायचे ठरवतो.

जितेंद्र म्हणतो की असल्या टुच्च्या जहागीरदारांच्या मताला किंमत द्यायचं काही कारण नाही. कादर खान त्याला म्हणतो की असं नाही चालत बाबा, समजा सगळ्या जहागीरदारांनी एकत्र हरकत घेतली तर यांना कोण हँडल करेल? जितेंद्र आवाज चढवू बघतो तर तो म्हणतो "ए गप ए". आता पुन्हा एकदा सोशल कमेंट्री मारण्याची वेळ झाली आहे. कालभैरव, कटैया वगैरे बोंबा मारू लागतात की आम्ही स्त्री-शासक कदापी मान्य करणार नाही. स्त्रिया राज्यकारभार सांभाळण्यास सक्षम नाहीत - टिपिकल इनसेक्युरिटी काँप्लेक्स वाली बडबड. कालभैरव तर इतका तापतो की त्याला एका दमसासात एक वाक्य बोलता येत नाही. जयाप्रदा जर इथे "दादा श्वास घ्या जरा. मी किंवा कादर खान कुठे पळून जात नाही. पाणी पाहिजे का तुम्हाला? विकुडार्लिंग, जरा आपल्या तलवारीचे पाणी पाज कालभैरव दादांना" असा काही ड्वायलॉक मारती तर बहार आली असती. पण दिग्दर्शक ड्वायलॉक नाही तर सोशल कमेंट्री मारण्यात इंटरेस्टेड असल्याने तसे काही होत नाही.

जितेंद्र मग डायलॉग मारून जयाप्रदाला डिफेंड करू लागतो. एकतर जयाप्रदा स्वत:ला निश्चितपणे डिफेंड करू शकते - श्रीराम लागूंनी सांगितल्याप्रमाने युद्धनीति तथा राजनीति में निपुण - पण तिला समजा आपल्या तोंडाची वाफ दवडायची नाही, पब्लिक प्रॉसिक्यूटर सुजित कुमार अशावेळी कुठे तडमडला? आणि विक्रमसिंग व कालभैरव मधूनच नरुटो-स्टाईल टॉक-नो-जुत्सू अर्थात वाकयुद्ध सुरु करतात ते सगळे मद्दडासारखे बघत काय उभे आहेत? जितेंद्राचा मुद्दा त्या काळातला पॉप्युलर मुद्दा आहे. तुम्ही पूजा करता ती देवी देखील स्त्रीच आहे. जयाप्रदा विरोधात जाऊन तू देवीचा अपमान करतो आहे. गार्गी-मैत्रेयी ही दोनच नावे सगळ्यांना माहिती असल्याने त्यांचा उल्लेख होतो. खरंतर दाक्षिणात्य डिरेक्टरने किमान लोपामुद्रेचा उल्लेख करायला हरकत नव्हती. बट दे ट्राईड!! बापडी जयाप्रदा एवढ्यानेही खुश होते.

कालभैरव अजूनही टेचात असतो कारण सेना येण्याची आशा असते. जितेंद्र हसून त्याला म्हणतो "अहो मूर्ख मी इथे आलो आहे याचा अर्थ तुमच्या सेनेचा धुव्वा उडाला असून तुमच्या प्लॅनचा बोजवारा वाजला आहे एवढंही कळू नये?" आता यावर अगला पिलान द्यायची वेळ झालेली असल्याने कालभैरव मरेस्तोवर विरोध करण्याचा निर्णय घेतो. जितेंद्रही म्हणतो की तुझ्या मरण्याची वेळ झाली आहेच. चल फैसला करूनच टाकू.

ही रोमहर्षक लढाई कोण जिंकेल या व्यर्थ प्रश्नाच्या महा ऑब्व्हिअस उत्तरावर विचारमंथन पूर्ण होताच पुढील रसग्रहण घेऊन हजर होईन.

राज्यशास्त्राची माहिती भारतीय जनतेस सोप्या शब्दात व्हावी या उद्देशाने हा सिनेमा काढला आहे असा माझा अंदाज आहे. >> सोळा आणे सहमत.
ऑर्वेलियन विचाराने राखाडी रंग >>

सामंत वगैरे इतका भारी शब्द पयास ने वापरला आहे...त्याला सिनेमात काय म्हटलं आहे? >> जागीरदार

संबंधित अधिकारी इकडे लक्ष देतील काय ? >> ते गाणे यायला सिनेमात अजून एक तास आहे. बाराव्या किंवा तेराव्या भागात त्या गाण्यावर भाष्य असेल.
jaya prada where she wears a peacock theamed dress >> हे गाणे आधी येते.