श्री पंढरीनाथ महाराज

Submitted by पुरंदरे शशांक on 16 July, 2019 - 23:47

श्री पंढरीनाथ महाराज

परब्रह्म दिव्य । भले साकारले ।
सुंदर सावळे । पंढरीत ।।

कटीवरी कर । विटेवरी उभे ।
रखुमाई शोभे । वामांगी ती ।।

मस्तकी किरीट । मकर कुंडले ।
गळा माळ रुळे । तुळशींची ।।

अर्ध उन्मिलित । नयने न्याहाळी ।
मांदियाळी भली । भक्तांची की ।।

झळके बरवे । स्नेह मुखावरी ।
सस्मित अधरी । श्रीहरीच्या ।।

नाभी नाभी ऐसे । भक्तांसी कौतुके ।
आश्वासित देखे । प्रेमभरे ।।

भाव देखोनिया । अति शुद्ध एक ।
होतसे पाईक । भक्त काजि ।।

सद्गुरु कृपेने । घडते दर्शन ।
संसार निर्शन । होवोनिया ।।
..................................................................

अर्ध उन्मिलित.... अर्धोन्मिलित.. थोडे मिटलेले, थोडे उघडे
अधरी..... ओठांवर
मांदियाळी....समुदाय
नाभी... भिऊ नकोस
पाईक...सेवक
भक्त काजि .... भक्तांकरता
निर्शन... निरसन

जय जय विठोबा रखुमाई

Group content visibility: 
Public - accessible to all site users

फारच छान...!!!

श्री पंढरीनाथ महाराज की जय...

नाभी नाभी ऐसे । भक्तांसी कौतुके ।
आश्वासित देखे । प्रेमभरे ।।

भाव देखोनिया । अति शुद्ध एक ।
होतसे पाईक । भक्त काजि ।।

विशेष आवडले....

सुंदर