नाचे नागीन गली गली

दिग्दर्शकाची STEM प्रती असलेली निष्ठा यातून दिसून येते. >> +1 जबऱ्या निरीक्षण टण्या, माझ्या नजरेतून हे सुटले होते.

टण्या _/\_

पण ते पुस्तक शोधून काढून त्याचे परीक्षणही वाचणे या सिद्धीपर्यंत जाणे म्हणजे टोटल रिस्पेक्ट >> ही सिद्धी तर या सिनेमातल्या सो कॉल्ड सिद्ध पुरुष, सत्येन कप्पूलाही साध्य झालेली नसावी!

ही साहिला HAHK मधली स्वीटी आहे का?? >> हो.

९) इच्छाधारी नागांची लोकसंख्या घटते आहे यात नवल ते काय?

९.१) नागिणींचे आवडत्या संगीतकारांत नौशाद यांचा समावेश होतो

बहुधा तरी सेठ गिरधारीलालच्या बंगल्यातच काहीतरी प्रॉब्लेम आहे. मीनाक्षीचे इतका वेळ बरे, बॉलिवूड बंजारन श्ट्यांडर्डने उत्कृष्ट, असलेले कपडे हळूहळू साहिलाच्या वळणावर जाऊ लागलेले दिसतात. १९४९ च्या दिल्लगीमधले "तू मेरा चांद मैं तेरी चांदनी" हे गाणे गुणगुणत ती नितीश (नाग) साठी जेवण घेऊन चाललेली असते. वाटेत तिला साहिला हटकते. साहिलाचा फ्रॉक पाहताच मीनाक्षीचे कपडे अचानक कुत्यूर स्टँडर्ड वाटू लागतात. ती मीनाक्षीच्या हातातले ताट हिसकावून घेते आणि तिला हाकलण्याचा प्रयत्न करते. इकडे नागेश आपल्या नागीणीची वाट बघत बसलेला असतो. दार वाजलेले ऐकून तो म्हणतो की "ये आत दुसरे कोणी नाही." नागीणीच्या जागी भूतणीला बघून तो हादरतो. साहिला लगेच चान्स मारू बघते - कोई नही हैं इसी लिए तो हम आये हैं, खाना लाना नौकरों का नही मेरा काम हैं इत्यादी संवाद तिच्या तोंडी आहेत. नितीशचे लक्ष मात्र दारावरच्या मीनाक्षीकडेच आहे. तो अनवधानाने बोलून जातो - मैं हर जन्म तुम्हारा ही रहूंगा. साहिला भलतीच एक्साईट होते आणि म्हणते ओह डार्लिंग, किस मी. इतका वेळ शांत असलेल्या मीनाक्षीला आपल्या नवर्‍याला पाच पैशाचे चॉकोलेट संबोधल्याचा भलताच राग येतो (आजची किंमत ५० पैसे, इन्फ्लेशन रेटने १९८९ मध्ये ~६ पैसे). ती चटणी द्यायची राहिली, डाळ द्यायची राहिली असे बहाणे करून आत घुसते. साहिलाच्या विरोधाला न जुमानता डाळ घेऊन तिच्या जवळ येते आणि बशीने डाळ साहिलाच्या मांडीवर ओतते व तिचा बेत हाणून पाडते. ही अनोखी कॅटफाईट बघून नितीश मिश्किल हसतो. एवढ्याने मीनाक्षीचे समाधान झालेले नसते. ती नागीण बनून साहिलाला बाथरूममध्येही घाबरवते.

मग ती स्वयंपाक घरात येऊन दुधीची भोपळ्याचे साल काढत असते. शैलीतल्या बदलांचा आणखी एक पुरावा म्हणजे नाग मोटिफसाठी प्रत्येक नागपटात भाजी ही कायम पडवळाचीच होत असते (विश्वास नसेल तर शेषनाग पुन्हा पाहावा. जितेंद्र मंडईतून उसाची मोळी आणावी तशी पडवळाची मोळी घेऊन येतो.) इथे ती दुधी भोपळ्याची भाजी किंवा उत्तर भारत म्हणून चला घिया-चने की सब्जी बनवत असते. मीनाक्षीने नागपटांचा अभ्यास न केल्याचाही हा परिणाम असू शकतो. मीनाक्षीला इच्छाधारी रुप कधी प्राप्त झाले असावे याचाही अंदाज बांधता येऊ शकतो. आता ती १९५४ सालच्या शादाब चित्रपटातले "जोगन बन जाऊंगी सजना तोरे कारन" गुणगुणत आहे. म्हणजे तिला इच्छाधारी रुप प्राप्त होऊन किमान ३५ वर्षे होऊन गेली आहेत. इंटरेस्टिंगली तिने गुणगुणलेली सर्व गाणी ड्युएट आहेत, संगीतकार नौशाद आहे आणि पुरुष गायक श्याम कुमार आहे. हिच्या स्पेसिफिक टेस्टमागे काय कारण असेल याचा विचार करत असतानाच प्रेक्षकाला स्वयंपाकघराच्या दारातून इतर नोकर अतिशय क्रिपी पद्धतीने तिला ताडताना दिसतात. पण नितीश (नाग) ला हा अधिकार फक्त आपला असल्याचे ज्ञात असल्याने तो येऊन त्यांना हाकलून लावतो. मग क्रिपी हसत तिच्याशी बोलू लागतो. त्याला तिने असे नोकर बनून राहणे पसंत नसते. आता या घरात नोकरांना ब्युटी पार्लरमध्ये फेशिअल आणि हेअर स्टाईल करून घेण्याइतका पगार मिळत असेल तर कोण नोकर बनून राहणार नाही? पण मीनाक्षी नितीशच्या बुद्धिमत्तेचा विचार करून "प्यार की तडप" असे कारण पुढे करते. हे सर्व जरी ठीक असले तरी आता यांचा बनलेला मूड वाया जाऊन कसे चालेल? त्यासाठी रात्री "पहाडी वाला खंडहर" या अतिशय स्पेसिफिक पत्त्यावर भेटायचे ठरते. नेमका स.अ. त्याच रात्री त्याच पहाडीवर नागयज्ञ करायचा ठरवतो. त्याने म्हणे जगातले सगळे नाग त्या पहाडीवर येऊन मरणार असतात. नागयज्ञाची इंटेन्सिटी पुरती कळावी म्हणून ११ गारुडी व ११ तांत्रिक आणले आहेत. मिसेस नरसिंगदेव त्याला थांबवण्याचा तोकडा प्रयत्न करतात. पण गाण्याची वेळ झालेली असल्यामुळे स.अ. तिच्याकडे दुर्लक्ष करतो.

९.२) नागयज्ञ

गाण्याचे बोल आहेत - यार मिला, प्यार मिला, हां हां प्यार मिला, करार मिला, दिल मेरा गाने लगाऽऽऽ इयां इयां, हो हो, इयां इयां! या इयां इयांला काही अर्थ आहे असा प्रेक्षकाचा समज व्हावा म्हणून भिल्ल जोडपी बॅकग्राऊंड डान्सर म्हणून बोलवली आहेत पण ते नाचतात स.अ. च्या नागयज्ञात! पण हे गाण्याचे मुख्य आकर्षण नाही. मुख्य आकर्षण इथे बघू शकता - मुख्य आकर्षण. रहस्यमयी रित्या नितीश (मानव) पुंगी वाजवत येतो आणि हा पुंगी भिल्लकन्यांसाठी का वाजवतो आहे हा प्रश्न सोडवण्याची प्रेक्षक पराकाष्ठा करत असताना स.अ. चे न भूतो न भविष्यति असे क्लोज अप आपल्याला बघण्याची संधी आहे. ६०% सिनेमा संपल्यानंतर अखेर मीनाक्षी हाताने नागाचा फणा करते पण त्यात व्यायाम नृत्य शैली मिसळल्यामुळे सगळं मुसळ केरात जाते. नितीश (मानव) च्या पुंगीत दम नसल्याने स.अ. स्वतः पुंगी वाजवायला लागतो. डझनावारी नाग जमा होतात पण हे दोघे नाचण्यात बिझी असल्याने ते काही येत नाहीत. स.अ. च्या छातीचा भाता झाल्यानंतर ते दोघे एकदाचे झिंगलेल्या अवस्थेत त्या यज्ञस्थळी येतात.

इथे मिसेस नरसिंगदेव त्यांना सावध करून पळवून लावतात आणि सिनेमाची लांबी कमीत कमी वीस मिनिटांनी वाढवतात. स.अ. चा एक शिष्य हे बघतो आणि पुंगीवादनात दंग असलेल्या स.अ. ला जाऊन घडला प्रकार विदित करतो. स.अ. मग कॅज्युअली हातातल्या पुंगीचा त्रिशूळ बनवून मिसेसना फेकून मारतो. त्यांची रिस्ट्रेंड रिअ‍ॅक्शन बघून हे या सिनेमातले सॉफ्ट डिसमिसल म्हणावे लागेल. मग स.अ. आणि त्याचे शिष्य पुंग्या वाजवत संपूर्ण जंगलभर हिंडतात पण तोवर नागरुप घेऊन नितीश (नाग) व मीनाक्षी केव्हाच घरी परत आलेले असतात आणि प्रणयाराधनात मग्न असतात. जर हेच करायचं होतं तर काळ्या पर्वतावर कशाला गेले होते? त्याच्या खोलीत मीनाक्षी रात्री नागरुपात आली असती आणि तोच परिणाम साधता आला असता. इच्छाधारी नागांची संख्या इतकी कमी का आहे याचे रहस्य हा सिनेमा उलगडतो.

९.३) पंधरा साल का भूला अगर घर को आये तो उसे भूला नही कहते

दुसर्‍या दिवशी सकाळी आशालता मोहिनीच्या नावाने शंख करत असते पण मोहिनी नागेशच्या बाहुपाशात अजूनही झोपलेली असते. हा आरडाओरडा ऐकून नितीश (नाग) ला जाग येते आणि तो मीनाक्षीला उठवतो. आता पटकन खाली जावे तर मीनाक्षीला घटकाभर गप्पा मारायची हौस येते. ती म्हणते की आज पौर्णिमा आहे. आज रात्री मी नव्या नवरीच्या वेषात तुझ्याकडे येईन. आपण ओके म्हणणार एवढ्यात ती लगेच गाऊन बदलून भरजरी लाल साडी नेसते. नितीशला थोडी अक्कल असल्याने तो तिला पटकन जायला सांगतो. पण तिचे दुर्दैव अजून संपलेले नसते. गणपती देखाव्यांमध्ये मिळणार्‍या यांत्रिक घार/गरुड इ. पक्ष्यांपैकी एक तिथून उडत चाललेला असतो. तो नागरुपातल्या मीनाक्षीला उचलून घेऊन जातो. हे दिसताच नाईटड्रेसमध्ये नितीश (नाग) त्या गरुडामागे धावत सुटतो. त्याला घराबाहेर पडताना श्री.ला. बघतात. तेही त्याच्या मागेमागे नोकर चाकर घेऊन येतात.

नितीश (नाग) भलताच वेगवान धावक असल्याने तो क्षणार्धात माळरानावर पोहोचतो. त्या पक्ष्याला आपल्या घरट्याकडे जाण्याऐवजी थोडावेळ गोल गोल घिरट्या घालायची हुक्की येते. मग नितीश (नाग) नेम साधतो आणि त्या पक्ष्याच्या पंज्यातून मीनाक्षी (नागीण) खाली पडते. इथे आपल्याला एक वेल जज्ड कॅच बघायला मिळतो. नितीश (नाग) चे हे जलवे चाललेले असताना नितीश (मानव) पुंगी वाजवत इकडून तिकडे हिंडत असतो. स.अ. त्याला सांगतो की तू जरा त्या तिथे जाऊन शोध मी हा असा इथे शोध घेतो.

नितीश (नाग) ला उशीराने का होईना शहाणपण येते की या जोडप्याचे आपण कसलेही देणे लागत नाही. लहानपणीच जर त्याने "तो तुमचा मुलगा तिथे जवळचा एका भिल्ल वस्तीत बेशुद्ध पडला आहे." हे सांगितले असते तर त्याच्या सोबतिणीवर ही वेळ आली नसती. त्यामुळे तो जाऊन सर्व सत्य सांगण्याचा निश्चय करतो. हे सर्व घडत असताना त्या तिथे श्री.ला. आलेले असतात. ते रमत गमत पाठलाग करत असल्याने नितीश (नाग) त्यांच्या दृष्टीआड झालेला असतो. त्याची बंदूक मात्र त्यांना सापडते, जी त्याने नेमकी फेकून दिलेली असते. थोडा शोध अजून घेता तो यांना मिळालाही असता पण त्या तिथे पाठवलेला नितीश (मानव) तिथे येतो. त्यामुळे ते त्यालाच कमल समजतात, जे खरेही आहे म्हणा! सर्व प्रकार कमलच्या ध्यानात येतो. तो त्यांना काहीबाही थाप मारून, दोन मिनिटात येतो असे सांगून स.अ. कडे परत जातो. स.अ ला तो सांगतो की माझा हमशकल जिथे राहतो त्या ठिकाणाचा पत्ता लागला आहे. स.अ. त्याला म्हणतो की तू त्या घरी जा आणि तिथल्या सगळ्यांना आपल्या जाळ्यात ओढ, मी तुझ्या मागोमाग आलोच इच्छाधारी नाग पकडायला.

स.अ. ला इच्छाधारींचा पत्ता लागला आहे. श्री.ला. आणि आशालता यांना त्यांचा मुलगा परत मिळाला आहे. साहिलाचा भयाण फॅशन सेन्स आता काहीच मिनिटे आणखी सहन करावा लागणार आहे. नवीन मुद्दे उपस्थित होणे बंद झाले आहे. याचाच अर्थ आता महा-क्लायमॅक्सची सुरुवात होणार आहे.

नाचे नागिन गली गली म्हणजे ना ना ग ग म्हणजे नाग नाग. >>

ती नायकासाठी फिल्डिन्ग लावते. पण शेवटी तिला 'पदरी पडल पवित्र झाल' हया न्यायाने कॉमेडियनला स्विकाराव लागत. >> हिचं सिनेमातलं नशीब इतकं वाईट आहे की कधी कधी तर तर हिला कॉमेडिअन सुद्धा नाही मिळत. उदा. धरम संकटमध्ये ही डाकूंची सरदार असते आणि विनोद खन्नाला बदला घेता यावा म्हणून ती त्याला डाकू बनण्यासाठी मदत करते (ट्रोप सबव्हर्जन). एवढं करून सुद्धा तो अमृता सिंगकडे जातो.

१०) महाक्लायमॅक्स - १

क्लायमॅक्सच्या सुधारित व्याख्येनुसार जेव्हा नवीन मुद्दे उपस्थित होणे बंद होतील आणि उपस्थित झालेले मुद्दे/प्रश्न/अडचणी सुटू लागतील तेव्हा क्लायमॅक्स सुरू होतो. सध्या श्री.ला/आशालता जोडप्याला कमल-नागेशचा उलगडा होऊन कमल परत मिळणे, सत्येन कप्पूची सुटका, स.अ. ला अमरकुंड मिळणे (त्याशिवाय फाईट कशी होणार?) आणि त्याचा अंत व त्याचे पर्यवसनी मोहिनी-नागेश मिलन असे मुद्दे बाकी आहेत. हे सगळे कव्हर करायला अत्यंत हाय पेस्ड असा अर्ध्या तासाचा क्लायमॅक्स आहे. हा दोन भागांत कव्हर होईल.

१०.१) केवळ पुंगीच्या जोरावर इच्छाधारी नागाला कंट्रोल करता येत नाही

मीनाक्षी आणि नितीश (नाग) परत त्या बंगल्यापाशी येतात. ती त्याला म्हणते की तू जाऊन आशालताला टाटा करून ये, मी बाहेर तुझी वाट बघते. तो बरं म्हणतो. त्यावेळी जीपमधून येणारे श्री.ला आणि नितीश (मानव) त्यांना दिसत नाहीत. आत जाऊन तो आशालताला सत्य सांगतो. आशालता फारच गोंधळते की हे काय चालले आहे. हे कमी म्हणून नितीश (मानव) आणि श्री.ला. दोघे एकदम आत घुसतात. दोन-दोन नितीश पाहून श्री.ला. सुद्धा गोंधळतात. नितीश (मानव) सांगतो की इथे डुप्लिकेटच्या मुद्द्यावरून आश्चर्यचकित व्हायचे काहीही कारण नाही. हा एक इच्छाधारी नाग आहे, तो कोणाचेही रुप धारण करू शकतो. कमलला बघून नागेश मात्र भयंकर खुश होतो. आता तर त्याला वचनभंगाचे वैषम्य बाळगण्याचेही कारण उरत नाही. तो सर्वकाही खरं खरं सांगून टाकतो. तो इच्छाधारी नाग असल्याचे ऐकून श्रीराम लागू संयत प्रतिक्रिया देतात, आशालता भावूक प्रतिक्रिया देते आणि साहिला वरच्या मजल्यावरून खाली बघत चेहर्‍याचे स्नायु हलवते. नितीश (मानव) इतक्या वर्षांत पुरता ब्रेनवॉश झालेला असल्यामुळे तो सरळ पुंगी बाहेर काढतो आणि स.अ. यायच्याआधी याला गिफ्टपॅक करून ठेवू बघतो. इतक्या वर्षांत एकाही इच्छाधारी नागाला न सुचलेला उपाय नितीश (नाग) ला सुचतो. त्या पुंगीने डोके उठायच्या आत तो जाऊन नितीश (मानव) च्या हातातली पुंगी फेकून देतो. मग त्या दोघांची झोंबाझोंबी होऊन त्याचे पर्यवसन नितीश (मानव) ची पुंगी (पक्षी: वाद्य) फुटण्यात होते. हे सर्व वरच्या मजल्यावरून खाली आलेली साहिला, चाकाच्या खुर्चीतली आशालता आणि गरागरा डोळे फिरवणारे श्रीराम लागू टकामका बघत राहतात. आशालताच्या प्रेमाच्या बंधनात बांधलेला असल्याने नितीश (नाग) नितीश(मानव) ला चावू शकत नसतो, अन्यथा ही फाईट लांबण्याचे काहीही कारण नाही. मग ते थोडा वेळ फाईटिंग करतात. ही फाईट प्रचंड कन्फ्युजिंग आहे. कारण नितीश (मानव) ला मार पडतो आहे हे या तिघांना खालच्या मजल्यावरून दिसू शकते पण मध्ये मध्ये क्लिअरली ती फाईट नितीशच्या वरच्या मजल्यावरच्या खोलीत चाललेली आहे (हिंट्स: खोलीतला ट्रान्झिस्टर वगैरे). मग मध्ये एकदा ती फाईट सोफा असलेल्या एका खोलीत जाते जिथे साहिलाच्या गाण्यातले एक कडवे होते. पण एकही शॉट दिवाणखान्यातला नाही जिथे आपले तीन प्रेक्षक आहेत. तरीही त्यांना हे दोघे आणि या दोघांना हे तिघे दिसू शकतात. फाईटचा शेवटचा शॉट दिवाणखान्यात दाखवून आपल्याला मॅचकटच्या मदतीने गंडवण्याचा प्रयत्न केलेला आहे पण या गंडलेल्या कंटिन्युटीची आपण नोंद घेतली पाहिजे. नितीश (मानव) चे डोके संगमरवरी फरशीवर आपटते आणि तो बेशुद्ध होतो. मग नितीश (नाग) दिलगिरी व्यक्त करून नागलोकात जायला निघतो.

१०.२) महान पुस्तकांच्या कितीही प्रती घेतल्या तरी कमीच पडतात

हे सर्व इतके सोपे असते तर सिनेमा घडलाच नसता. बाहेर उभ्या असलेल्या मीनाक्षीला घर शोधत येणारा स.अ. दिसतो. तिने भिंतीचा आडोसा घेतल्याने स.अ. ला ती दिसत नाही पण घर त्याला सापडते. तो घरात पुंगी वाजवतच येतो. दारातच नितीश (नाग) त्याला भेटतो. महान तांत्रिक असल्याने तो थोडा अनुभवी असतो. त्यामुळे नितीश (नाग) ला प्रयत्न करूनही त्याची पुंगी हिसकावून घेता येत नाही. नितीश (नाग) आपल्या बिळात, हे आपलं वरच्या मजल्यावरच्या खोलीत पळ काढतो. तो इतका बावचळून जातो की त्याला खिडकीही उघडता येत नाही. मग तो हाताचा फणा करून स.अ. वर वार करतो आणि सुदैवाने पुंगी खाली पडते. पुन्हा महान तांत्रिक असल्याने स.अ. पूर्ण तयारीनिशी आलेला असतो. जादूने त्याच्या हातात नवी पुंगी येते आणि पुन्हा नितीश (नाग) चे टॉर्चर सुरू होते. तो वैतागून नागरुपात येतो आणि त्याला स.अ. कैद करतो.

इथे नितीश (मानव) शुद्धीवर आलेला असतो. त्याच्या क्लोजअप मध्ये आपल्याला "how to make your own high pressure spray plant" या महान पुस्तकाच्या १७ प्रती शिडाळ्यावर मांडून ठेवलेल्या दिसतात. एकाच पुस्तकाच्या १७ प्रतींची आवश्यकता सेठ गिरधारीलाल आणि कुटुंबिय यांना भासत असेल तर ते निश्चितच फार महान पुस्तक असले पाहिजे, कृपया अभ्यासू वाचकांनी याची नोंद घ्यावी. इकडे स.अ. निवांतपणे नितीश (नाग, नागरुप) ला हातात धरून खाली येतो. नाग स.अ. ला का चावत नाही हे अजून कळू शकलेले नाही. हातात नाग घेऊन येणारा तांत्रिक पाहून साहिला आणि नोकरवर्ग दचकण्याचा अभिनय करतात. पण या घडणार्‍या घटना इतक्या अतर्क्य आणि वेगवान आहेत की श्री.ला. आणि आशालताच्या चेहर्‍यावर पूर्णवेळ "व्हिस्की, टँगो, फॉक्सट्रॉट" असे भाव आहेत. डोक्यावर पडल्यानंंतर आधीचे डोक्यावर पडणे कॅन्सल होऊन नितीश (मानव) ला सर्वकाही आठवते. पण स.अ. ला त्याने काही फरक पडत नसल्यामुळे तो या चिल्लर लोकांवर हसून, हातात इच्छाधारी नाग पकडून कॅज्युअली रस्त्यावरून रमत गमत चालत परतीची वाट धरतो. मीनाक्षी हे बघते. आता आपल्या नवर्‍याचे प्राण वाचवण्याची जबाबदारी तिच्यावर येते. खरं तर तिची या सिनेमातली साहसे बघता तिचे नाव सावित्री ठेवायला हरकत नव्हती. पण नितीश सत्यवान दिसत नसल्यामुळे आणि कृष्णाचा मोटिफ बघता मोहिनी नावच सुयोग्य असल्याचे झटकन लक्षात येते आणि पटकन पुढच्या अचाट प्रसंगाला प्रेक्षक धीरोदात्तपणे सामोरा जातो.

१०.३) बॉलिवूडमध्ये मानव कृतघ्न तर इच्छाधारी नाग कृतज्ञ असतात

जपानी याकुझांमध्ये पॉम्पेडॉर नावाची केशभूषा प्रसिद्ध आहे. याकुझा आणि साहिला मध्ये काहीही साम्य नसतानाही तिची तशी केशभूषा केली आहे. ती श्री.लांना म्हणते की ही नागीण आहे, हिला मारून टाका. या लोकांचा कृतघ्नपणा पाहून मीनाक्षी चिडते आणि या सर्वांना नागेशच्या उपकारांची जाणीव करून देते. पण साहिला आपला धोशा कायम ठेवते. ते नोकरही का कोणास ठाऊक तिचे ऐकतात. प्रत्यक्षात श्री.ला अजूनही परिस्थिती समजून घ्यायचा प्रयत्न करत आहेत. मग मीनाक्षी चिडचिड अवस्थेत जाते आणि नाचता नाचता फाईट करू लागते. इथे काही अनाकलनीय कारणाने एक सेठजी, एक मुनिमजी, एक पगारदार वर्गीय, दोन कुकरी घेतलेले गुरखे असे बघे आले आहेत. या लोकांचा इतर सिनेमाशी काहीही संबंध नाही पण तेही साहिलाच्या हाकेला ओ देऊन नागीणीला मारू बघत आहेत. मीनाक्षी हाताचा फणा करून उगाच फूत्कारते आणि चिडचिड अवस्थेमुळे निळे झालेले डोळे गरागरा फिरवते. तिचे फूत्कारणे बघून श्री.ला. दचकतात. त्यांचे स्वगत काहीसे असे असावे - मी एक शब्द तरी बोललो आहे का? तू आमची शत्रू नाही एवढे कन्फर्म करण्याचा प्रयत्न चालू आहे? म्हातार्‍या माणसावर असे फूत्कारतात का कधी? हेच का तुझ्या बिळातले संस्कार!

तिकडे स.अ. च्या चालण्याचा स्पीड सुपरफास्ट असल्याने तो त्याच्या चाळीस कोसांवरच्या हवेलीत पोहोचला आहे. काळ्या रंगाच्या वर्तुळात हिरवा नाग ठेवून तो पुंगी वाजवतो आहे. याचे पुंगीवादन चाललेले असते तोवर हे लोक मीनाक्षीला घेराव घालून बसले आहेत. या डान्स-फाईटच्या दोन तीन तरी आवृत्त्या शूट झाल्या असाव्यात पण फालतू एडिटरने जंपकट्स टाकून त्या फाईटचं पार मातेरं केलं आहे. दोन-तीन आवृत्त्यांचा पुरावा - साहिलाच्या दोन वेगवेगळ्या केशभूषा दिसतात (एक पॉम्पेडॉर आणि एक तुलनेने साधी). मीनाक्षीची सेट केलेली एकच बट कपाळावर येते किंवा तिचे घामेजलेले केस विस्कटलेले दिसतात. बघ्यांच्या हातातली शस्त्रे बदलत राहतात. पगारदार वर्गीयाची ब्रीफकेस सेठजी आणि मुनीमजीच्या हातात जाते. बघ्यांची संख्या पाच ते दहा मध्ये फिरत राहते. आशालता काही ठिकाणी बाहेर दिसते काही ठिकाणी दिसत नाही. जर सिनेमा एवीतेवी लांबलाच आहे तर ही फाईट पूर्ण दाखवायला हरकत नव्हती. किमान यांचा कृतघ्नपणा नीट ठसला असता.

असो, तर हे लोक मग तिच्यावर भाले फेकून मारतात. पण अतिशय टुकार नेम असल्याने चार फुटांवरूनही त्यांना नेम साधता येत नाही. तिकडे कंटाळून नागेश (नागरुप) नागमणी बाहेर काढतो. नागमणी मिळाल्याने स.अ. अतिशय आनंदतो. सत्येन कप्पू (पोपट) प्रेक्षकांसाठी टाईमलाईनचा खुलासा करतो. स.अ. ला अमरकुंड पर्यंत दुसर्‍या दिवशीच्या सूर्यास्ताच्या आधी पोहोचणे भाग आहे. अन्यथा सुहास जोशीच्या शापामुळे तो मरेल. गुरुदेवांच्या मते त्यांच्या शिष्याचे डेडलाईनच्या आधी त्या ठिकाणी पोहोचणे अशक्य आहे. पण स.अ. ला आपल्या शक्तींवर पूर्ण विश्वास असतो. तो तडक अमरकुंडांचा रस्ता धरतो. इकडे मीनाक्षीला त्या भाल्यामुळे आयतेच हत्यार मिळते. ती मांडीवर आपटून त्याचे दोन तुकडे करते आणि दांडक्याच्या कांडक्याने या लोकांना बडवते. "गठ्ठ्याने लोक बडवले जात असतील तर भारतीय जनता ते बघायला गर्दी करतेच करते" या त्रिकालाबाधित सत्याची पुनःप्रचिती प्रेक्षकांना द्यावी या हेतुने आता शेकडोंच्या संख्येने मॉब दाखवला आहे. बघ्यांना बडवून ती फणकार्‍याने स.अ. च्या हवेलीच्या दिशेने जाते. नितीश (मानव) ही बंदूक उचलून तिच्या मागे मागे निघतो. श्री.ला. विचारतात, तू कुठे निघालास? तो म्हणतो मी तिच्या "सुहाग की रक्षा" हेतु निघालो आहे. त्याला सगळे लॉजिकल सल्ला देतात, हे काम आपल्या कुवतीबाहेरचे आहे. झाले गेले विसरून आता आमच्या सोबत राहा. यावर तो या लोकांची कृतघ्न म्हणून संभावना करतो (जे बरोबरच आहे) आणि कसे नागेश-मोहिनी जनावरे असूनही कृतज्ञ होते हे अधोरेखित करतो. आँ? इच्छाधारी नागांची कधीपासून जनावरांमध्ये गणना होऊ लागली? श्री.लांना आपल्या पोराची बौद्धिक कुवत कळून चुकते व ते त्याला घरात डांबतात. या लोकांचे सिनेमातले अवतारकार्य संपले असल्याची नोंद घ्यावी.

१०.४) जादुई वस्तुंसोबत त्यांचा डेमो असणे श्रेयस्कर

मीनाक्षी वास काढत काढत स.अ. च्या हवेलीत पोहोचते. तिला दिसते की एका वर्तुळात एक नाग निपचित पडला आहे. "मेरे स्वामी" करून ती त्याच्याकडे झेपावते तर त्या वर्तुळातून ज्वाळा निघतात आणि मागून स्फोट झाल्याचे मुझिक वाजते. या ज्वाळा म्हणजे शाळेत मॅग्नेशिअमच्या पट्ट्या जाळण्याचा रसायनशास्त्रातला प्रयोग करताना ज्या इग्निशन फ्लेम्स दिसतात त्या होय. ती काळी पूड बहुधा बेरिलिअमची असावी कारण मॅग्नेशिअमची पूड सहसा एवढी काळी दिसत नाही. या गोंधळाने झोपलेला नाग जागा होतो. पण देणे घेणे राम जाणे म्हणून तो निवांत पडून राहतो.

या मिनी स्फोटांनी त्रस्त झालेल्या मीनाक्षीची सत्येन कप्पू (पोपट) ला दया येते. तो तिला सांगतो की याची मणी स.अ. कडे आहे व त्यामुळे याची ही अशी अवस्था झाली आहे. सत्येन कप्पू आपली पोपट बनण्याची करुण कहाणीही तिला विदित करतो. याने मीनाक्षी भलतीच दु:खी होते. ती सांगते की २४ तासांत जर नागमणी परत मिळाली नाही तर - आणि इच्छाधारींच्या मणीविषयक नियम ती सांगणार एवढ्यात माठ सत्येन कप्पू तिला इंटरप्ट करून "वो तुझे कभी मणी वापस नही देगा" हे सांगतो. ऑब्व्हिअस गोष्टी सांगण्यापेक्षा मणी मिळाली नाही तर काय होईल हे सांगणे जास्त महत्त्वाचे नाही का? अशाने याच्या पोपट बनण्याविषयी प्रेक्षकाला काय सहानुभूति उरेल? असो, मीनाक्षी आपल्या सुहागसाठी अमरकुंडच काय, गरज पडल्यास स्वर्गलोकातही जायचा निश्चय करते.

स.अ. रमत गमत कुठल्यातरी रँडम पर्वतातून चालला आहे. एक हिमालयाचा शॉट टाकून आपल्याला तो शिवालिक प्रदेशांत असल्याचे कळवले आहे (कारण त्याच्या पर्वतावर बर्फ पडलेला नाही). त्या पर्वतराजींमध्ये एक शिळा बसवलेली गुफा असते. नागमणी तिच्या जवळ नेताच ती शिळा बाजूला सरकते आणि स.अ तिच्यात प्रवेश करतो. दुसर्‍याच क्षणी तो एका वेगळ्याच स्थळी शब्दशः फेकला जातो. या स्थळी कायमस्वरुपी वावटळ आणि वाळलेली पाने असतात. कोण्या एका तामसिक देवतेची मूर्तीही तिथे आहे आणि त्या मूर्तीच्या तोंडातून सतत ज्वाळा बाहेर पडत आहेत. मूर्तीच्या समोर एक छोटे टेकाड आहे. या टेकाडावर एक छोटेसे कृत्रिम तळे आहे, तळ्यात काही जलपर्णी आहेत. हेच ते अमरकुंड! प्रेक्षकांना याच्या जादूची खात्री पटावी म्हणून कुठूनतरी एक यांत्रिक कावळा येतो, कुंडात डुबी घेतो आणि यांत्रिक हंस होऊन बाहेर पडतो! एकंदरीत हे अमरकुंड फारच कस्टमर फ्रेंडली आहे. दरवेळी कोणीही नवीन व्यक्ती तिथे आला की त्याच्या डेमो साठी ही यांत्रिक कावळा/हंस योजना असावी. विशेष म्हणजे हे सर्व स.अ. टेकाडाच्या पायथ्याशी उभे राहूनही सहज दिसू शकते.

अमरकुंड मिळाल्याने स.अ. हरखतो. पायर्‍या चढून तो टेकाडाच्या माथ्यावर पोहोचतो. शॉर्टकट घेऊन मीनाक्षी तिथे आधीच पोहोचलेली असते. ती ऑलरेडी चिडचिड अवस्थेत आहे. तर स.अ. कडे नागमणी आणि त्याच्या महान सिद्धींची ताकद आहे. तिच्याकडे वेळच वेळ आहे तर स.अ.ला सूर्यास्ताच्या आत अमरकुंडात स्नान करणे भाग आहे. क्लायमॅक्समधला सर्वात महत्त्वाचा भाग अर्थात फायनल फाईटची सिद्धता झाली आहे. हा पंधरा मिनिटांचा महासंग्राम महाक्लायमॅक्स-२ मध्ये.