चष्म्याच्या किमती किती खर्‍या किती खोट्या?

साधा वाचनाचा चष्मा. फुटला!!
(वर्षापूर्वीच जंगली महाराज रोडवरील प्रख्यात डॉ़क्टरांकडे डोळे तपासून तिथल्याच दुकानातून सुमारे ६५०/- ला (फ्रेम व काचा मिळून) चष्मा करवून घेतला होता. अगदी समाधान कारक होता.)
एका नामांकित कंपनीच्या शो रूम मध्ये १ तासाच्या माहिती कार्यक्रमानंतर व निरनिराळ्या काचांच्या मेनुकार्ड च्या चर्चा सत्रानंतर (फक्त काचा बदलासाठी - फ्रेम जुनीच ठेउन) सुमारे ३ ते ५ ह. एवढे ऑप्श्न्स आले. न घेता निघालो तेंव्हा 'फ्रेम फ्री' देउ असे आमिष दिले.
ते काही ठिक वाटले नाही म्हणून दुसर्‍या एका परदेशी कंपनीच्या शो रूम मध्ये चौकशी करता डोळे पांढरे व्ह्यायची वेळ आली. त्याने नुसत्या काचा (त्या वेगवेगळ्या कोटिंग बद्दल काय खरे काय खोटे देव जाणे! (माहितीत्रकातील सगळे फोटो परदेशी व्यक्तिंचे त्यात देशी एकही नाही! ) सुमारे ७ ते १० ह. पर्यंत अंदाज सांगितल्यावर तिथून सटकलो!
चिरंजिवांन्ना एव्हाना माझी दया आली असावी. त्याने बर्‍याच ठिकाणी हेलपाटे मारून एका गावठाण एरियातून चष्मा करवून आणला व माझ्या हवाली केला. घातला व एकदम पटला. उत्सुकतेने किंमत विचारली. "साधे कांच लावलेत - हाय फाय नाही - खर्च १५०/- रुपये - सांभाळून वापरा" असे सुनवल्यावर उडालोच!.
डोळे भरून आले!. एकदम छान वाटले!.
चिरंजिवांन्नी चांगले काम केले म्हणून आणी (मला वाटणार्‍या) योग्य किमतीत चांगला चष्मा मिळाला म्हणून!