मायबोलीवरील वर्षपूर्तीनिमित्त मायबोली सदस्य होण्यामागची कहाणी

२५ नोव्हेंबर, २०१७ मला मायबोलीचं सदस्यत्व घेऊन एक वर्ष झालं. आतापर्यंत काही लिहिलं नाही, पण इथलं वाचत असते आणि कधी- कधी प्रतिसाद देत असते.

वर्षभरापूर्वी गुगलवर वेल यांची आधुनिक सीता या कथा/कादंबरीचा एक भाग दिसला उत्सुकता वाटून वाचला छान वाटला. मग बाकी भाग वाचतच गेले. त्यानंतर आठवणीतलं कपाट ही कथा वाचली, दोन्ही कथा आवडल्या होत्या पण सदस्य नसल्याने प्रतिसाद देता येत नव्हता. तोपर्यंत सदस्य व्हायचा अजिबात विचार नव्हता. मायबोलीवरचं लेखन मात्र वाचतच होते. बेफिकीर यांच्या कथा-कादंबर्या वाचण्यात आल्या. उत्कृष्ट लेखनशैली. पण अन्या आणि सनम वाचून खूप वाईट वाटलं, अर्धवट होतं म्हणून.

एके दिवशी मनात विचार आला, आपणही मायबोलीचे सदस्य व्हायला काय हरकत आहे? मी लगेच नवीन सदस्य होण्यासाठी नोंदणी केली आणि सदस्य झाले पण हा माझा गैरसमज होता. मला माहीत नव्हतं की सदस्य प्रवेश करण्यासाठी लागणारा पासवर्ड ई-मेलने दिला जातो. खरंतर मी ई-मेलचा पासवर्ड विसरले होते, आणि मायबोलीवरती औपचारिकता म्हणून ई-मेल आयडी द्यायची असते असा माझा समज होता. सदस्य होऊन एक आठवडा झाला पण मला येण्याची नोंद करता येत नव्हती. एक दिवस मी सहज म्हणून ई-मेल अकाऊंटचा पासवर्ड चेंज करून बघायचं असं ठरवलं. अगदी सुरुवातीला ठेवलेला पासवर्ड टाकला आणि चेंज पासवर्डवर टिचकी मारली. मोबाईलवर ई-मेल व्हेरीफिकेशन कोड आला. नवीन पासवर्ड टाकून लाॅगइन केलं, इनबाॅक्समध्ये मायबोलीचा पासवर्ड(OTP) मेल होता. तो पासवर्ड वापरून मला एकदा मायबोलीवर प्रवेश करायचा होता लगेच पासवर्ड चेंज करायचा होता. तिथे वेळ मर्यादा ८ मिनिटे इतकी होती. मी पटकन सदस्य प्रवेश केला आणि पासवर्ड चेंज केला. ती वेळ मर्यादा तितकीच होती की अजून वाढवली गेली असती माहीत नाही. काही असो, पण हुश्श! मी एकदाची मायबोलीकर झाले होते.

नकळत वेल यांच्यामुळे मायबोलीची ओळख झाली म्हणून त्यांचे मनापासुन आभार.