उन्हाळा आणि त्याअनुषंगाने घ्यायची काळजी

Submitted by पियू on 22 February, 2016 - 02:46

नमस्कार मायबोलीकरहो..

दरवर्षीप्रमाणे उन्हाळा येऊन ठेपलेला आहे. आणि उष्म्याचे प्रमाण वाढतच चालले आहे. उन्हाळ्यात घ्यायची आरोग्याची काळजी याविषयी सर्वसाधारण माहिती सगळ्यांना असतेच. तरीही सगळ्यांनी त्यात भर घातली तर फायद्याचे राहिल.

मला माहित असलेले काही मुद्दे:

१. भरपुर पाणी पिणे. (शक्यतो माठातले).
२. उन्हात जातांना आवर्जून डोके झाकणे.
३. गॉगल्स वापरणे.
४. घाम शोषुन घेतील असे कपडे वापरणे. हलक्या रंगाचे सुती (जमल्यास ढगळ) कपडे वापरावे.
५. शक्य असेल तर दोनदा अंघोळ करणे.
६. जवळ ग्लुकॉन डी किंवा इलेक्ट्रॉल पावडर बाळगणे.
७. रबरी चपला/ सँडल्स न वापरणे (त्याने डोळे तळावतात). (तळावणे = डोळे तापणे, दिवसभर जळजळणे, थकणे)
८. वातावरणातील उष्णतेमुळे अन्न लवकर नासत/ आंबत असल्याने डबा खातांना भाजी चांगली आहे ना याची खात्री करून खाणे. (मुळातच उन्हाळ्यात भूक कमी होत असल्याने कमीच डबा बाळगणे).
९. एसीमध्ये काम करणार्‍यांनी एसीतून बाहेर आल्यावर एकदम उकाड्याने गरगरल्यासारखे होते त्यावर काहीतरी उपाय करणे. (मला उपाय माहित नाही. कोणास माहित असल्यास सांगावे).
१०. चहाचे प्रमाण कमी करून कोकम, लिंबू, पन्हे अश्या सरबतांचे सेवन वाढवणे. नारळपाणी व ताक यांचे नियमित सेवन करणे.
११. बाहेर जाताना सहसा कॉटनचा सनकोट घालणे.. शक्य असल्यास हातात ग्लोव्हज् घालणे..
१२. उन्हातुन आल्यावर लगेच कुलर अथवा एसी मधे जाऊन बसु नये.
१३. उन्हातुन थकुन आल्यावर लगेच गारेगार पाणि पिउ नये.
१४. रोज एक चमचा गुलकंद खाणे ,
१५. रात्री झोपताना तळपायाला तेलाने अभ्यंग करणे. (अभ्यंग म्हणजे मसाज ना?)
१६. उन्हाळ्यात जंकफूड खाणं टाळावं. (खरं तर शक्य होईल तितके सर्वच महिन्यात टाळावे).
१७. सनस्क्रीन ( 30 SPF किंवा त्यापेक्षा जास्त) लावुनच उन्हात बाहेर पडावे. (त्वचेची काळजी)

असे आणखी उपाय असतील तर कृपया लिहावेत. जसजसे जमतील तसतसे हेडरमध्ये अपडेट करता येतील. आधीच असा एखादा धागा असल्यास हा धागा उडवावा हि अ‍ॅडमीन यांना नम्र विनंती.

विषय: 
Group content visibility: 
Public - accessible to all site users

मस्त उपाय दिले आहेत पियू..

७. रबरी चपला/ सँडल्स न वापरणे (त्याने डोळे तळावतात). >> म्हणजे ?

माझ्याकडून दोन चार ..
-> बाहेर जाताना सहसा कॉटनचा सनकोट घालणे..
-> हातात ग्लोव्हज् घालणे..
-> उन्हातुन आल्यावर लगेच कुलर अथवा एसी मधे जाऊन बसु नये.
-> उन्हातुन थकुन आल्यावर लगेच गारेगार पाणि पिउ नये.
-> हलक्या रंगाचे सुती (जमल्यास ढगळ) कपडे वापरावे.

छान धागा आहे
माझ्याकडून धाग्यात थोडी भर

>>>रोज एक चमचा गुलकंद खाणे ,
>>>रात्री झोपताना तळपायाला तेलाने अभ्यंग करणे
>>>उन्हाळ्यात जंकफूड खाणं टाळावं

माझ्याकडुन एक टीप -

सगळ्या न्युज पेपरमधे 'उन्हाळ्यात/पावसाळ्यात/ थंडीत घ्यायची काळजी' असा एक लेख हमखास येतोच. तो वाचावा. Wink

कंटाळा आला त्याच त्याच टीप्स वाचुन लहानपणापासुन.

बरं ते नेहमीचं एक - सनस्क्रीन ( 30 SPF किंवा त्यापेक्षा जास्त) हे नेहमीचं राहिलं आहे वरच्या लिस्टमधे.

शक्य असल्यास रात्री, अंगणात अथवा गच्चीवर झोपणे. छान झोप लागेल. विजेची बचत होईलच, आणि मध्येच वीज गेली तर झोपमोड होणार नाही. सकाळी लौकर जाग पण येईल.

मध्येच वीज गेली तर झोपमोड होणार नाही. सकाळी लौकर जाग पण येईल.>>>>>हो, कारण रात्रभर डासानी कच्च खाऊन टाकलेले असेल.:दिवा::फिदी:Musquito.jpg

मध्येच पाऊस आला तर काय करायचे? नाहीतर अंथरुण पांघरुण गुंडाळून पळेपर्यंत सगळंच चिंब भिजून जायचं. Happy

मध्येच पाऊस आला तर काय करायचे? नाहीतर अंथरुण पांघरुण गुंडाळून पळेपर्यंत सगळंच चिंब भिजून जायचं. स्मित>> इतक्या जोरात येतो पाउस ? आम्ही दोन थेंब पडले कि थोडस वाट बघायचो की खरच विजा चमकुन पाउस जोरदार पडण्याची शक्यता आहे का ते.. नसेल तर इतने शॉवर से झोप कायको खराब करना..तसच झोपायच .. आणि जोरात येईल असं वाटल तर पळायच बिस्तर गुंडाळून.. रम्य त्या आठवणी Wink Happy

टीना +१
Nidhii किनारपट्टीजवळ (त्यापासून १००-२०० किमी) असा अचानक जोरात पाऊस सुरु होतो, की उठुन गादी गुंडाळे पर्यंत भिजुन जाईल.
ऐन पासावसाळा / श्रावण वगळला तर इतरवेळी विदर्भ आणि हैद्राबादला तरी पाऊस हळुहळु सुरु होतो. आधी शिंतोडे येतात. अनेकदा शिंतोडे थांबतात. मग उठावं लागत नाही.
कधी हळुहळु जोर धरु लागतात. मग उठुन गादी गुंडाळायची, घरात जाउन अंथरुन त्यावरच झोपायचं.

मानव, टीना >> हो, आम्ही अरबी समुद्राच्या अगदी शेजारीच राहतो. त्यामुळे इकडे पाऊस असा अचानकच भयानक रुपात प्रकट होऊन कोसळायला लागतो. त्यामुळे किती उकाडा असला तरी बाहेर झोपणे परवडत नाय आम्हाला.