Name: कवठाचे आंबील - उपवासाला चालणारे आणि पित्तनाशक
Cook time: २० मिनिटे
Yield: ६/७ वाट्या होतील
Cuisine: वैदर्भीय

Submitted by हर्ट on 27 November, 2015 - 06:49

प्रत्यक्षात लागणारा वेळ:

२० मिनिटे

लागणारे जिन्नस:

# पिकलेले पण भरीव कवठ
# उपवासाला करणार नसाल तर कोंथींबीर
# लाल मिरचीची पावडर अर्थात लाल तिखट
# जिरे
# चिरलेला गुळ कवठाला पुरेल इतका
# भाजलेल्या शेंगदाणे टरफल काढून - कुट अथवा अख्खे सोललेले दाणे चालतील
# मीठ
# तेल

क्रमवार पाककृती:

१) सर्वप्रथम कवठ दणकण आपटून दोन भागात विभागून घ्यावे म्हणजे कवठाचा गर चमच्यानी खरडून काढता येतो.

२) गुळ चिरुन घ्यावा.

३) स्वच्छ मिक्सरमधे तळात आधी कवठाचा गर घालावा.

४) आणि ह्यात आता थोडी कोथींबीर, मग चिरलेला गुळ, मीठ, दाण्याचा कुट, तिखट हे सर्व घटक घालावे. (मी खालिल चित्रात दाण्याचा कुट नंतर घातला ते चित्र घेतले नाही पण कुट घालायचाच.)

५) हे सर्व मिश्रण मिस्करमधुन वाटून घ्यावे. वाटलेले मिश्रण खाताना रवाळ वाटायला (जाणवायला) हवे.

६) आता, गॅसवर मातिचे एक भांडे ठेवावे किंवा जाड बुडाची एखादी कढई/पातेलेही चालेल.

७) मातिच्या भांड्यात आता तेल तापवून त्यात आधी जिरे घालावे.

८) जिरे नीट तळल्या गेले की लगेच त्यात मिस्करमधील वाटण घालावे आणि मिक्सरमधे एक ग्लासभर पाणी घालून विसळून तेच पाणी पातेल्यात ओतावे. पळीने सर्वकाही एकजीन करावे.

९) वाढताना थोडी कोंथींबीर चुरडून आंबील वाढावे. ह्या चित्रामधे कोथींबीर बुडालेली आहे म्हणून दिसत नाही. हे आंभील छान दाट होत. पातळ सहसा होतचं नाही. हाच प्रकार थंडीच्या दिवसामधे तिळ घालून करावा कारण तिळ उष्ण असतात.

वाढणी/प्रमाण:

६/७ वाट्या होतील

अधिक टिपा:

१) आंबील जर उरले तर ते दुसर्‍या तिसर्‍या दिवशीही खाता येते. उलट चव मुरल्यामुळे ते अजून छान लागते.
२) तुम्हाला जर पित्ताचा त्रास होत असेल. अंगावर जर पित्त उठले असेल. लाल लाल गुंथा आल्या असतील तर त्यावर कवठ अगदी रामबाण उपाय आहे.

माहितीचा स्रोत:

पिंकू

आहार:

पाककृती प्रकार:

प्रादेशिक:

शब्दखुणा:

Groups audience:

पाककृती आणि आहारशास्त्र

Group content visibility:

Public - accessible to all site users

शेअर करा

कवठा मध्ये गुळ घालून करतात ते

कवठा मध्ये गुळ घालून करतात ते खूप मस्त लागत.
BTW जे आंबवून करतात ते आंबील ना . म्हणजे नाचणीचे आंबील .
थोडी कन्फुजले आहे

Submitted by मृणाल १ on 28 November, 2015 - 00:18

>>> कवठ आणि बेलफळ वेगळे.

>>>
कवठ आणि बेलफळ वेगळे. नृसिंहवाडीची कवठाची बर्फी प्रसिद्ध आहे. पुण्याला शनिपाराजवळ चितळे या नावाचं लहानसं दुकान आहे. या दुकानात उत्तम कवठाची बर्फी मिळते.
कवट / कवठ हा अंड्यासाठीचा कोडवर्ड होता. अंडं खाल्लं हे घरातल्या ज्येष्ठांना कळू नये म्हणून कवट / कवठ म्हणत. हा शब्द या फळावरूनच आला आहे.<<

चिनूक्स,
कवठ(अंड्यासाठी) हा शब्द ह्या फळावरूनच आलाय कशावरून? काही पुरावा?
हा तर कोकणात वर्षानूवर्षे प्रचलित आहे हे पाहिलेय.
त्यामुळे हे नक्की बरोबऱआहे का?
आणि कवठ फळ कोकणात्ले नाहीच एकलेय.

Submitted by झंपी on 28 November, 2015 - 00:25

व्वा! मस्त पदार्थ! कवठ खूप

व्वा! मस्त पदार्थ! कवठ खूप आवडीचे! बरंच काही करता येते. आणि हल्लीच्या भाषेत.....खूपच हेल्दी!

Submitted by मानुषी on 28 November, 2015 - 01:23

तो.पा.सु. पाकृ..

Submitted by सायु on 28 November, 2015 - 04:14

कन्फुजन आहे राव. तीन

कन्फुजन आहे राव. तीन वर्षांअगोदर मला एकाने बेलफळ दिले आणि सांगितले की याचा मुरंबा बनव. आणि वरुन हेहे सांगितले की बेलफळ म्हणजेच कवठ.

घरी २-३ बेलफळे आहेत, त्यांच्यापासून अशी आंबील बनवता येईल का?

Submitted by पिंगू on 29 November, 2015 - 06:08

कोकणाचा विषय जाऊ द्या पण

कोकणाचा विषय जाऊ द्या पण बेलफळ, कवठ आणि अंडे ह्या तिन्ही गोष्टी वेगळ्या आहेत.

बेलफळातील गर हा फार चिकट असतो. बेलफळ पिकता पिकता कधीकधी खराब होऊन जाते. पिकलेले चांगले बेलफळ मिळत असेल तर फोडून चमच्यानी तो गर मधासारखा चाटून घ्यावा. खूप औषधी गुण असतात त्यात. बेलफळाचे आंबिल वगैरे होत नाही.

Submitted by हर्ट on 29 November, 2015 - 10:04