रंगीबेरंगी पुलाव

चिराचिरी -
- बोगातु चे ज्युलिअन्स करावेत
- सिमला मिर्चीचेही ज्युलिअन्स करावेत
- कांदा उभा, पातळ चिरावा
- लसूण सुरीच्या कडेनी दाबून चिरडावा मग त्याचे बारीक तुकडे कापावेत. अश्यानी बरोबर हवं ते टेक्शर मिळतं
- फ्लॉवरचे मध्यम आकाराचे तुरे करावेत

तांदूळ स्वच्छ धूवून निथळत ठेवावे.
आता कमीतकमी दोन ते अडीच लिटर पाणी उकळायला ठेवावं. त्यात चिमूट्भर जिरं, थोडी काळीमिरी अन चमचाभर मीठ घालावं. झाकण घालून पाणी उकळू द्यावं. मग तांदूळ वैरावा अन आता झाकण न ठेवता उकळत्या पाण्यात तांदूळ ७ ते १० मिनिटं उकळावा. बोटचेपा शिजला की पाणी काढून टाकावं अन तयार भात एखाद्या रोवळीत निथळत ठेवावा. जरा चिकट वाटत असेल तर गार पाणी घालून काट्यानी मोकळा करावा.

एका मोठ्या भांड्यात, तेल/ बटर गरम करावं. त्यात मिरीदाणे, तमालपत्रं, दालचिनी घालून जरा परतावं.
कांदा घालावा, जरा बदामी होऊ द्यावा. मग फ्लॉवर अन बोगातु ज्युलिअन्स घालावे. परतून झाकण घालून फक्त वाफेवर शिजवावेत.
नंतर मिरच्या घालून परतावं. मिरच्या करकरीत राहायला हव्यात जरा. तरच रंग टिकतो.
तयार निथळत ठेवलेला भात घालावा. मीठ घालावं. हलक्या हातानी परतावा.
एक वाफ आली की गरमगरमच वाढावा.