नाती

Submitted by vaiju.jd on 12 January, 2014 - 08:11

||श्री||

नाती असतात श्वासाची,
नाती असतात ध्यासाची.
काही नाती कधी कधी होऊन बसतात त्रासाची .

नाती असतात रुजलेली,
नाती असतात बुजलेली.
मनाच्या तळाशी पडून असतात काही नाती विझलेली!

नाती असतात जातीची,
नाती असतात मातीची.
अन काही नाती असतात संभाळायच्या रीतीची.

नाती अंतर सांधणारी,
नाती मने बांधणारी
जगण्याला चैतन्य देतात नाती धुंद करणारी.

नाती धीराची असतात,
नाती वैराची असतात.
जीवन रणांगण मानेल त्यांची नाती वीराची असतात.

नाती फुलांसारखी सुकुमार,
नाती फुलपाखरासारखी अलवार,
दुखऱ्या मनावर फुंकर घालतात काही नाती हळुवार!

नाती जगताना जुळतात
जगता जगता कळतात,
जन्मभर निभावूनही काही अनाकलनियच राहतात

जीवनवस्त्राचे धागे नाती
जीवनवेलीला आधार नाती
जन्माबरोबर हात धरतात , अन मरेपर्यंत येतात सांगाती.

विषय: 
काव्यलेखन
साहित्य
शब्दखुणा: 
नाती
Groups audience: 
गुलमोहर - कविता
Group content visibility: 
Public - accessible to all site users
शेअर करा