विराट कोहली

"इट्स टू अर्ली"

"लूक अ‍ॅट द स्टॅट्स"

"आणि फिटनेसचे काय??"

या सर्व प्रतिक्रिया येतील हे गृहीत धरूनही असे म्हणावेसे वाटत आहे की विराट कोहलीने फलंदाजीत प्रदर्शीत केलेले सातत्य आणि संघाच्या विजयास कारणीभूत होण्याची वारंवारता या निकषांनुसार तो भारताचा 'ऑल टाईम्स ग्रेट' फलंदाज बनत आहे. ही प्रक्रिया सध्या चालू आहे, त्याने फिटनेस राखून संघातील स्थान अजुन अनेक वर्षे अबाधित ठेवले तर ती प्रक्रिया पूर्ण होईल. सांख्यिकी माहितीनुसार तेंडुलकर वय वर्षे पंचवीस व विराट कोहली वय वर्षे पंचवीस ही तुलना केली तर विराटच्या धावांचे, सरासरीचे, शतकांचे, सातत्याचे व विजयास कारणीभूत ठरण्याचे टेबल अधिक दिमाखात झळकत आहे. याशिवाय तीन गुण प्रखरपणे दिसतात ते जिगरबाज खेळ, धावसंख्येचा पाठलाग करण्यातील सातत्य व भरवश्यास पात्र ठरणे! (एकप्रकारे हे सगळे एकाच गुणाचे तीन कोन आहेत असेही म्हणता येईल).

एक गंमत किंवा आवड म्हणून अ‍ॅनलाईझ करायचे ठरवले तर काही दिग्गजांच्या विशिष्ट गुणांचे मिश्रण त्याच्या व्यक्तिमत्वात आढळते.

जावेद मियाँदाद - जिगर
व्हिव्हियन रिचर्ड्स - धडाकेबाज फलंदाजी आणि प्रतिस्पर्धी संघावर अ‍ॅबसोल्यूट दहशत
अ‍ॅटिट्यूड - गांगुली
सातत्य - अ‍ॅडम गिलख्रिस्ट

क्रिकेटमध्ये सहसा न शोभणारा शीघ्रकोपी स्वभावही बहुतेक त्याच्यात असावा असे दिसते.

पण एकुण कॅरॅक्टर म्हंटले तर आपल्यासारख्या कधीही कुठेही नांगी टाकणार्‍या संघाच्या स्पिरिटसाठी अत्यावश्यकच आहे. विशेषतः गांजा प्यायल्याप्रमाणे गोलंदाजी करणारे गोलंदाज संघात असताना असा फलंदाज असणे ही एक किमान गरज म्हणावी लागेल.

बाकी अजुन भारतीयांना, माध्यमांना, समालोचकांना वगैरे तेंडुलकरच्या निवृत्तीतच समाधी अवस्था लाभत आहे म्हणा!

आपल्या देशात आणखी एक घडते. जो उत्तम खेळतो तोच उत्तम कर्णधारही ठरेल असे गृहीतक ठेवून काहीजण वावरतात. प्रत्यक्षात ती जबाबदारी आल्यावर त्या खेळाडूचा मूळ खेळही प्रभावित होऊन बसतो. पुढेमागे विराटवर ही वेळ आणली जाऊ नये अशी इच्छा!

बहुधा आपण सगळे (आणखीन) एका (किंवा खर्‍याखुर्‍या) सार्वकालीन महान खेळाडूच्या मेकिंगचे साक्षीदार आहोत.

-'बेफिकीर'!