घन सावळ सावळ रुसला

Submitted by -शाम on 5 December, 2012 - 10:05

घन सावळ सावळ रुसला
दूरात जाउनी बसला
विनविले किती सांजेने
दे निरोप हसुनी मजला

ती वदली वेड्या दोस्ता
हा एकमार्गी रे रस्ता
ठरलेले येणे जाणे
हे जीवन प्रवास नुसता

हे कळून ना कळणारे
का गुंतत जातो सारे
भेटीत विलगण्याचेही
क्षण दडले असती ना रे

उजळोनी मन गाभारा
क्षण साधावा मिळणारा
अंधारच नात्या मधला
ठरतो नाते गिळणारा..

नाहीच मेळ अपुलाही
मी असली अन् तू असला
घन सावळ सावळ रुसला
घन सावळ सावळ रुसला

..........................................शाम

विषय: 
काव्यलेखन
साहित्य
Groups audience: 
गुलमोहर - कविता
Group content visibility: 
Public - accessible to all site users
शेअर करा

एकंदर छान!

यमकांनी इन्फ्लुएन्स्डलेली आणि र्‍हस्वदीर्घाच्या किरकोळ बाबी असलेली ही रचना अतिशय लाघवी, सहज सुलभ, आशयदार आणि दिलखुलास रचना आहे.

-'बेफिकीर'!

Submitted by बेफ़िकीर on 5 December, 2012 - 13:09

वैभव, रिया, ...धन्यवाद दोस्तांनो...

बेफि, कवितेपेक्षा तुमच्या प्रतिसादाने जास्त आनंद दिला.

भारतीताई ....सहमत... जाणवत होतेच ते.

Happy

Submitted by -शाम on 5 December, 2012 - 18:10

छान!

Submitted by अमेलिया on 5 December, 2012 - 23:35

गोड!

Submitted by विजय दिनकर पाटील on 6 December, 2012 - 00:40

घन सावळ सावळ रुसला
दूरात जाउनी बसला...
विनविले किती सांजेने, दे निरोप हसुनी मजला...

>> इथेच रेंगाळलेय....

Submitted by बागेश्री on 7 December, 2012 - 03:00

बागेश्री........ माझं पण अगदी असंच झालं Happy
घन सावळ सावळ रुसला .....अहा....... किती गोड ते रुसणं Happy
अतिशय लाघवी आणि मोहक काव्य Happy

Submitted by जयवी -जयश्री अंबासकर on 7 December, 2012 - 09:36

धन्यवाद दोस्तांनो
... क्रॉसलाईनमुळे कविता बिघडतेय असे वाटून बदल केला आहे.

Submitted by -शाम on 8 December, 2012 - 11:25

शाम, इतके सुंदर बदल.. कधीकधी कवितेलाही अल्पसं प्रसाधन हवं असतं नाही ? खुलते ती त्यामुळे.
इथे शेवटी सावळ घन हसल्यासारखा वाटतोय रुसव्यातच. :))

Submitted by भारती.. on 9 December, 2012 - 00:18

आता बढीया... मांडणीमुळे आशय पोहोचवण्याची तीव्रता नक्कीच बदलते. तू वाढवलेलं कडवं तर सुंदर झालंय...

Submitted by बागेश्री on 9 December, 2012 - 00:47