मातीत खोल जावे, जमते तसे फुलावे...

Submitted by बेफ़िकीर on 7 August, 2010 - 01:29

मातीत खोल जावे, जमते तसे फुलावे
होईल ते बघावे, झाडापरी असावे

रस्ता नसेल तेथे रस्ता करून जावे
नाहीच साधले तर रस्ता बनून जावे

पापे धुवून देणे इतकेच काम त्यांचे
गंगेमधे नहावे, मदिरेमधे नहावे

हे मोहजाल सुचवे इच्छा घडोघडीला
कोणीतरी बनावे, काहीतरी करावे

दैवात माणसाच्या आहे शरीर होणे
केव्हातरी जगावे केव्हातरी मरावे

मिळतील पंख तेव्हा मुद्दाम सरपटावे
तुटतील पंख तेव्हा या अंबरी उडावे

असते सुदैव तेव्हा हसुनी फकीर व्हावे
नसते सुदैव तेव्हा मी 'बेफिकीर' व्हावे

गुलमोहर: 
मराठी गझल
शेअर करा

मस्त ग़ज़ल. सर्व द्वीपदी आवडल्या. फक्त 'पंख' मला पटली नाही; मुद्दाम व्यवस्थेला प्रतिरोध करावा असा ध्वनी येतो. सर्व व्यवस्थित चालले असताना बंड करणे जरुरीचे आहे का?

Submitted by शरद on 7 August, 2010 - 02:52

मिळतील पंख तेव्हा मुद्दाम सरपटावे
तुटतील पंख तेव्हा या अंबरी उडावे >>> हा मला जास्त आवडला.

मतला आणि मक्ता सुरेखच ! पुर्ण गझल आवडली Happy

Submitted by प्रकाश काळेल on 7 August, 2010 - 03:01

खूप छान गझल!!!
<< पापे धुवून देणे इतकेच काम त्यांचे
गंगेमधे नहावे, मदिरेमधे नहावे >> हा शेर खूप आवडला.... Happy

Submitted by गणेश कुलकर्णी on 8 August, 2010 - 08:30

रस्ता नसेल तेथे रस्ता करून जावे
नाहीच साधले तर रस्ता बनून जावे

व्वा.... हा शेर म्हणजे .. कुर्बान..

चांगली गझल.

डॉ.कैलास

Submitted by डॉ.कैलास गायकवाड on 8 August, 2010 - 21:02

सर्वांचे मनःपुर्वक आभार!

शरद, आपल्याला जाणवला तसा त्या शेराचा अर्थ नाही. वेगळा आहे.

-'बेफिकीर'!

Submitted by बेफ़िकीर on 9 August, 2010 - 00:04

जनरली गझलेत १-२ शेर अप्रतिम असतात ...ते कॉपी पेटुन "अप्रतिम" असा प्रतिसाद देतो मी .
.
.
इथे .
.
.
आख्खी गझल कॉपी पेस्टायचे कष्ट टाळतो आहे !!

जबरदस्त !!!

Submitted by भूत on 15 December, 2010 - 02:25

मातीत खोल जावे, जमते तसे फुलावे
होईल ते बघावे, झाडापरी असावे

बेफिकीरजी,
प्रामाणिक आणि सरळमार्गी गझल ! ( अस म्हंटल तर चालेल का ?)
माझ्यासारख्यासाठी या पहिल्या २ ओळी 'काफी' आहेत...कौतुक करण्यासाठी !
Happy

मातीत खोल जावे, जमते तसे फुलावे
होईल ते बघावे, झाडापरी असावे

Submitted by अनिल७६ on 18 December, 2010 - 04:34

आवडली!

Submitted by मुक्तेश्वर कुळकर्णी on 22 December, 2010 - 02:50

गजल देखिल छान लिहिता.
Gr8.
Accident चा खुपच परिणाम झाला आहे असच वाट्ते.

Submitted by ममता हीमानी on 19 January, 2011 - 00:32

रस्ता नसेल तेथे रस्ता करून जावे
नाहीच साधले तर रस्ता बनून जावे

पापे धुवून देणे इतकेच काम त्यांचे
गंगेमधे नहावे, मदिरेमधे नहावे

--- खास!

जयन्ता५२

Submitted by जयन्ता५२ on 22 March, 2012 - 05:49

मिळतील पंख तेव्हा मुद्दाम सरपटावे
तुटतील पंख तेव्हा या अंबरी उडावे
>>>..................
हा सोडून बाकी मस्तच!!

गिरिजाने केलेल्या विडंबनाच्या निमित्ताने मूळ गझल वाचनात आली.>>>>
होय!!........ एक नक्की ; अशा ताकतीच्याच गझलान्ची विडम्बने होतात ..............!
मलाही सुचले आहे पोस्ट करू का,...............

Submitted by वैवकु on 22 March, 2012 - 08:47

Pages